Breaking | Feedback | ePratibha | E-PAPER | Pratibha

ఇలా చేస్తే.. రోజూ ప్రత్యేకమే!

భార్యాభర్తల మధ్య ఎప్పుడైనా మాట తేడా వస్తే రావచ్చు గాక. అయినా.. వాళ్లే ఒకరికొకరు తోడూనీడా. ఆ ప్రేమ ఇంకిపోకుండా జీవనపర్యంతం జీవనదిలా ప్రవహించాలంటే ఈ సూత్రాలు పాటించండి..

Published : 07 Feb 2022 00:12 IST

* గాలి, నీరు, ఆహారాల్లాగే ప్రేమ కూడా కనీస అవసరం. అనుక్షణం మనల్ని ఇష్టపడే వ్యక్తి ఉన్నారనుకుంటే అదే పెద్ద సంతోషం, సంతృప్తి. భార్య వంటపనులతో హడావుడిగా ఉందిలెమ్మని భర్త.. అతను టీవీ చూస్తూ లేదా బయటికెళ్లే తొందరలో ఉన్నాడని ఆమె ఒకర్నొకరు గంటల తరబడి పలకరించుకోకపోతే ఒకే ఇంట్లో ఉన్నా దగ్గరితనం కోల్పోతారు. ఒకరి ఉనికిని ఒకరు గుర్తించనట్టుగా, పట్టనట్టుగా ఉంటే అది ఒకరకంగా ప్రేమరాహిత్యమే. అందుకు పైకి ఆరోపణలూ నిందలూ చేయకపోవచ్చు. కానీ ఆ బంధం ఆత్మీయత తగ్గి ఉప్పు లేని కూరలా ఉంటుంది.

* ఒకరి ఇష్టాల్ని మరొకరు గుర్తుంచుకుని గౌరవించడం వల్ల ఇద్దరి మధ్యా ప్రేమానురాగాలు మరింత పెరుగుతాయి. ‘దానిమ్మకాయల సీజన్‌ కాకున్నా నీకిష్టమని వెతికి తెచ్చానోయ్‌’ అని భర్త అంటే అది ఖరీదైంది కాకున్నా ఆ ప్రేమకు కరిగిపోతుంది. ‘బిగ్గరగా అరిస్తే నాన్నకు నచ్చదని తెలీదా? చిన్నగా మాట్లాడు తల్లీ’ అని కూతురితో అంటే తన ఇష్టాయిష్టాలను గౌరవించే భార్యామణి మీద అభిమానం పెరిగిపోతుందతడికి.

* పుట్టినరోజు, పెళ్లిరోజు లాంటివి ఏడాదికి ఒక్కసారే వస్తాయి. కానీ మనసుంటే ప్రతిరోజూ ప్రత్యేకమైనదే. చిన్న చిన్న కానుకలు ఇవ్వడానికీ లేదా అవతలి వ్యక్తిని ఆనందింపచేసేలా సినిమాలూ, షికార్లు ప్లాన్‌ చేయడానికీ ఆ రోజుల కోసం పడిగాపులు పడనవసరం లేదు. సందర్భాన్ని కల్పించుకోవడం మీ చేతిలోనే ఉంటుంది. భార్యాభర్తలు అప్పుడప్పుడూ కానుకలు ఇచ్చిపుచ్చుకుంటే ఆనందాలూ, అనుభూతులూ సొంతమవుతాయి.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.