దేవతామూర్తులకు కొత్త రూపు!

నిత్యపూజలందుకునే దేవతల ఫొటోలు, బొమ్మలు కొన్నాళ్లకు పాతబడతాయి. వాటిని ఏం చేయాలో అర్థం కాదు. కొందరు పడేస్తారు. కానీ చాలా మంది పారెయ్యలేరు. ఇటువంటి వాటిని రీసైకిల్‌ చేసి పేద చిన్నారులకు బొమ్మలు, పక్షులకు ఆవాసాలు, కళాకృతులుగా మారుస్తోంది తృప్తి. దానికోసం ఓ స్వచ్ఛంద సంస్థనే స్థాపించి ఎంతోమంది మహిళలకు ఉపాధినీ కల్పిస్తోంది.

2019లో మహారాష్ట్రలోని నాసిక్‌లో వరద బీభత్సం సృష్టించాయి. ఆ తర్వాత నదీతీరంలో పరిస్థితిని చూడటానికి వెళ్లిన తృప్తిని ఓ సంఘటన ఆశ్చర్యపరిచింది. ఓ వ్యక్తి కొన్ని దేవతామూర్తులను నదిలో కలపబోతున్నాడు. అది చూసి తృప్తి వాటిని అడిగి తీసుకొంది. వృత్తిరీత్యా న్యాయవాదైన ఈమె, ఇలా పాత దేవతామూర్తులతో పర్యావరణ హితంగా ఏదైనా చేయాలనుకుంది. అలా ప్రారంభించిదే ‘సంపూర్ణం సేవా ఫౌండేషన్‌’. తన ఆలోచనను సామాజిక మాధ్యమాల్లో పంచుకుంది. ఎవరి దగ్గరైనా దేవతల పాత బొమ్మలు, ఫొటోలుంటే తనకిమ్మని కోరింది. వాటిని రీసైకిల్‌ చేసి ఉపయోగపడేలా చేస్తానంటూ తన ఆలోచనను చెప్పడంతో వందల బొమ్మలు వెతుక్కొంటూ రావడం మొదలు పెట్టాయి.

పలు రకాలుగా..

తన వద్దకు చేరుకొన్న ఫొటోల ఫ్రేములను మెటల్‌, గాజు, చెక్క తదితర రకాలుగా విభజిస్తుంది. ఆ ఫ్రేములతో పక్షుల గూళ్లను తయారు చేయడం ప్రారంభించా అని వివరిస్తుంది తృప్తి. ‘లోహంతో చేసినవైతే కరిగించి అలంకరణ వస్తువులుగా మారుస్తున్నాం. వినాయక విగ్రహాల నిమజ్జనం, ఇతరత్రా సమయాల్లో చిన్న చిన్న విగ్రహాలను తీసుకొంటాం. ప్లాస్టర్‌ ఆఫ్‌ ప్యారిస్‌, మట్టి వంటివి విడదీసి పొడిగా చేస్తాం. దీనికి సిమెంట్‌ కలిపి పిల్లలకు బొమ్మలు తయారు చేస్తున్నాం. వీటిని అనాథాశ్రమాలు, మురికి వాడలకు వెళ్లి అక్కడి చిన్నారులకు అందిస్తున్నాం. ఇంకా వీటితో గృహాలంకరణకు ఉపయోగించే హస్తకళాకృతుల తయారీలో పెద్ద సంఖ్యలో మహిళలకు శిక్షణ ఇస్తున్నాం. వారితోనే బొమ్మలు తయారు చేయించి ఉపాధినీ కల్పిస్తున్నా. అలా ఇప్పటివరకూ 50 వేల ఫ్రేములు, విగ్రహాలను రీసైకిల్‌ చేశాం. 5 వేల మందికిపైగా పిల్లలకు బొమ్మలను అందించాం. భక్తుల మనోభావాలు దెబ్బతినకుండా దేవతా మూర్తులను పూజించిన తర్వాతే రీసైకిల్‌ చేయడం ప్రారంభిస్తా’ అంటోన్న తృప్తి ఈ సేవ కోసం ప్రత్యేకంగా ఒక యూనిట్‌నే ప్రారంభించింది. భవిష్యత్తులో మరిన్ని రకాల ఆట, గృహాలంకరణ సామాగ్రిని తయారు చేస్తాం అంటోంది.