Ratlam: ముందుగా వచ్చిన రైలు.. ఆనందంతో ప్రయాణికులు ఏం చేశారంటే!

దిల్లీ: మన దేశంలో రైళ్ల సమయపాలనపై కొన్నిసార్లు జోకులు పేలుతుంటాయి. ఎప్పుడూ ఆలస్యమేనంటూ వ్యాఖ్యానాలు వినిపిస్తాయి! కానీ, బుధవారం రాత్రి మధ్యప్రదేశ్‌లోని రత్లాం రైల్వేస్టేషన్‌లో మాత్రం ఓ ఆసక్తికర దృశ్యం నమోదైంది. ఓ రైలు సమయానికి 20 నిమిషాల ముందుగానే రావడంతో.. కొంతమంది ప్రయాణికులు సంతోషంతో సంబరాలు చేసుకున్నారు! ప్లాట్‌ఫాంపైకి చేరుకుని సంప్రదాయ గర్భా నృత్యంతో ఆకట్టుకున్నారు. ఈ వీడియో ప్రస్తుతం సామాజిక మాధ్యమాల్లో వైరల్‌గా మారింది.

బాంద్రా నుంచి హరిద్వార్ వెళ్లాల్సిన రైలు బుధవారం రాత్రి 10.35 గంటలకు రత్లాం స్టేషన్‌కు చేరుకోవాల్సి ఉంది. కానీ, 20 నిమిషాల ముందుగానే వచ్చింది. ఇక్కడ ట్రైన్‌ 10 నిమిషాలపాటు ఆగుతుంది. ఈ క్రమంలో అరగంట సమయం దొరకడంతో.. ప్లాట్‌ఫాంపైకి చేరుకున్న పదుల సంఖ్యలో ప్రయాణికులు ఉత్సాహంగా నృత్యాలు చేశారు. సంబంధిత వీడియోను రైల్వే మంత్రి అశ్విని వైష్ణవ్ సైతం ట్విటర్‌ వేదికగా పంచుకున్నారు. హ్యాపీ జర్నీ అని రాసుకొచ్చారు. రైలు ముందుగా వచ్చినప్పుడు.. అది నిజంగా సంతోషమేనని ఓ నెటిజన్‌ కామెంట్‌ పెట్టారు.