ఉపాధ్యాయ దంపతుల మౌన దీక్ష.. అరెస్టు

డీఎస్‌ఈ కార్యాలయం వద్ద స్వల్ప ఉద్రిక్తత

ఖైరతాబాద్‌, న్యూస్‌టుడే: వేర్వేరు జిల్లాల్లోని పాఠశాలల్లో పనిచేస్తున్న తమను ఒకే జిల్లాకు బదిలీ చేయాలంటూ గాంధీ జయంతి సందర్భంగా ఉపాధ్యాయ దంపతులు మౌనదీక్షకు దిగారు. సోమవారం 13 జిల్లాల నుంచి స్పౌజ్‌ ఫోరం ఆధ్వర్యంలో తరలివచ్చిన ఉపాధ్యాయ దంపతులు హైదరాబాద్‌ లక్డీకాపూల్‌లోని పాఠశాల విద్యాశాఖ డైరెక్టర్‌ (డీఎస్‌ఈ) కార్యాలయం ఎదుట వారి పిల్లలతో మౌన నిరసన దీక్ష చేపట్టారు. దీక్షలో బైఠాయించిన ఉపాధ్యాయ దంపతులను పోలీసులు అరెస్టు చేశారు. ఈ క్రమంలో పోలీసులు, ఉపాధ్యాయులకు మధ్య వాగ్వాదం చోటుచేసుకుని స్వల్ప ఉద్రిక్త పరిస్థితి నెలకొంది. ఉపాధ్యాయ మహిళలు, వారి పిల్లలు కన్నీరు పెట్టుకున్నారు. ఉపాధ్యాయ దంపతులు మాట్లాడుతూ.. శాంతియుతంగా దీక్షకు దిగిన తమను పోలీసులు ఈడ్చుకెళ్లి వాహనాల్లో పడేశారని ఆరోపించారు. గాంధీ వేషధారణలో ఉన్న ఓ బాలుడిని  తండ్రితోపాటు వాహనంలోకి ఎక్కించారు. అరెస్టు చేసిన వారిని వివిధ ఠాణాలకు తరలించి సాయంత్రం సొంత పూచీకత్తుపై విడుదల చేశారు.