Updated : 06/03/2022 16:46 IST

Automotive Field: కార్లు, బుల్లెట్ బండ్లు.. ఏవైనా తయారు చేసేస్తాం!

మొన్నటిదాకా బైక్‌ వెనక సీటుకే పరిమితమైన మహిళలు.. ఇప్పుడు ఏ వాహనమైనా అలవోకగా నడిపేస్తున్నారు. అంతేనా.. మరో అడుగు ముందుకేసి వాటి తయారీలోనూ పాలుపంచుకుంటున్నారు. ద్విచక్ర వాహనాల దగ్గర్నుంచి అతి భారీ వాహనాల దాకా.. ఏదైనా తయారుచేసేస్తామంటున్నారు. ఇలా అతివల ఆసక్తికి తగ్గట్లే కంపెనీలూ వారికి చక్కటి అవకాశాలు అందిస్తున్నాయి. నిజానికి వాహన తయారీ సంస్థల్లో మహిళా సాధికారతకు ఇది శుభపరిణామం అంటున్నారు నిపుణులు. ఇదిలాగే కొనసాగితే ఈ అరుదైన రంగంలో లింగ సమానత్వం సాధించడానికి పెద్ద సమయం పట్టదంటున్నారు. ఇంతకీ, కంపెనీలు రెడ్‌ కార్పెట్‌ పరిచి మరీ ఆహ్వానిస్తోన్న ఈ రంగంలో మహిళల కెరీర్‌ ఎలా ఉండనుంది? ఈ రంగంలో రాణించాలంటే మహిళలు అందిపుచ్చుకోవాల్సిన నైపుణ్యాలేంటి? తదితర విషయాల గురించి ‘అంతర్జాతీయ మహిళా దినోత్సవం’ ప్రత్యేకంగా మీకోసం!


ఏ కంపెనీలో.. ఎంతమంది?!

పురుషులకు మాత్రమే పరిమితమైన రంగాల్లో రాణించడానికీ వెనకాడట్లేదు నేటి మహిళలు. వాహన తయారీ రంగం కూడా ఇందులో ఒకటి. మహిళల ఆసక్తి, వారి పనితీరును దృష్టిలో ఉంచుకొని కొన్ని.. మహిళా సాధికారతను ప్రోత్సహించాలని మరికొన్ని సంస్థలు తమ కంపెనీలోకి మహిళా ఉద్యోగుల్ని నియమించుకుంటున్నాయి. వాటిలో కొన్నే ఇవి!

* తమిళనాడులో గతేడాది నెలకొల్పిన ‘ఓలా ఫ్యూచర్‌ ఫ్యాక్టరీ’ గురించి మీలో చాలామంది వినే ఉంటారు. ఎలక్ట్రిక్‌ స్కూర్లు తయారుచేసే ఈ యూనిట్ పూర్తి స్థాయి మహిళా ఉద్యోగులతో పనిచేస్తోంది. ఇందుకోసం భవిష్యత్తులో పది వేల మంది మహిళా ఉద్యోగుల్ని నియమించుకోనున్నట్లు సంస్థ సీఈవో భవీష్‌ అగర్వాల్‌ ప్రకటించారు. కాగా ఇప్పటికే వేల మంది మహిళలు విధుల్లో నిమగ్నమయ్యారు. దీనికి సంబంధించిన వీడియో అప్పట్లో పెద్ద సంచనలమే సృష్టించింది.

* మహిళల్ని తమ వాహన తయారీ రంగంలోకి ఆహ్వానించడం నాలుగేళ్ల క్రితమే ప్రారంభించింది టాటా మోటార్స్‌ సంస్థ. చక్కటి చదువు, నైపుణ్యాలుండి.. ఆర్థికంగా వెనకబడిన అమ్మాయిల్ని సాధికారత దిశగా ప్రోత్సహించడమే సంస్థ లక్ష్యంగా పెట్టుకుంది. ఇందుకు ప్రతిగానే ప్రస్తుతం వివిధ ప్లాంట్స్‌లలో పరిశీలిస్తే సుమారు 1,812 మంది మహిళలు పనిచేస్తున్నారు. అంటే.. ఈ విభాగంలో వివిధ ప్లాంట్లలో పనిచేస్తోన్న మొత్తం ఉద్యోగుల్లో మహిళలు నాలుగో శాతం అన్నమాట!

