తెలుగమ్మాయిల.. ర్యాప్ రెపలు

వేగంలో సంగీతంతోపాటు సాహిత్యమూ పోటీ పడటమే ర్యాప్‌ ప్రత్యేకత. అందుకే ప్రపంచవ్యాప్తంగా యువతను ఆకట్టుకుంటోన్న మ్యూజిక్‌ ట్రెండ్స్‌లో ఇదీ ఒకటయ్యింది. తెలుగులోనూ వచ్చింది కానీ ఇప్పటిదాకా అది అబ్బాయిల అడ్డానే! ఇక్కడా కాలు పెట్టి దూసుకెళ్తూ... మేమెందులోనూ తీసిపోమంటున్నారు అమ్మాయిలు. ఈ ఇద్దరినీ చూస్తే మీరూ అదే మాట అంటారు.

ఆ మెప్పు కోసం... - ఇషితా సూర్యవన్షి

ఓ వేదికపై హైదరాబాద్‌ అమ్మాయిలపై నేను పాడిన ర్యాప్‌కి.. ‘షేర్నీ.. సూపర్‌’ అంటూ ప్రేక్షకులిచ్చిన పోత్సాహాన్ని మర్చిపోలేను. నాకు నేను పెట్టుకున్న పేరిది. పులి అని అర్థం. మాది హైదరాబాద్‌. నాన్న శంకర్‌ ప్రైవేటు ఉద్యోగి. అమ్మ అంబిక గృహిణి. నాకో అన్నయ్య, తమ్ముడు. చిన్నప్పుడు ఒకమ్మాయి పాట విని నాన్న మెచ్చుకున్నారు. నేనూ ఆ మెప్పు పొందాలనుకుని.. విన్న ప్రతి పాటనీ నేర్చుకునేదాన్ని. శంకర్‌ మహదేవన్‌ ‘మహా ప్రాణదీపం’ స్ఫూర్తితో తొమ్మిదో తరగతి నుంచే పాటలు రాసి, పాడటం మొదలుపెట్టా. బహుమతులూ గెల్చుకున్నా. ఎంబీఏ చేసి ఓ రేడియోస్టేషన్‌లో ఆర్జేగా చేరా. ఓసారి రవీంద్రభారతిలో ఆగస్టు 15న మాషప్‌లో పాడే అవకాశం వచ్చింది. క్రమేపీ ర్యాప్‌తో బంధం ఏర్పడింది. 2019లో ప్రేమికుల దినోత్సవానికి చేసిన పాట అందరికీ నచ్చింది. తర్వాత హోలీపై చేసిన ప్రాజెక్ట్‌కూ పేరొచ్చింది. కొత్తగా ప్రయత్నించాలని సమ్మర్‌పై పాటకడితే యూట్యూబ్‌లో ఏడు లక్షల మంది చూశారు. ‘వద్దురా భయ్యో.. పోరిల వెంటబడి హవులా అవ్వకురా’ అంటూ చేసిన దాన్ని లక్షమందికిపైగా చూశారు. ర్యాపర్‌ జోతో పరిచయం నైపుణ్యాలను పెంచింది. మేం కలిసి చేసిన ‘ఆడపులి’ హిట్‌ అయ్యింది. కరోనాపై చేసినదానికీ పేరొచ్చింది. సాహిత్యం నుంచి పాడటం వరకు అన్నీ నేనే. పదాలు తేలికగా, అందరికీ అర్థమయ్యేలా చూసుకోవడంతోపాటు తాజా ధోరణులు.. ముఖ్యంగా అమ్మాయిల విషయాలపై దృష్టిపెడతా. పాటగా తీసుకురావడం ఖర్చుతో కూడుకున్న పని. ఎవర్నైనా సాయం కోరినా లాభముండేది కాదు. అందుకే కెరియర్‌ కూడా నిలుపుకోవాలని లక్ష్యంగా పెట్టుకున్నా. ఓ ప్రైవేటు సంస్థలో హెచ్‌ఆర్‌ మేనేజర్‌గా పని చేస్తున్నా. నా జీతంతోనే ర్యాప్‌ ప్రాజెక్ట్‌లు చేస్తున్నా. ‘షేర్నీ ర్యాపర్‌ అఫిషియల్‌’ వెబ్‌సైట్‌ ప్రారంభించా. ఈ మధ్యే నేను పాడిన ‘అమ్మ ప్రేమకు దూరమైతి’ విడుదలైంది. ఇంకా రెండున్నాయి. సంగీత దర్శకుడు రోహిత్‌ గోపాలకృష్ణన్‌ చేసిన ‘ఓపెన్‌ వింగ్స్‌’ తెలుగులో నేనే పాడా.

