Updated : 22/02/2022 06:02 IST

శెభాష్‌.. షబానా!

బానా షేక్‌కు అప్పుడు నాలుగేళ్లు. చంకలో ఏడాది తమ్ముడు. ముంబయి ఆసుపత్రిలో వదిలేసి వెళ్లారెవరో. దారి తెలియక చూస్తున్న వాళ్లిద్దరినీ ఓ అనాథాశ్రమం వాళ్లు చేరదీశారు. మొదట్లో భయం భయంగా ముడుచుకుపోయే ఆ అమ్మాయి.. నెమ్మదిగా తనని తాను మార్చుకుంది. ఇప్పుడు వైద్య విద్యలో చేరబోతోంది. అతికష్టమైన పరీక్షల్లో నీట్‌ కూడా ఒకటి. దానిలో శిక్షణ లేకుండానే అర్హత సాధించింది. ‘అమ్మానాన్న, బంధువులెవరో నాకు గుర్తులేదు. మమ్మల్ని వదిలేసిన వాళ్లని తెలుసుకోవాలన్న కోరికా లేదు. మొదట్లో భయపడేదాన్ని. గతాన్ని తలచుకుని బాధ పడటం కంటే భవిష్యత్‌ కోసం పోరాడాలని చిన్నప్పుడే నిర్ణయించుకున్నా. తలరాతను మార్చుకోవడం నా చేతిలోనే ఉందనీ  అర్థమైంది. అందుకే కష్టపడి చదివేదాన్ని. డాక్టర్‌ అవ్వాలన్నది నా కల. అనాథాశ్రమం యాజమాన్యమూ ప్రోత్సహించారు. అవసరమైన మెటీరియల్‌ను సంపాదించుకుని ఆశ్రమంలోనే సాధన మొదలుపెట్టా. రెండేళ్ల క్రితమూ రాశా. అర్హత సాధించినా ఫలితం తృప్తినివ్వలేదు. మళ్లీ ప్రణాళిక వేసుకుని చదివి, రాశా. రోజుకు 8-10 గంటలు చదివేదాన్ని. మంచి కళాశాలలో సీటునూ సాధించా. నా కల దిశగా మొదటి అడుగు వేశా. నన్ను చూసి అనాథాశ్రమం సభ్యులతోపాటు తోటి పిల్లలూ గర్వపడుతున్నారు’ అంటోంది షబానా.

తనకు సంగీతమన్నా ఇష్టమే. కానీ వైద్యవృత్తికే తొలి ప్రాధాన్యమంటోంది. గైనకాలజిస్ట్‌ అవ్వాలనుందట. ఇప్పుడు తనపై ప్రశంసలు కురుస్తున్నాయి. అన్నీ ఉన్నా చిన్న వైఫల్యానికే కుంగిపోయే వారే ఎక్కువ. కానీ ఈ అమ్మాయి పరిస్థితులకు తల వంచాలనుకోలేదు. తన కలల్ని సాధించడానికి పోరాడుతోంది. చిన్న చిన్న వాటికే భయపడి వెనకడుగేసే వాళ్లందరికీ షబానా స్ఫూర్తే కదూ!


Advertisement

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని