Updated : 22/12/2021 04:59 IST

ఆమే.. ఆసరా

ఆడపిల్ల భారం అనుకునే రోజులకు కాలం చెల్లిపోయింది, ఆమె ఆసరాగా నిలుస్తుందంటూ ప్రశంసలు కురిపిస్తున్నారు. అవును.. కూతురు తల్లికి సాయమే కాదు, ఇంటిల్లిపాదికీ తలలో నాలుకలా ఉంటుంది. అత్తగారింటికి వెళ్లినా పుట్టింటి మమకారాన్ని మర్చిపోలేని కూతుళ్ల గురించి మనోవిశ్లేషకులు ఏమంటున్నారంటే...

బాధ్యతకు ఇంకో పేరు కూతురు. తల్లికి కూరలు తరిగిస్తుంది. తండ్రికి దుస్తులు సిద్ధం చేస్తుంది. సోదరుడి వస్తువేదో వెతికి పెడుతుంది. చెల్లెలితో హోంవర్క్‌ చేయిస్తుంది. అందర్నీ కలుపుకొని సరదాగా సినిమాకో షికారుకో పదమంటుంది. కూతురి సందడి, సరాగాలు ఆత్మీయతను పెంచి ఆందోళన, డిప్రెషన్‌లను దరికి రానీయవు.

తన పనులు తాను చేసుకుంటూనే అందరి బాగోగులూ ఆలోచిస్తుంది.  ఆదరాభిమానాలు పంచుతూ, పొందుతూ ఆశయాల సాధనకు కృషి చేస్తుంది. కుటుంబసభ్యులు తమ నైపుణ్యాలను సమర్థంగా వినియోగించేలా చూస్తుంది.

అందాకా తన బాధను తల్లితో చెప్పుకున్న కూతురు యుక్తవయసు రాగానే తల్లి కష్టసుఖాల గురించి ఆరా తీస్తుంది. పరిష్కార మార్గాల గురించి చర్చిస్తుంది.

కుటుంబసభ్యుల మధ్య వచ్చే పేచీల్లో సయోధ్య కుదర్చడంలో కూతుళ్లదే పైచేయి. అందరితో కలివిడిగా ఉంటూ, కబుర్లు చెబుతూ ఇటుకగోడల ఇంటిని స్వీట్‌హోంగా మారుస్తుంది.

తల్లి ఎవరిమీది కోపమో తన మీద చూపినా ఎదురుచెప్పక, ఇంటి పరిస్థితిని, అమ్మ మనస్థితినీ అర్థంచేసుకుని మసలుకునేది కూతురే. మంచి, చెడు.. అన్నిటి నుంచీ ఎన్నో నేర్చుకుని రాటుతేలే ఇవాళ్టి కూతుళ్లే రేపటి ఆదర్శ కోడళ్లు.


గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని