పుస్తకాలు చదవడం వల్ల కేవలం జ్ఞానం మాత్రమే కాదు. మనసుకు ప్రశాంతత లభిస్తుంది. మనతో మనం గడిపామన్న సంగతి తెలుస్తుంది. అందుకు కూర్చునే చోటు కూడా అనువుగానూ, ఆహ్లాదంగానూ ఉండాలి. వీలైతే ఓ గది... లేదంటే గదిలోనే కొంత ప్రాంతాన్ని అందంగా ముస్తాబు చేసి చూడండి.
కుర్చీ అనుకూలంగా... కూర్చోవడానికి అనుగుణంగా ఉండే కుర్చీ వేసుకోవాలి. లేదంటే చదువుతున్నంతసేపూ అసౌకర్యానికి లోనవుతారు. అలాగే లేత రంగులో ఉండే కుర్చీని ఎంచుకోండి. స్ట్రెచింగ్‌ చైర్‌ అయితే మరీ మంచిది. మధ్యమధ్యలో కాస్త అటూ ఇటూ శరీరాన్ని కదిలించవచ్చు.
కిటికీ పక్కనే... కుదిరితే ఓ బల్ల, కుర్చీ ఉంటే అనువుగా ఉంటుంది. ఈ రెండూ కిటికీ పక్కనే ఉంటే మరింత బాగుంటుంది. నులివెచ్చని ఉషోదయాలు, చల్లచల్లని సాయంత్రాలు కిటికీ పక్కన కూర్చొని టీ తాగుతూ పుస్తకం చదువుతూ ఉంటే ఎంత బావుంటుందో కదా.. అయితే ఇక్కడ వేసుకునే కుర్చీ మృదువుగా, సౌకర్యంగా ఉండేలా చూసుకోండి.  
ఫుట్‌ స్టూల్‌... చదవడం మొదలుపెడితే గంటలు నిమిషాల్లా దొర్లిపోవడం ఖాయం. ఒకేచోట చాలాసేపు కూర్చొంటే కాళ్లకు వాపు వస్తుంది. అందుకే ఓ ఫుట్‌ స్టూల్‌ కూడా కావాలి. దీన్ని కుర్చీకి సరిపోయేలా చూసుకోండి.
సైడ్‌ టేబుల్‌... పుస్తకాలు, నీళ్లసీసా, టీ కప్పు... ఇలా వీటన్నింటినీ పెట్టుకోవడానికి సైడ్‌ టేబుల్‌ ఉండాలి. దాని మీద ఆకర్షణీయమైన పూలకుండీ లేదా ల్యాంప్‌ పెడితే అందం, సౌకర్యం. మీకు ఇష్టమైన ఆహార పదార్థాలనూ దాని మీద పెట్టుకోవచ్చు
ల్యాంప్‌... వెలుతురు ఉంటే చదవడం శ్రమ కలిగించదు. రాత్రి పూట కూడా చదువుకోడానికి వీలుగా అందమైన, ప్రకాశవంతమైన ల్యాంప్‌లను ఏర్పాటు చేసుకోవాలి.