* Eicher Motors కు చెందిన ద్విచక్ర వాహన విభాగం రాయల్‌ ఎన్‌ఫీల్డ్‌.. తమ ఇంజిన్‌ అసెంబ్లీ లైన్‌ (ఇంజిన్‌కు సంబంధించిన పరికరాల్ని ఒక దగ్గరికి చేర్చడం) ను పూర్తి స్థాయి మహిళలతోనే నడుపుతోంది. ప్రస్తుతం ఈ విభాగంలో సుమారు 140 మంది మహిళలు విధులు నిర్వర్తిస్తున్నారు.

* మరోవైపు బజాజ్‌ ఆటో కంపెనీ పుణేలోని ఛకన్‌, ఉత్తరాఖండ్‌లోని పంత్‌నగర్‌ యూనిట్లను (అసెంబ్లీ లైన్స్‌) పూర్తి స్థాయి మహిళలతోనే నడుపుతోంది. గత నాలుగేళ్ల కాలంలో ఇక్కడి మహిళా ఉద్యోగుల సంఖ్య రెట్టింపు కావడం విశేషం. ప్రస్తుతం ఈ రెండు యూనిట్లలో కలిపి 355 మంది మహిళా ఉద్యోగులున్నారు.

* ద్విచక్ర వాహన సంస్థ ‘హీరో మోటో కార్ప్‌’ ప్రత్యేకంగా మహిళా ఉద్యోగుల్ని నియమించుకోవడానికి ‘తేజస్విని’ అనే ప్రాజెక్ట్‌కు శ్రీకారం చుట్టింది. ఈ నేపథ్యంలో ప్రస్తుతం వివిధ శాఖల్లో, వేర్వేరు విభాగాల్లో సుమారు 160కి పైగా మహిళా ఉద్యోగులు పనిచేస్తున్నారు.


ఎందుకు ఎంచుకుంటున్నారంటే..?! 

కెరీర్‌ని ఎంచుకునే క్రమంలో మహిళలు దృష్టి సారించే అంశాలు రెండే రెండు. ఒకటి - ఉద్యోగ భద్రత, రెండు - మంచి జీతభత్యాలు. ఈ రెండూ అనుకూలిస్తే అరుదైన రంగాల్లో ప్రవేశించడానికి, పురుషాధిపత్యం ఉన్న రంగాల్లో రాణించడానికీ మహిళలు వెనకాడట్లేదు. ఆటోమోటివ్‌/ఆటోమొబైల్స్‌ రంగాల్లో మహిళల సంఖ్య పెరగడానికీ ఇదే ప్రధాన కారణం అంటున్నారు నిపుణులు. అమెరికాకు చెందిన ‘నేషనల్‌ ఆటోమొబైల్‌ డీలర్స్‌ అసోసియేషన్ (NADA)’ ప్రకారం.. ఆటో టెక్నీషియన్‌ రంగంలోకి ప్రవేశించే ప్రతి ఐదుగురిలో కనీసం ఒక్కరైనా మహిళ ఉంటున్నట్లు తేలింది. ఇలా మహిళలు ఈ రంగంపై ఆసక్తి చూపడానికి, కంపెనీలు కూడా స్త్రీల వైపు మొగ్గు చూపడానికి పలు కారణాలున్నాయంటున్నారు నిపుణులు.

* ఏదైనా కొత్త నైపుణ్యం నేర్చుకునే విషయంలో ఈ కాలపు అమ్మాయిలు అబ్బాయిలతో సమానంగా పోటీ పడుతున్నారని చెప్పచ్చు. ఈ క్రమంలో కార్లు, బైక్‌లు నడపడమే కాదు.. వాటికి సంబంధించిన హార్డ్‌వేర్‌ పనులు నేర్చుకోవడానికీ ఉత్సుకత చూపుతున్నారు. ఈ ఆసక్తే వారిని ఇటువైపుగా అడుగులేయిస్తోందంటున్నారు నిపుణులు.

