విశాఖ ఇండస్ట్రీస్‌, విజిలెన్స్‌సెక్యూరిటీ ఖాతాల్లోకి భారీగా నగదు జమ..!

రూ.8 కోట్లు ఫ్రీజ్‌ చేసిన పోలీసులు

ఈనాడు, హైదరాబాద్‌: బషీర్‌బాగ్‌లోని ఐడీబీఐ బ్యాంకులో రెండు సంస్థల ఖాతాల్లోకి జమైన భారీ నగదును ఫ్రీజ్‌ చేసినట్లు మధ్యమండలం డీసీపీ వెంకటేశ్వర్లు ఆదివారం తెలిపారు. ఎన్నికల సమయంలో బ్యాంకు లావాదేవీలపై ఈసీ అధికారులు నిఘా ఉంచారు. ఖాతాల్లో జమయ్యే అక్రమ నగదు వివరాలను సేకరిస్తున్నారు. ఈ నెల 13న విశాఖ ఇండస్ట్రీస్‌ ప్రైవేట్‌ లిమిటెడ్‌, విజిలెన్స్‌ సెక్యూరిటీ సర్వీసెస్‌ ప్రైవేట్‌ లిమిటెడ్‌ ఖాతాల్లోకి రూ.8 కోట్లు జమయ్యాయి. గుర్తుతెలియని ఖాతా నుంచి పెద్దఎత్తున నగదు బదిలీ కావటంపై సైఫాబాద్‌ పోలీసులకు ఫిర్యాదులు వచ్చాయి. రంగంలోకి దిగిన పోలీసులు సదరు లావాదేవీలపై ఆరా తీసి నగదును స్తంభింపజేశారు. ఈ మేరకు ఐడీబీఐ బ్రాంచి మేనేజర్‌, నోడల్‌ అధికారి, ఆదాయపన్నుశాఖ, ఈడీ జాయింట్‌ డైరెక్టర్లకు లేఖ ద్వారా తెలియజేశామని డీసీపీ తెలిపారు. రెండు సంస్థల ఖాతాల్లోకి భారీ ఎత్తున నగదు జమ చేసిన వారి గురించి ఆరా తీస్తున్నామని డీసీపీ తెలిపారు. పూర్తి ఆధారాలు లభించాక చట్టపరమైన చర్యలు తీసుకుంటామని స్పష్టం చేశారు. కాగా ఓ ప్రధాన పార్టీకి చెందిన కీలక నాయకుడి కోసమే నగదు బదిలీ చేసి ఉంటారని పోలీసులు అనుమానిస్తున్నారు.