పెద్దవారు ఏయే వ్యాక్సిన్లు తీసుకోవాలి?

నమస్తే డాక్టర్‌.. సాధారణంగా పిల్లలకు మాత్రమే వ్యాక్సిన్లు ఇప్పిస్తుంటాం. అయితే పెద్దవారికి కూడా కొన్ని వ్యాక్సిన్లు ఉంటాయని విన్నాను. యుక్త వయసు నుంచి వృద్ధాప్యం వరకు ఏయే వ్యాక్సిన్లు వేసుకోవాల్సిన అవసరం ఉంటుంది. దయచేసి తెలియజేయగలరు. - ఓ సోదరి

జ. సహజంగా వ్యాక్సినేషన్‌ అనగానే చాలామంది చిన్నపిల్లలకు వేసేవి అనుకుంటారు. అయితే ఈ మధ్యకాలంలో పెద్దవారు కూడా వ్యాక్సిన్లు వేసుకోవాల్సిన అవసరం ఉంటోంది. దీనినే ‘అడల్ట్‌ వ్యాక్సినేషన్’ అంటుంటారు.

⚛ సాధారణంగా చిన్నపిల్లలకు డిఫ్తీరియా, ధనుర్వాతం, కోరింత దగ్గు వంటి సమస్యలు రాకుండా ఉండేందుకు DPT వ్యాక్సిన్ ఇస్తుంటారు. ఇదే వ్యాక్సిన్‌ను పెద్దవారికి కూడా ఇస్తుంటారు. దానిని Tdap అంటుంటారు. ఈ వ్యాక్సిన్‌ను 11 నుంచి 18 ఏళ్ల వయసున్న పిల్లలకు ఇప్పించాల్సి ఉంటుంది. ఈ వ్యాక్సిన్‌ను ప్రతి పది సంవత్సరాలకు ఇస్తుంటారు.

⚛ గర్భాశయ ముఖ ద్వార క్యాన్సర్ (Cervical cancer) హ్యూమన్‌ పాపిలోమా వైరస్‌ ఇన్ఫెక్షన్‌ వల్ల వస్తుంటుంది. ఈ వైరస్‌ను నివారించడానికి ‘హెచ్‌పీవీ వ్యాక్సిన్‌’ తీసుకోవచ్చు. ఇది కేవలం సర్వైకల్‌ క్యాన్సర్‌ను మాత్రమే కాకుండా వెజైనల్‌ క్యాన్సర్‌, వల్వర్‌ క్యాన్సర్‌ను కూడా నివారిస్తుంది. ఈ వ్యాక్సిన్‌ 9 నుంచి 45 సంవత్సరాల మహిళలు ఎవరైనా తీసుకోవచ్చు.

⚛ వర్షాకాలంలో వైరల్‌ ఇన్ఫెక్షన్లు చాలామందిని ఇబ్బంది పెడుతుంటాయి. ఇందుకోసం వర్షాకాలం మొదట్లోనే ‘ఇన్‌ఫ్లుయెంజా వ్యాక్సిన్‌’ తీసుకోవడం మంచిది. దీనినే ‘ఫ్లూ షాట్’ అని కూడా అంటారు. ఈ వ్యాక్సిన్ తీసుకోవడం వల్ల వైరల్‌ ఇన్ఫెక్షన్లు వచ్చే ప్రమాదాన్ని తగ్గించుకునే అవకాశం ఉంటుంది.

⚛ న్యుమోకోకస్ అనే బ్యాక్టీరయా వల్ల న్యుమోకోకల్ వ్యాధి వస్తుంది. దీనిని నిరోధించడానికి ‘న్యుమోకోకల్‌ వ్యాక్సిన్’ అనేది ఇస్తుంటారు. సాధారణంగా దీనిని రోగనిరోధక శక్తి తక్కువగా ఉన్నవారు లేదా పెద్దవారికి ఇస్తుంటారు.

⚛ కొంతమందిలో ఆటలమ్మ, అమ్మవారుగా పిలిచే చికెన్‌పాక్స్‌ అనే వైరల్‌ ఇన్ఫెక్షన్‌ వస్తుంటుంది. సాధారణంగా చిన్నవయసులో ఉన్నప్పుడే దీనికి సంబంధించిన వ్యాక్సిన్‌ను ఇస్తుంటారు. ఒకవేళ చిన్నప్పుడు ఈ వ్యాక్సిన్ తీసుకోకపోతే 13 ఏళ్లు పైబడిన వారు ఈ వ్యాక్సిన్‌ తీసుకోవాల్సి ఉంటుంది. దీనిని ‘వారిసెల్లా వ్యాక్సిన్‌’ అంటుంటారు. దీనిని రెండు డోసుల్లో తీసుకోవాల్సి ఉంటుంది.

⚛ కుక్క కాటుకు గురైనప్పుడు ‘రేబిస్‌ వ్యాక్సిన్‌’ తప్పనిసరిగా తీసుకోవాలి. ఇది 5 డోసులుగా ఉంటుంది.

⚛ కొన్ని ప్రదేశాల్లో టైఫాయిడ్‌ కేసులు అధికంగా ఉంటాయి. ఇది ఎండమిక్‌ డిసీజ్‌. దీనికి సంబంధించిన టైఫాయిడ్‌ వ్యాక్సిన్‌ను అవసరాన్ని బట్టి తీసుకోవాల్సి ఉంటుంది.

చూశారుగా.. పిల్లలకు మాదిరిగానే పెద్దవారు కూడా వ్యాక్సిన్లు తీసుకోవడం ఎంతో అవసరం. ఈ వ్యాక్సిన్లు తీసుకోవడం ద్వారా వాటికి సంబంధించిన ఆరోగ్య సమస్యలు వచ్చినప్పుడు మరింత తీవ్రతరం కాకుండా బయటపడచ్చు. ముఖ్యంగా ఫ్లూ షాట్‌ను బీపీ, షుగర్‌ ఉన్నవారు.. రోగనిరోధక శక్తి తక్కువగా ఉన్నవారు ప్రతి సంవత్సరం తీసుకోవడం మంచిది.