Breaking | Feedback | ePratibha | E-PAPER | Pratibha

పిల్లలు అలా మాట్లాడుతుంటే..

ఇంటికెవరైనా వచ్చినప్పుడు తన తొమ్మిదేళ్ల కొడుకు భార్గవ్‌ను పలకరించాలంటే జయకు భయం. మర్యాద లేకుండా మాట్లాడతాడు. తల బిరుసుగా ప్రవర్తిస్తాడు. ఈ తీరుకి ఆదిలోనే చెక్‌ పెట్టాలంటారు

Updated : 17 Jul 2021 05:22 IST

చులకన చేసుకోవద్ద్దు...

పుట్టినప్పుడు పిల్లలందరూ ఒకేలా ఉంటారు. వారి అలవాట్లు, ప్రవర్తన వంటివన్నీ తన చుట్టూ ఉన్నవారి నుంచి చూసి క్రమేపీ నేర్చుకుంటారు. దీన్ని సరిచేయాలంటే ముందుగా తల్లిదండ్రుల ప్రవర్తనలో మార్పు రావాలి. చిన్నారుల ఎదుట ఆలుమగలు ఒకరినొకరు చులకన చేసుకుంటూ, అవమానించుకుంటూ మాట్లాడుకోకూడదు. ఎందుకంటే పిల్లలు వాటినే అలవాటు చేసుకుంటారు.

మాటతీరు ముఖ్యం...

పిల్లలు తమకంటే వయసులో పెద్దవారిని హేళన చేస్తున్నా... వారితో మితిమీరి ప్రవర్తిస్తున్నా చూసీ చూడనట్లు ఉండొద్దు. అలానే అమ్మ తరఫునో, నాన్న వైపో ఉండి... మరొకరిని తక్కువ చేసి మాట్లాడుతుంటే మురిసిపోవద్దు. తప్పని ఖండించండి. అలానే ఎదుటివారిని పిలిచే తీరు, సమాధానం చెప్పే విధానంలో మన్నింపు ఉండేలా చూడండి. కుటుంబ సభ్యులు కూడా... ఒకరికొకరు మర్యాద ఇచ్చిపుచ్చుకుంటే చాలు. ఆ పద్ధతినే అనుసరిస్తారు వారు.

మర్యాద నేర్పండి...

పెద్దవాళ్లకు పిల్లలు అద్దాల్లాంటి వారు. వారెలా ఉంటే చిన్నారులు దాన్ని ప్రతిఫలించేలా కనిపిస్తారు. ఇంట్లో పిల్లలెదుట బయటివారిని లేదా స్నేహితుల గురించి అవహేళనగా మాట్లాడకూడదు. ఇది ఆ చిన్నారుల మనసులో నాటుకుంటుంది. క్రమంగా వారు కూడా అలాగే మాట్లాడటం మొదలుపెడతారు. అందుకే ముందు మీరు ఆదర్శంగా ఉండండి. ఇంటికి ఎవరైనా వస్తే.. వారితో మర్యాదగా ప్రవర్తించండి. ఇతరులతో మాట్లాడేటప్పుడు... సరళమైన భాషను వాడండి.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.