* పురుషులతో పోల్చితే మహిళల శరీర నిర్మాణం చిన్నది. దీంతో వాహనాల విడిభాగాలకు సంబంధించిన మరమ్మతులను వారు సులభంగా చేయగలరు. దీనివల్ల సమయం, డబ్బు రెండూ ఆదా అవుతాయి. ఇది దృష్టిలో ఉంచుకొనే చాలా కంపెనీలు మహిళల్ని రిక్రూట్‌ చేసుకుంటున్నట్లు నిపుణులు అభిప్రాయపడుతున్నారు.

* ఇతర రంగాలతో పోల్చితే ఆటోమొబైల్స్‌లో కెరీర్‌ అభివృద్ధి వేగంగా ఉంటుందని, ఇదే ఎక్కువమంది అమ్మాయిలు ఈ రంగాన్ని ఎంచుకునేందుకు దోహదం చేస్తోందని చెబుతున్నారు నిపుణులు. అంతేకాదు.. ఓ కంపెనీలో చేరి ఇలా వాహనాలకు సంబంధించిన హార్డ్‌వేర్‌ పనులు నేర్చుకొని.. ఆపై వాళ్లే స్వయంగా వ్యాపారం ప్రారంభించచ్చని, తద్వారా మరో నలుగురికి ఉపాధి కల్పించచ్చన్న ఆలోచన కూడా వారిలో ఉండచ్చని అంటున్నారు.

* ఏ పనైనా మహిళలు ఓపికతో, నీట్‌గా చేయడంలో దిట్ట. బహుశా చిన్నతనం నుంచి ఇంటి పనులు నేర్చుకోవడం, తల్లిని చూస్తూ పెరగడం వల్లే వారికి ఈ నైపుణ్యాలు అలవడతాయి. నిజానికి ఇలాంటి లక్షణాలు పురుషుల్లో చాలా తక్కువమందిలో ఉంటాయి. ఆటోమొబైల్‌ కంపెనీలు ఈ విషయం దృష్టిలో ఉంచుకొని.. మహిళలైతేనే పూర్తి సమర్థంగా పనిచేయగలరన్న నమ్మకంతో వారికి ఎక్కువ అవకాశాలు ఇస్తున్నట్లు కొందరు నిపుణులు అభిప్రాయపడుతున్నారు.
ఇలా కారణమేదైనా మెకానిక్‌ రంగంలో భవిష్యత్తంతా మహిళలదే అన్న విషయం స్పష్టమవుతోంది.


వారే స్ఫూర్తిగా..! 

 

వాహన రంగంలో ఇప్పుడిప్పుడే మహిళల ప్రాతినిథ్యం పెరుగుతోన్నా.. గతంలోనూ కొందరు మహిళలు ఇందులోకి ప్రవేశించి సత్తా చాటారు. వాళ్లను స్ఫూర్తిగా తీసుకొని మరికొందరు అతివలు ఇదే బాట పట్టారు.

* ఇన్ఫోసిస్‌ సహ వ్యవస్థాపకుడు నారాయణమూర్తి భార్యగా, సామాజిక కార్యకర్తగానే సుధామూర్తి అందరికీ తెలుసు. కానీ ఆటోమొబైల్‌ తయారీ యూనిట్లో పనిచేసిన తొలి మహిళా ఇంజినీర్‌ ఆమె. 1974 ఏప్రిల్‌లో పుణేలోని టాటా మోటార్స్‌ ప్లాంట్‌లో ఆమెను జేఆర్‌డీ టాటా స్వయంగా నియమించారు. ఇలా అరుదైన రంగంలోనూ అమ్మాయిలు సత్తా చాటగలరని నిరూపించారామె.

* అత్యంత ఆదరణ పొందిన మహీంద్రా ఎక్స్‌యూవీ 500.. 2011లో విడుదలై హాట్‌కేక్‌లా అమ్ముడుపోయింది. ఇలా ఈ విభాగంలో అత్యుత్తమ డిజైన్‌ కారుగా పేరు తెచ్చుకున్న ఈ మోడల్‌ను డిజైన్‌ చేసింది రామ్‌కృపా అనంతన్‌. తన డిజైనింగ్‌ నైపుణ్యంతో కంపెనీ అభివృద్ధిలో పాలుపంచుకోవడమే కాదు.. కంపెనీ డిజైనింగ్‌ హెడ్‌ స్థాయికి చేరుకోగలిగారామె.

