Breaking | Feedback | ePratibha | E-PAPER | Pratibha

ఇంట్లో నుంచి వెళ్లిపోతే... ఆస్తిలో హక్కు వస్తుందా?

మా నాన్న మద్యానికి బానిసై అమ్మను, నన్ను హింస పెడుతున్నాడు. ఇల్లు వదిలి వెళ్లిపోమని వేధిస్తున్నాడు. అమ్మకు చదువులేదు. ఏ పనీ చేయలేదు.

Published : 14 May 2021 00:23 IST

మా నాన్న మద్యానికి బానిసై అమ్మను, నన్ను హింస పెడుతున్నాడు. ఇల్లు వదిలి వెళ్లిపోమని వేధిస్తున్నాడు. అమ్మకు చదువులేదు. ఏ పనీ చేయలేదు. చదువు పూర్తయ్యాక ఉద్యోగం చేసి ఆమెను పోషించగలననే నమ్మకం నాకుంది. తనని తీసుకుని ఇంట్లో నుంచి వెళ్లిపోతే నాన్న ఆస్తిలో భాగం వస్తుందా? ఆ ఇంట్లో ఉండే హక్కు లభిస్తుందా?

- ఓ సోదరి, ఆళ్లగడ్డ

మీ పరిస్థితి బాధాకరం. అయినా ధైర్యాన్ని కోల్పోవద్దు. మీకు ఆస్తిలో వాటా కావాలంటే ముందు అది ఆయన స్వార్జితమా లేక పిత్రార్జితమా అన్నది తెలియాలి. పిత్రార్జితమైతే అందులో వాటా కోసం భాగస్వామ్య దావా వేయొచ్చు. స్వార్జితమైతే తనకు నచ్చిన వారికి రాసిచ్చే హక్కు ఆయనకి ఉంది. ముందు తన భర్త ఇంట్లోనుంచి వెళ్లిపోమంటూ శారీరకంగా, మానసికంగా వేధిస్తున్నాడని అమ్మతో గృహహింస చట్టం కింద ఫిర్యాదు చేయించండి. ప్రొటెక్షన్‌ అధికారి దాన్ని కోర్టుకి పంపిస్తారు. ఈ కేసు ఆధారంగా ప్రస్తుతం ఉన్న ఇంటిలో నివసించే హక్కుని కోరవచ్చు. మీరు మైనర్‌ అయితే మీ ఇద్దరి మెయింటెనెన్స్‌, మీ చదువు ఖర్చు, అమ్మ వైద్య అవసరాల నిమిత్తం భత్యం అడగొచ్చు. ఏక మొత్తంగానూ పరిహారాన్ని అడిగి తీసుకోవచ్చు. గృహహింస చట్టంలో విడాకుల ప్రసక్తి లేదు కాబట్టి ఒకవేళ మీ నాన్న ప్రభుత్వోద్యోగం చేస్తుంటే... పదవీవిరమణ సమయంలో ఆయనకి వచ్చే మొత్తంలో కొంత భాగాన్ని మీ ఇద్దరూ పరిహారంగా కూడా కోరవచ్చు. మీరు చూపించే సాక్ష్యాధారాలను బట్టి కోర్టులో నిర్ణయం ఉంటుంది. అంటే జీతానికి సంబంధించిన రుజువులు, ఆస్తికి సంబంధించిన కాగితాలు కోర్టుకి చూపించాలి. వీటితో పాటు ఇంట్లో ఉన్నప్పుడు రక్షణ కోసం ప్రొటెక్షన్‌ ఆర్డర్‌ కూడా కోరవచ్చు. ఆలోచించి అడుగేయండి.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.