పంజాబ్‌: భాంగ్రా నృత్యం చేసిన ‘రావణ’

నెట్టింట్లో వైరల్‌గా మారిన వీడియో

ఇంటర్నెట్‌ డెస్క్‌: ఏటా దేశవ్యాప్తంగా దసరాను ఎంతో వైభవంగా జరుపుకొనేవాళ్లం. అయితే ఈసారి కరోనా మహమ్మారి దెబ్బకు తక్కువ మందితోనే సంబరాలు చేసుకోవాల్సిన పరిస్థితి. నవరాత్రులు ముగింపు రోజున రావణాసురుడి బొమ్మను దహనం చేసే అద్భుతమైన ఘట్టాన్ని చూసి తీరాల్సిందే. అలాగే ఉత్తర భారతంలో చాలా చోట్ల రామ్‌లీలా నాటక ప్రదర్శన ఉంటుంది. అయితే కరోనా వ్యాప్తి నేపథ్యంలో భారీగా ప్రేక్షకులు లేకుండా నాటక ప్రదర్శనను వర్చువల్‌గా నిర్వహించారు. ఇలా పంజాబ్‌లో ప్రదర్శితమైన రామ్‌లీలా నాటకానికి సంబంధించిన వీడియో నెట్టిట్లో వైరల్‌గా మారింది. రావణాసురుడి పాత్రధారి చేసిన భాంగ్రా నృత్యం సామాజిక మాధ్యమాలను ఓ ఊపు ఊపేసింది. పంజాబీ పాటలకు అనుగుణంగా రావణాసురుడి వేషధారి వేసిన భాంగ్రా నృత్యం వీక్షకులను ఆకట్టుకుంది. మరి ఆ భాంగ్రా నృత్య వీడియోను మీరూ వీక్షించి ఆనందించండి..