* బజాజ్‌ టూవీలర్‌ కొన్నేళ్ల కిందట డోమినర్‌ పేరుతో 400 సీసీ బైకును తయారుచేసింది. అబ్బాయిల మనసు దోచిన ఈ బైక్‌ని రూపొందించింది పూర్తిగా మహిళలే అన్న విషయం చాలా తక్కువమందికి తెలుసు! పుణే సమీపంలోని ఛకన్‌ ప్లాంట్‌లో తయారయ్యే ఈ బైక్‌ తయారీ కోసం.. సుమారు 130 మంది మహిళలు బరువైన విడిభాగాలను మోయడం, వాటిని అనుసంధానించడం, వెల్డింగ్‌, పెయింటింగ్‌, ఫినిషింగ్.. ఇలా ప్రతి పనినీ వారే చూసుకుంటున్నారు. ఇవే కాదు.. కేటీఎం, పల్సర్‌ బైక్‌లు, చేతక్‌ స్కూటర్‌ తయారీ.. వంటి వాహన తయారీ పనుల్లోనూ పాలుపంచుకుంటున్నారు. తద్వారా పురుషులకే సాధ్యమనుకున్న పనుల్ని తామూ చేయగలమని నిరూపిస్తున్నారు.


ఈ నైపుణ్యాలుండాల్సిందే!

ఎప్పటికప్పుడు అప్‌డేట్‌ అవడం, నైపుణ్యాలు పెంచుకోవడం.. ఏ రంగంలో ఎదగడానికైనా కావాల్సినవి ఇవే! ఆటోమొబైల్‌ రంగంలోనూ దూసుకుపోవాలంటే ఇవే కీలకం అంటున్నారు నిపుణులు. మరికొన్ని అదనపు మెలకువలు కూడా మనల్ని అందలం ఎక్కించే అవకాశాలున్నాయంటున్నారు.

* సమస్యను విశ్లేషించే, పరిష్కరించే సామర్థ్యం పెంచుకోవాలి.

* భవిష్యత్తంతా ఎలక్ట్రిక్‌ వాహనాలదే కాబట్టి.. ఈ-వెహికల్స్‌కి సంబంధించిన మెకానికల్‌ పద్ధతుల్ని అవపోసన పట్టాలి.

* డిజిటల్‌ సర్క్యూట్స్‌పై పట్టు పెంచుకోవాలి. అలాగే వాటిని మెకానికల్‌/ఎలక్ట్రో మెకానికల్‌ పద్ధతులతో అనుసంధానించడం ఎలాగో తెలిసుండాలి.

* మల్టీటాస్కింగ్‌, సృజనాత్మకత, క్రిటికల్‌ థింకింగ్‌.. వంటివీ వాహన తయారీ రంగంలో రాణించాలంటే ఉండాల్సిన కొన్ని ముఖ్యమైన నైపుణ్యాలు.

* సహచరులతో, వినియోగదారులతో సులభంగా కలిసిపోయేందుకు చక్కటి కమ్యూనికేషన్‌ స్కిల్స్‌ కూడా ముఖ్యమే అంటున్నారు నిపుణులు.

ఇదంతా చదువుతుంటే వాహన తయారీ రంగంలో మహిళల భవితవ్యం ఉన్నతంగా ఉండనుందన్న విషయం స్పష్టమవుతోంది కదూ. అయితే ఈ క్రమంలో మహిళలు రాణించాలంటే వారి ఆసక్తితో పాటు ఇంట్లో వాళ్ల ప్రోత్సాహం కూడా అవసరం అంటున్నారు నిపుణులు. అప్పుడే ఈ రంగంలోనూ లింగ సమానత్వం సాధ్యపడుతుందన్నది వారి అభిప్రాయం!


Advertisement

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని