ఎస్సీ వర్గీకరణ వెంటనే చేపట్టండి

కేంద్ర మంత్రి అమిత్‌షాకు ఎమ్మార్పీఎస్‌ వినతి

ఈనాడు, దిల్లీ: ఎస్సీ రిజర్వేషన్ల వర్గీకరణను వెంటనే చేపట్టాలని కేంద్ర హోం శాఖ మంత్రి అమిత్‌ షాను ఎమ్మార్పీఎస్‌ కోరింది. ఈ మేరకు సోమవారం దిల్లీలో ఎమ్మార్పీఎస్‌ వ్యవస్థాపక అధ్యక్షుడు మంద కృష్ణమాదిగ, మాదిగ ఉద్యోగులు, న్యాయవాదుల సమాఖ్య నాయకులు కేంద్ర మంత్రికి వినతిపత్రం అందజేశారు. ఉమ్మడి రాష్ట్రంలో తెదేపా ప్రభుత్వ హయాంలో నాలుగేళ్లపాటు వర్గీకరణ అమలై దాని ఫలాలు కనిపించాయని, తర్వాత పరిస్థితి మళ్లీ మొదటికొచ్చిందని వాపోయారు. అనంతరం మంద కృష్ణమాదిగ మాట్లాడుతూ.. ఎస్సీ వర్గీకరణపై తగిన సమయంలో తగిన నిర్ణయం తీసుకుంటామని కేంద్ర మంత్రి హామీ ఇచ్చారని తెలిపారు. ఎస్సీ వర్గీకరణ కోరుతూ ఈ నెల 7న జోగులాంబ గద్వాల జిల్లా అలంపూర్‌ నుంచి మాదిగ విశ్వరూప పాదయాత్ర ప్రారంభించనున్నట్లు వెల్లడించారు.