Updated : 03/10/2022 08:59 IST

పోస్టు పెడితే.. కోట్లు రాలాల్సిందే!

సామాజిక మాధ్యమం.. మన ఆనందాలు, ఆలోచనలు పంచుకునే వేదిక. మరి వీళ్లకో..! ఒక్క పోస్టు పెడితే చాలు.. లక్షల మంది అభిమానుల్నే కాదు.. రూ.కోట్లు సంపాదించుకునే మార్గం. అలా భారీ మొత్తాల్ని సంపాదించుకుంటున్న కొందరు వీళ్లు..


పిన్న వయసు బిలియనీర్‌

కైలీ జెన్నర్‌

ఇన్‌స్టా ద్వారా భారీ మొత్తాన్ని సంపాదిస్తున్న అమ్మాయిల్లో ఈ ఏడు కైలీదే అగ్రస్థానం. ఈ అమెరికన్‌.. పదిహేనేళ్లకే మోడలైంది. ఆపై రియాలిటీ షోలు, సినిమాలతో పేరు తెచ్చుకోంది. వస్త్రశ్రేణి, కైల్‌ పేరుతో కాస్మొటిక్స్‌తోపాటు అనేక వ్యాపారాలున్నాయి. స్వశక్తితో ఎదిగిన పిన్న వయసు బిలియనీర్‌గా 2019-ఫోర్బ్స్‌లో, 2020లో స్వశక్తితో ఎదిగిన 100-శ్రీమంతుల జాబితాలో నిలిచింది. దాతృత్వంలోనూ ముందుంటూ.. గ్రహణ మొర్రి, న్యూట్రిషన్‌ లోపం ఉన్న పిల్లలకు కోట్లరూపాయలు సాయం చేస్తోంది. 25 ఏళ్ల కైలీ ఖాతాను 37 కోట్లమంది అనుసరిస్తున్నారు. ఒక పోస్టుకు రూ.15 కోట్లు తీసుకుంటుంది.


35 కోట్ల ఫాలోయర్లు..

‘సెలెనా గోమెజ్

పుట్టింది టెక్సాస్‌. బాలనటిగా సినీ పరిశ్రమలోకి అడుగుపెట్టింది. గాయని కూడా. మొదట్లో బ్యాండ్‌తో కలిసి చేసినా తర్వాత సోలోగా ఎక్కువగా గుర్తింపు సంపాదించుకుంది. తన ఆల్బమ్స్‌ బిల్‌బోర్డ్‌ హాట్‌ 100 జాబితాలో తొలి పదిలోనే ఉండేవి. ఇన్‌స్టాలో 10కోట్ల ఫాలోయర్లను సంపాదించిన తొలి అమ్మాయి. పిల్లల్లో అనారోగ్యం, తాగునీరు, పరిశుభ్రతలపై అవగాహన కార్యక్రమాలు నిర్వహిస్తోంది. 17 ఏళ్లకే యునిసెఫ్‌ అంబాసిడర్‌. ఎన్నో వ్యాపార సంస్థలకు ప్రచారకర్త. 30ఏళ్ల సెలెనా.. ‘సెలెనా గ్రేస్‌’ ‘రేర్‌ బ్యూటీ’ అనే లగ్జరీ గూడ్స్‌ సంస్థలనీ ప్రారంభించింది. ఇన్‌స్టాలో 34.8 కోట్ల ఫాలోయర్లున్న తను ఒక్కో పోస్టుకు రూ.14 కోట్లు తీసుకుంటుంది.


