రూ.వేల కోట్లు ఇచ్చేస్తోంది!
ఆవిడది ప్రపంచ వ్యాప్తంగా అత్యంత సంపన్న మహిళల్లో 30వ స్థానంగా ఫోర్బ్స్‌ ప్రకటించింది. అమెరికాలో అత్యంత ధనికుల్లో మూడో స్థానం. తన ఆస్తిలో సగం దాన ధర్మాలకు కేటాయిస్తానని
ఆవిడది ప్రపంచ వ్యాప్తంగా అత్యంత సంపన్న మహిళల్లో 30వ స్థానంగా ఫోర్బ్స్‌ ప్రకటించింది. అమెరికాలో అత్యంత ధనికుల్లో మూడో స్థానం. తన ఆస్తిలో సగం దాన ధర్మాలకు కేటాయిస్తానని ప్రకటించి తు.చ. తప్పకుండా పాటిస్తున్న పరోపకారి మెకంజీ స్కాట్‌. తాజాగా ఓ సేవాసంస్థకు రూ.438 కోట్లు విరాళమిచ్చి దాతృత్వానికి కొత్త అర్థం చెబుతున్నారీ వితరణశీలి...
అమెరికాలోని శాన్‌ఫ్రాన్సిస్కోలో ఓ మధ్యతరగతి కుటుంబంలో పుట్టిన మెకంజీ, ప్రిన్స్‌టన్‌ యూనివర్శిటీలో బ్యాచిలర్స్‌ డిగ్రీ చేశారు. ఓ ప్రైవేటు సంస్థలో జెఫ్‌ బెజోస్‌కు అసిస్టెంట్‌గా పని చేస్తూ ఆయనతో ప్రేమలో పడ్డారు. 1993లో వీళ్లు దంపతులయ్యారు. తర్వాత బెజోస్‌ స్థాపించిన అమెజాన్‌ సంస్థలో మెకంజీ కీలక బాధ్యతలను చేపట్టారు. ఈ జంటకు ముగ్గురు మగపిల్లలు. చైనాకు చెందిన ఓ అమ్మాయినీ దత్తత తీసుకొన్నారు. 25 ఏళ్ల వైవాహిక జీవితం తర్వాత ఈ దంపతులు 2019లో విడిపోయారు. ఆ తర్వాత రెండేళ్లకు మెకంజీ ఓ హైస్కూల్‌ కెమిస్ట్రీ టీచర్‌ డేన్‌ జెవెట్‌ను వివాహమాడారు. అమెజాన్‌ సంస్థలో ప్రస్తుతం ఈమెకు 4 శాతం వాటా ఉంది. ఈవిడ ఆస్తులు సుమారు మూడు లక్షల కోట్ల రూపాయల పైచిలుకే!
సేవాపథం..
చిన్నప్పటి నుంచీ అవసరంలో ఉన్నవారికి చేయూతనివ్వడం మెకంజీకి ఇష్టం. ఆ అలవాటు ఆమెతోపాటే ఎదిగింది. ఎన్నో స్వచ్ఛంద సంస్థలకు విరాళాలందిస్తూ వెన్ను దన్నుగా నిలుస్తున్నారీమె. మహిళలపై దురాగతాలకు వ్యతిరేకంగా పోరాడటం కోసం ఓ స్వచ్ఛంద సంస్థనూ స్థాపించారు. 2020లో జాతి, లింగ సమానత్వం, ప్రజాస్వామ్యం, వాతావరణ మార్పులు, పేదలకు ఆవాసం వంటి అంశాలపై కృషి చేస్తున్న వెయ్యికి పైగా స్వచ్ఛంద సంస్థలకు దాదాపు 96 వేల కోట్ల రూపాయలు విరాళంగా ఇచ్చారీమె. తన ఆస్తిలో సగం దానధర్మాలకు వినియోగిస్తానని ప్రకటించారు. గతేడాది మరికొన్ని సంస్థలకు రూ.21,506 కోట్లు విరాళంగా అందించారు. తాజాగా నిరాశ్రయులకు నీడకల్పించే ఓ సంస్థకు రూ.438 కోట్లు విలువ చేసే తన ఇళ్లను ఇచ్చేసి దాతృత్వాన్ని మరోసారి చాటుకున్నారు. గతేడాది ప్రపంచంలోనే అత్యంత శక్తిమంతమైన మహిళగా ఫోర్బ్స్‌ జాబితాలో నిలిచిన మెకంజీ రచయిత్రి కూడా. తన తొలి నవలకు ‘అమెరికన్‌ బుక్‌ అవార్డు’ అందుకున్నారు. తనకెంతో ఇచ్చిన సమాజానికి వేల కోట్ల రూపాయలు తిరిగిచ్చేస్తోన్న 52 ఏళ్ల మెకంజీ స్కాట్‌ మహిళాలోకానికి గర్వకారణం కదూ!
Trending
గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
