Published : 07/01/2022 21:05 IST

అందుకే పెరట్లో ఈ ఔషధ మొక్కలు ఉండాల్సిందే..!

ఒకప్పుడు జలుబు, దగ్గు.. వంటి చిన్నపాటి ఆరోగ్య సమస్యలు ఎదురైనప్పుడు వాటిని తగ్గించుకోవడానికి మూలికా వైద్యం చేసేవారు. కానీ రాన్రానూ వాటిని తక్షణమే తగ్గించుకొనే రసాయనిక మందులు పుట్టుకొచ్చాయి. అయితే ఇంత చిన్న సమస్యలకు కూడా అలాంటి మందులు పదే పదే వాడడం వల్ల క్రమంగా రోగనిరోధక శక్తి తగ్గిపోయే అవకాశముంటుంది. అందుకే వాటికి బదులుగా ఔషధ గుణాలున్న కొన్ని మొక్కల్ని పెరట్లో పెంచుకొని ఉపయోగిస్తే సరి. అవేంటంటే..!

కొత్తిమీర

కొత్తిమీర మహిళల్లో రక్తహీనత, నెలసరి సమస్యలు ఎదురవకుండా చూస్తుంది. ఆర్థరైటిస్‌ బారిన పడకుండా చేస్తుంది. రక్తంలోని చెడు కొలెస్ట్రాల్‌ శాతాన్ని తగ్గించి ఊబకాయం సమస్య నుంచి విముక్తి కల్పిస్తుంది. యాంటీఆక్సిడెంట్లు, విటమిన్‌ ‘ఎ’, ‘సి’ ఇందులో పుష్కలంగా లభిస్తాయి. అలాగే ఎలర్జీలు, ఇన్ఫెక్షన్లు రాకుండా నివారిస్తుంది. ఇన్ని మంచి లక్షణాలున్న కొత్తిమీరను రోజూ వంటల్లో ఉపయోగిస్తే.. చక్కటి ఆరోగ్యం మన సొంతమవుతుంది.

తులసి

తులసిలో ఎన్నో విశిష్టమైన లక్షణాలున్నాయి. తులసి మొక్క గాలిని శుద్ధి చేస్తుంది. ఫలితంగా మన చుట్టూ ఉన్న గాలిలో కాలుష్యం తగ్గుముఖం పడుతుంది. తులసి ఔషధ పరంగా ఎంతో విశిష్టమైంది. దీనిలో యాంటీఫంగల్‌, యాంటీబ్యాక్టీరియల్‌, యాంటీబయోటిక్‌ గుణాలున్నాయి. దీంతో శ్వాస, చర్మ సంబంధిత అలర్జీలు మన దరి చేరకుండా ఉంటాయి. ఈ మొక్క ఆరోగ్యపరంగానే కాకుండా అందాన్ని కాపాడటంలోనూ మనకి తోడ్పడుతుంది. అందుకే ఇంట్లో తులసి మొక్కను పెంచుకోవడం ద్వారా ఆరోగ్యాన్ని పరిరక్షించుకోవచ్చు.

లావెండర్

అద్భుతమైన సువాసన వెదజల్లే లావెండర్‌లో ఔషధ గుణాలు మెండుగా ఉంటాయి. ఇవి ఒత్తిడిని తగ్గించి మనసుని ఉల్లాసంగా ఉండేలా చేస్తాయి. లావెండర్‌లో యాంటీ ఇన్‌ఫ్లమేటరీ, యాంటీసెప్టిక్‌ గుణాలుంటాయి. ఇవి కాలిన గాయాలను తగ్గేలా చేస్తాయి. లావెండర్‌ ఆకులు, పువ్వులు- పురుగులు కుట్టినప్పుడు వచ్చే కొన్ని రకాల ఇన్ఫెక్షన్లు రాకుండా చేస్తాయి. అలాగే అందాన్ని కాపాడుకోవడంలోనూ సహకరిస్తాయి. స్టార్‌ హోటల్స్‌లో ఆహారపదార్థాలకు ప్రత్యేక రుచి రావడం కోసం లావెండర్‌ని ఆహారపదార్థాల్లోనూ వేస్తారు.

నిమ్మగడ్డి

నిమ్మగడ్డిని, దాని నుంచి తయారయ్యే నూనెని ఔషధాల తయారీలో విరివిగా ఉపయోగిస్తారు. దీనిలో కడుపునొప్పి, అధిక రక్తపోటు, ఫిట్స్‌, దగ్గు, వాంతులు, కీళ్లనొప్పులు, జ్వరం, జలుబు వంటి వాటిని తగ్గించే లక్షణాలున్నాయి. నిమ్మగడ్డి కొన్ని రకాల హానికారక క్రిములను నాశనం చేస్తుంది. అలాగే కొన్ని ఆహార పదార్థాల్లో ఫ్లేవర్‌ కోసం కూడా నిమ్మగడ్డిని ఉపయోగిస్తారు. దీనిలో విటమిన్‌ ‘ఎ’, సిట్రాల్‌ పుష్కలంగా లభిస్తాయి. దీంతో తయారుచేసే లెమన్‌గ్రాస్‌ టీ తాగడం వల్ల జీర్ణశక్తి పెరుగుతుంది.


Advertisement

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


వర్క్‌ & లైఫ్

మరిన్ని

సూపర్‌ విమెన్

మరిన్ని