ఖాతా విలువ 37 కోట్లు

- ఆష్నా ష్రాఫ్‌

దేశీ ఇన్‌ఫ్లుయెన్సర్లలో సాధారణ అమ్మాయిల్లో ఎక్కువ మొత్తం ఆదాయం తనదే. ఆష్నా చిన్నతనంలో ఎవరితోనూ కలిసేదికాదు. దాన్ని పోగొట్టాలని వాళ్లమ్మ మోడలింగ్‌ వైపు ప్రోత్సహించింది. ఇంటీరియర్‌ డిజైనింగ్‌ చదివిన తను 2013లో ఆన్‌లైన్‌ బ్యూటీ సంస్థ ‘ద స్నాబ్‌ షాప్‌’, ‘ద స్నాబ్‌ జర్నల్‌’ యూట్యూబ్‌ ఛానెల్‌లను ప్రారంభించింది. తన ఫ్యాషన్‌, మేకప్‌ చిట్కాలు యువతని ఆకట్టుకుంటాయి. నైకా, మెబిలిన్‌, ఎస్‌టీ వంటి పెద్ద సంస్థలతో పనిచేసింది. ఆ తర్వాత ఇన్‌స్టాకు మారింది. అనుసరించే వారి సంఖ్య పదిలక్షల్లోపే! కానీ ఎక్కువ మందిని ఆకర్షించడం, ఆకట్టుకునే పోస్ట్‌లు ఈమె ప్రత్యేకతలు.  పోస్ట్‌కు రూ.3 లక్షల వరకూ తీసుకునే 29 ఏళ్ల ఆష్నా ఖాతా విలువ రూ.37 కోట్లు.


దేశీ స్టార్లలో ఇన్‌స్టా నుంచి పెద్దమొత్తం అందుకుంటున్నది ప్రియాంకచోప్రా. 8.2 కోట్ల ఫాలోయర్లున్న ఈ గ్లోబల్‌ స్టార్‌ ఒక్కో పోస్టుకు రూ.3 కోట్లకుపైగా తీసుకుంటుంది.


గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని

ఆ ప్రమాదం.. వ్యాపారవేత్తను చేసింది

సినిమా, కాలక్షేపం, స్నేహితులతో ముచ్చట్లు.. సందర్భం ఏదైనా మనకు చిరుతిళ్లు ఉండాల్సిందే! వాటిని నిల్వ ఉంచడానికి వాడే రసాయనాలు, చక్కెరలు, రిఫైన్డ్‌ ఆయిల్స్‌.. అన్నీ అనారోగ్యకరమైనవే! చదువుతున్నప్పుడు కంటే స్వీయ అనుభవంతో ఈ విషయం మరింత అవగాహనకు వచ్చింది అపూర్వ గురురాజ్‌కు. దీంతో ఆరోగ్యకరమైన చిరుతిళ్లను ఉత్పత్తి చేస్తూ.. విదేశాలకూ ఎగుమతి చేసే స్థాయికి ఎదిగారు. ఆమెను వసుంధర పలకరించగా తన గురించి చెప్పుకొచ్చారిలా.. మాది బెంగళూరు. ఆరేళ్లన్నప్పుడు అమ్మను కోల్పోయా. సివిల్‌ ఇంజినీర్‌ అయిన నాన్న వ్యాపారవేత్త కూడా. నాకేమో ఫోరెన్సిక్‌ శాస్త్రవేత్త కావాలని.. నాన్నేమో ఇంజినీరింగ్‌ చేయాలని.. రెండూ కాక కెమిస్ట్రీ, జువాలజీ, న్యూట్రిషన్‌లున్న ట్రిపుల్‌ మేజర్‌ కోర్సును ఎంచుకున్నా. అది చదివేప్పుడే ఎంటీఆర్‌, పెప్సీ సంస్థల్లో ఇంటర్న్‌గా ఉత్పత్తుల్లో పోషకాల ప్రమాణాల గురించి తెలుసుకున్నా. భారతీయ ఆహారశైలిలో పోషకాలకే ప్రాధాన్యం. కానీ మనకు లభ్యమయ్యే ప్యాకేజ్డ్‌ ఆహారంలో 90శాతం పాశ్చాత్యుల జీవనశైలికి అనువైనవే. పైగా వీటి నిల్వకు వాడే రసాయనాలు ఆరోగ్యానికి చేటని ఫీల్డ్‌వర్క్‌లో గుర్తించా. ఆసక్తికర విషయమేమిటంటే మన ధాన్యాలను ఎగుమతి చేసుకొని మనకే ఇలా అమ్ముతుండటం! అపోలో ఆస్పత్రిలో ఆంకాలజీ న్యూట్రిషన్‌ విభాగంలో కొన్నాళ్లు పనిచేసినపుడు వీటిపై మరింత స్పష్టత వచ్చింది.

తరువాయి