అప్పుడు సక్సెస్‌ అయ్యా అనిపించింది

- వితికా శేరు

మాది భీమవరం. అమ్మ బాగా పాడేది. దాంతో నాకూ ఆసక్తి ఏర్పడింది. కానీ నోరు తెరిస్తే ఇంట్లో ఆటపట్టించేవారు. దాంతో ధైర్యం చేయలేకపోయా. బాలనటిగా సినీ రంగంలోకి అడుగుపెట్టా. తెలుగుతోపాటు తమిళ, కన్నడ భాషల్లోనూ నటించా. తర్వాత వరుణ్‌సందేశ్‌తో పెళ్లికావడంతో అమెరికా వెళ్లా. ర్యాపర్‌ నోయల్‌ ఫ్యామిలీ ఫ్రెండ్‌. ఓసారి ర్యాప్‌ పాడాలన్న నా ఆలోచనను తనకు చెప్పా. ‘దిస్‌ ఈజ్‌ మీ’ పాటను తనే రాసి, బాణీ కట్టాడు. వేగంగా సాహిత్యాన్ని పలకడానికి వారం రోజులు పట్టింది. మొదట ఒత్తిడికి గురైనా, బాగా పాడగలిగా. సోషల్‌ మీడియాలో పెడితే తొమ్మిది లక్షల మంది చూశారు. తెలిసిన వాళ్లు ‘ర్యాప్‌ పాడావా?’ అంటూ షాక్‌ అయ్యారు! వాళ్ల ప్రశంసలు నాలో ధైర్యాన్ని నింపాయి.

గత ఏడాది మహిళా శక్తిని తెలియజేసే ‘సూపర్‌ విమెన్‌’ ర్యాప్‌ కోసం నటించా. ఇదీ పెద్ద హిట్‌ అయ్యింది. పాడింది నేను కాకపోయినా.. సహజంగా కనిపించాలంటే నేనూ పాడగలగాలి. అందుకే వారానికిపైగా సాధన చేసి మరీ నేర్చుకున్నా. ఈ వీడియోను ఎనిమిది లక్షల మంది చూశారు. ఈ ఏడాది మార్చిలో ఐపీఎల్‌ వాళ్ల ప్రాజెక్టులో తెలుగు ర్యాప్‌ పాడమన్నపుడు నమ్మలేకపోయా. ఇన్‌స్టాలో నాకు ఎనిమిది లక్షలకుపైగా ఫాలోవర్లున్నారు. అమెరికా నుంచి తిరిగొచ్చాక మహిళల కోసం యూట్యూబ్‌ ఛానెల్‌ ప్రారంభించా. కొద్దికాలంలోనే అది 5.5 లక్షలమందికి చేరువైంది. వారానికొకటి చొప్పున, ఎప్పటికప్పుడు కొత్త, తాజా అంశాలుండేలా చూసుకుంటా. కొన్ని వీడియోలను 56 లక్షలమందికి పైగా చూశారు. ఫ్యాషన్‌ డిజైనింగ్‌ గురించీ సలహాలిస్తుంటా. ఇవన్నీ నేను ఐపీఎల్‌ ప్రాజెక్టుకు ఎంపికయ్యేలా చేశాయి. నోయల్‌ సాయంతోనే సాధన చేసి, వారం రోజుల్లోపే వాళ్లకి పాడి పంపించా. మొదటిసారి పాడినపుడు నాకే సంతృప్తినివ్వలేదు. మళ్లీ రికార్డ్‌ చేశాం. జాతీయ స్థాయిలో నా గొంతు వినపడుతుంటే చాలా ఆనందమేసింది. ఈ వీడియోని ఇప్పటికి 14 లక్షల మంది చూశారు. నా ర్యాప్‌ను నేర్చుకుని మరీ వరుణ్‌ స్నేహితుల ముందు పాడటం చూసినపుడు సక్సెస్‌ అయ్యాననిపించింది. తన ప్రోత్సాహం, ప్రేమే నన్ను ఈ రంగంలో విజయవంతంగా నడిపిస్తున్నాయి.