ముఖచర్మంపై మ్యాజిక్‌

ఏదైనా వేడుకకు హాజరు కావాలంటే అప్పటికప్పుడు ముఖాన్ని మెరిసేలా చేసే శక్తి అవిశగింజల జెల్‌లో ఉంది. ఇంట్లోనే నిమిషాల్లో తయారు చేసుకోగలిగే ఈ జెల్‌తో మ్యాజిక్‌ ఎలా చేయొచ్చో తెలుసుకుందాం.

తయారీ.. పావుకప్పు అవిశగింజలకు రెండు కప్పుల నీటిని కలిపి పదినిమిషాలు ఉడికించాలి. చల్లారాక చిక్కగా వచ్చిన జెల్‌ను విడిగా వడకట్టి పొడి సీసాలో భద్ర పరుచుకోవాలి. దీన్ని ఫ్రిజ్‌లో పెట్టుకుని వారం పాటు వినియోగించుకోవచ్చు.

* మొదటి దశలో... ముఖాన్ని శుభ్రపరుచుకున్నాక రెండు చెంచాల అవిశ జెల్‌ను తీసుకుని, చెంచా తేనె/ పాలు వేసి, అప్లై చేసి, మర్దన చేయాలి. తర్వాత చల్లనినీటితో కడిగేయాలి. దీంతో చర్మంపై మురికి పోతుంది.

* రెండో దశలో.. స్క్రబ్బింగ్‌ కోసం రెండు చెంచాల అవిశగింజలను మిక్సీలో మెత్తగా పొడిలా చేయాలి. ఇందులో జెల్‌ను రెండు చెంచాలు వేసి పేస్టులా చేసుకొని ముఖానికి పట్టించాలి. మృదువుగా 5 నిమిషాలు మర్దనా చేసి కడిగేస్తే చాలు... చర్మ రంధ్రాల్లోని మురికి పోతుంది.  

* మూడో దశలో.. చర్మరంధ్రాలను మూయడానికి ఓ గిన్నెలో చెంచా జెల్‌ను తీసుకోవాలి. దీనికి సమాన పరిమాణంలో గ్లిజరిన్‌ / కలబంద గుజ్జు / రోజ్‌వాటర్‌ను కలపాలి. ఈ మిశ్రమాన్ని ముఖానికి మృదువుగా రాసి మర్దన చేయాలి. దీంతో చర్మం బిగుతుగా మారుతుంది.

* నాలుగోదశలో.. రెండు చెంచాల గోధుమపిండికి సరిపడినంత జెల్‌ వేసి మెత్తని పేస్టులా చేసుకోవాలి. దీన్ని ముఖానికి పట్టించి అయిదు నుంచి పది నిమిషాలు ఆరనివ్వాలి. ఆ తర్వాత చేతివేళ్లను తడిచేసుకుని మృదువుగా మర్దనా చేసి, చల్లని నీటితో శుభ్రం చేసుకుంటే మెరిసే మోము మీ సొంతమవుతుంది. నలుగురిలోనూ మిమ్మల్ని ప్రత్యేకంగా కనిపించేలా చేస్తుంది.

ప్రయోజనాలు.. ఒమేగా 3 ఫ్యాటీ యాసిడ్స్‌ పుష్కలంగా ఉండే ఈ జెల్‌ చర్మానికి మాయిశ్చరైజర్‌గా పనిచేసి మృదుత్వాన్ని, మెరుపును అందిస్తుంది. ముడతలను పోగొట్టి,  వృద్ధాప్య ఛాయలను దూరం చేస్తుంది. మచ్చలను మాయం చేసే ఔషధగుణాలు అవిశగింజల్లో ఉన్నాయి. ఇది చర్మాన్ని ఆరోగ్యంగా ఉంచి, శాశ్వత ప్రయోజనాలనూ అందిస్తుంది.