ఆఫీసులో ఆవేశాలొద్దు...

చదువులైపోయి ఇప్పుడిప్పుడే ఉద్యోగంలో చేరారా?! ఎవరో ఒకరిమీద ఏదో సందర్భంలో కోపం వస్తోందా? ఒద్దొద్దు! చప్పున చల్లబడండి. కుటుంబసభ్యుల మీదో, స్నేహితుల మీదో చూపినట్లు ఆ ఉద్వేగాలూ ఉద్రేకాలను ఆఫీసులో చూపించేశారో.. వెంటనే ముద్రలేసేస్తారు. ప్రత్యక్షంగానో పరోక్షంగానో అవమానిస్తారు. ఇంక్రిమెంట్లకు కత్తెర్లు పడతాయి. ఇంకా పరాకాష్ఠకు వెళ్తే ఉద్యోగాలే ఊడతాయి. అలాంటి పరిస్థితి రాకుండా ఉండాలంటే.. పనిచేసే చోట శాంతం, సహనం ఉండాల్సిందే. అదేమీ కష్టం కాదు, ఈ సూత్రాలు పాటిస్తే సరి...

* పై అధికారి మీదో, సహోద్యోగి మీదో కోపమొస్తే గబుక్కున వెళ్లగక్కేయక దీర్ఘంగా శ్వాస తీసుకోండి. వందతో మొదలుపెట్టి వెనక్కి లెక్కబెట్టండి. ఉద్వేగం తగ్గగానే ఆపిన పని కొనసాగించండి. ఈలోపు పరిస్థితి సర్దుకుంటుంది.

* మీ కోపానికి కారణమైన వ్యక్తి, సంఘటన గురించి మీకు బాగా నమ్మకస్థులైన సహోద్యోగితో పంచుకోండి. ఏదైనా పరిష్కారం సూచిస్తారు. లేకున్నా ఔట్‌లెట్‌గా పనిచేసి ఆవేశం తీరుతుంది. ఎవరో ఒకరి ముందు బయటపడ్డారో అది చిలవలు పలవలై వ్యాపిస్తుందని మర్చిపోవద్దు.

* కాసేపు ఆ ప్రదేశం వదిలి వేరే విభాగానికో, క్యాంటిన్‌కో వెళ్లి రండి. ఇటు మీ కోపం చల్లారుతుంది, అటు పరిస్థితీ చక్కబడుతుంది. వాతావరణంలో మార్పుకు ఆ మాత్రం ఎడం ఉండాలి.

* మీకు ఆ క్షణంలో కలిగిన ఆవేశమంతా మీ పర్సనల్‌ మెయిల్లో లేదా ఫోన్లో నెచ్చెలితో చెబుతున్నట్లుగా రాయండి. దాన్ని ఎవరికీ పంపించొద్దు, షేర్‌ చేయొద్దు. ఆవేశమంతా అక్షరాల్లోకి తర్జుమా అయితే కోపం చల్లారుతుంది. దాన్ని తర్వాతెప్పుడో చదివితే మీకే నవ్వొస్తుంది.

* కోపావేశాల్ని మర్చిపోవడానికి ఓ ఐదు నిమిషాలు మీకిష్టమైన వెబ్‌సైట్‌లోకి వెళ్లండి. వార్తల హెడ్‌లైన్లు చూడండి. వ్యంగ్యోక్తులో ట్విట్టర్‌ ఖాతానో చూడండి. లేదంటే ఫేస్‌బుక్‌, వాట్సప్‌లు చూడండి.

* పెళ్లయితే భాగస్వామికి లేదా ఆత్మీయ బంధుమిత్రులెవరికైనా ఫోన్‌ చేసి మనసు గాయపడిందని మనసు విప్పి చెప్పండి. వాళ్లు చూపే ప్రేమ, అనురాగం సేదతీరుస్తాయి. తాటాకు మంట లాంటి కోపావేశం మీద నీళ్లు చిలకరించినట్లవుతుంది.

* అప్పటికీ మీ కోపం చల్లారలేదంటే మీకు ఎవరి వల్ల ఎందుకు అవమానం జరిగిందో ఉన్నతాధికారి దృష్టికి తీసికెళ్లండి. చెప్పే ధోరణి శాంతంగానే ఉండాలని మర్చిపోవద్దు.