ఫిల్మ్‌సిటీలో ప్రపంచకప్‌ సందడి

ఈనాడు, హైదరాబాద్‌: భారత్‌ ఆతిథ్యమిచ్చే వన్డే ప్రపంచకప్‌ హడావుడి ఇప్పటికే మొదలైంది. ఇప్పుడా సందడి హైదరాబాద్‌కు చేరుకుంది. ప్రఖ్యాత రామోజీ ఫిల్మ్‌ సిటీలో ప్రపంచకప్‌ ట్రోఫీ ప్రత్యేక ఆకర్షణగా నిలిచింది. ఐసీసీ పురుషుల ప్రపంచకప్‌ ట్రోఫీ పర్యటనలో భాగంగా ఆ ప్రతిష్ఠాత్మక కప్పు బుధవారం రామోజీ ఫిల్మ్‌ సిటీకి వచ్చింది. ఇక్కడ జరిగిన ప్రత్యేక కార్యక్రమంలో ఈ కప్పును ప్రదర్శించారు. ఈ ట్రోఫీని రామోజీ ఫిల్మ్‌సిటీ ఎండీ సీహెచ్‌ విజయేశ్వరి, ఈనాడు గ్రూప్‌ డైరెక్టర్‌ సీహెచ్‌ సహరి, సీహెచ్‌ దివిజ ఆవిష్కరించారు.

క్రికెట్‌ అభిమానుల కేరింతల నడుమ కార్యక్రమం ఆద్యంతం ఉత్సాహభరితంగా సాగింది. ప్రపంచకప్‌ విజేతగా నిలిచే జట్టు చేతుల్లో ఒదిగిపోయే ఈ నిజమైన కప్పును ఒక్కసారైనా దగ్గర నుంచి చూడటం కోసం, ఫొటో దిగడం కోసం అభిమానులు పోటీ పడ్డారు. ఈ కార్యక్రమంలో ఈనాడు ఎండీ సీహెచ్‌ కిరణ్‌, వెంకట్‌, బాపినీడు, ఎ.గోపాలరావు, ఎం.నాగేశ్వర రావు, డీఎన్‌ ప్రసాద్‌, శేషసాయి, పోలీసు అధికారి మన్‌మోహన్‌ తదితరులు పాల్గొన్నారు. ఈ సందర్భంగా వెంకట్‌ మాట్లాడుతూ.. ‘‘గతంలో కపిల్‌, ధోనీ జట్లు మన దేశానికి ప్రపంచకప్‌లు అందించాయి. ఈ సారి కూడా మన టీమ్‌ఇండియా కప్పును సాధిస్తుందనే నమ్మకంతో ఉన్నాం’’ అని పేర్కొన్నారు.