Mohan Babu: ప్రతి ఇంట్లో ఉండే సమస్యే: ‘కుటుంబ వివాదం’పై మోహన్‌బాబు వ్యాఖ్య

తిరుపతి(వైద్యవిభాగం), న్యూస్‌టుడేః ప్రతి ఇంట్లో భార్యాభర్తలు, అన్నదమ్ముల మధ్య ఉన్న విభేదాలే మా ఇంట్లోనూ ఉన్నాయని ప్రముఖ నటుడు మంచు మోహన్‌బాబు (Mohanbabu) పేర్కొన్నారు. గురువారం తిరుపతిలో ఓ ప్రైవేటు ఆస్పత్రి ప్రారంభోత్సవానికి కుమారులు మంచు విష్ణు (Vishnu), మంచు మనోజ్‌ (Manoj)లతో కలిసి ఆయన వచ్చారు. ఈ సందర్భంగా ఓ మీడియా ప్రతినిధి అడిగిన ప్రశ్నకు పైవిధంగా స్పందించారు. కుమారుల మధ్య నెలకొన్న వివాదం గురించి మాట్లాడే సమయం ఇది కాదంటూ వెళ్లిపోయారు. వివాదంపై స్పందించాలని మంచు మనోజ్‌ను మీడియా ప్రశ్నించగా.. భుజంపై వేడి గడ్డ వచ్చిందంటూ తనదైన శైలిలో సమాధానమిచ్చారు. ‘వాట్‌ ది ఫిష్‌’ (మనం మనం బరంపురం) సినిమాను ఇటీవల ప్రారంభించామని.. ప్రస్తుతం కెనడాలో చిత్రీకరణ సాగుతోందని తెలిపారు. మనోజ్‌ వ్యాఖ్యలు సామాజిక మాధ్యమాల్లో వైరలయ్యాయి.