ఏం చేస్తాడోనని ఆటోలోంచి దూకేశా.. అందుకే అప్రమత్తంగా ఉండండి!

(Photo: Twitter)

అర్ధరాత్రి దాకా ఎందుకు.. పట్టపగలు, మిట్టమధ్యాహ్నం, అదీ రద్దీగా ఉండే ప్రదేశంలోనూ ఆడపిల్లలకు రక్షణ లేకుండా పోతోంది. ఇందుకు తాజా ఉదాహరణే గురుగ్రామ్‌కు చెందిన నిష్తా పలివాల్‌కు ఎదురైన ఓ చేదు అనుభవం. ఇటీవలే ఓ ఆటో ప్రయాణంలో తనకెదురైన భయంకరమైన ఘటనను వరుస ట్వీట్ల రూపంలో పంచుకుందామె. ఈ క్రమంలో అపాయానికి చిక్కకుండా ఆపద నుంచి తాను బయటపడిన తీరును వివరిస్తూ.. రక్షణ విషయంలో అమ్మాయిలందరికీ ఓ హెచ్చరికను జారీ చేసింది. ఆపద సమయంలో సమయస్ఫూర్తితో స్పందించేందుకు సిద్ధంగా ఉండాలని తన అనుభవంతో చెప్పకనే చెప్పిందీ యువతి. మరి, ఇంతకీ నిష్తా ఎదుర్కొన్న ఆ చేదు సంఘటనేంటి? ఈ క్రమంలో తనేం చెప్పాలనుకుంది? తెలుసుకోవాలంటే ఇది చదివేయండి.

గురుగ్రామ్‌కు చెందిన నిష్తా పలివాల్‌ కమ్యూనికేషన్స్‌ స్పెషలిస్ట్‌. ఇటీవలే ఓ పని మీద బయటికి వెళ్లిన ఆమెకు ఆటో డ్రైవర్‌ రూపంలో ఓ చేదు అనుభవం ఎదురైంది. అయితే దాన్నుంచి ఎలాగోలా బయటపడ్డ ఆమె.. ఆ ఘటనను వరుస ట్వీట్ల రూపంలో పంచుకుంటూ అమ్మాయిలందరినీ అలర్ట్‌ చేసింది.

కుడికి వెళ్లాలంటే ఎడమకు తిప్పాడు!

‘ఇటీవల నాకెదురైన ఓ చేదు సంఘటనను నా జీవితంలో ఎప్పటికీ మర్చిపోలేను. అది తలచుకుంటే ఇప్పటికీ వెన్నులో వణుకు పుడుతోంది.. రోమాలు నిక్కపొడుస్తున్నాయి. డిసెంబర్‌ 19న పని మీద సెక్టర్‌ 22కి వెళ్లిన నేను.. పని పూర్తి కాగానే అక్కడ రద్దీగా ఉండే మార్కెట్‌లోని ఆటో స్టాండ్‌కి వెళ్లి ఆటో మాట్లాడుకున్నా. అక్కడికి మా ఇంటికి 7 నిమిషాల దూరం ఉంటుంది. అయితే నా దగ్గర డబ్బు లేకపోయేసరికి.. పేటీఎం చేస్తానని చెప్పా. అందుకు డ్రైవర్‌ ఒప్పుకోవడంతో ఆటో ఎక్కా. అతడు మంద్ర స్థాయిలో భక్తి పాటలు పెట్టుకొని ఆటో తోలుతున్నాడు. అంతలోనే మూడు రోడ్ల కూడలి వద్దకు చేరుకున్నాం. నిజానికి మా ఇంటికి (సెక్టర్‌ 1) వెళ్లాలంటే కుడి వైపు వెళ్లాలి. కానీ ఆటో డ్రైవర్‌ ఎడమ వైపుకి తిప్పాడు. అదేంటని అడిగితే పట్టించుకోలేదు.. పైగా నామీదే అరవడం మొదలుపెట్టాడు. నేనూ వెనక్కి తగ్గలేదు.. అతడి భుజంపై చరుస్తూ వెనక్కి తిప్పమని అరిచా. అయినా ఫలితం లేదు.

ఆటోలోంచి దూకేశా!

ఇదేదో సందేహించాల్సిన విషయమేనని గ్రహించిన నేను.. ఇతనికి దొరికిపోవడం కంటే ఆటోలోంచి దూకితేనైనా చిన్న చిన్న గాయాలతో బయటపడచ్చనిపించింది. అప్పటికి ఆటో వేగం 40ల్లో ఉంది. ఇంకా వేగం పెంచకముందే దూకేయడం బెటర్‌ అనుకొని.. వెంటనే ఆటోలోంచి దూకేశా. నిజానికి ఆ సమయంలో నాకంత ధైర్యం ఎలా వచ్చిందో అర్థం కావట్లేదు. బహుశా.. ఆపదలో ఉన్నప్పుడు ఎలాగోలా బయటపడాలన్న ఆరాటమే ఇలాంటి ధైర్యాన్నిస్తుందేమో అని ఆ తర్వాత అనిపించింది. కుడి మోకాలి కింద నొప్పి తప్ప.. ఆ దేవుడి దయ వల్ల నాకు దెబ్బలేమీ తగల్లేదు.. ఆ తర్వాత నెమ్మదిగా నడుచుకుంటూ ఇంటికెళ్లిపోయా.. అయినా అతను వెంబడిస్తున్నాడేమోనన్న భయంతో పదే పదే వెనక్కి తిరిగి చూస్తూ ముందుకు సాగా.

అప్రమత్తత అవసరం!

ఈ ఘటన జరిగి మూడు రోజులు గడుస్తున్నా ఆ భయం ఇంకా నన్ను వెంటాడుతూనే ఉంది. ఈ భయంతోనే కనీసం దూకిన తర్వాతైనా ఆటో నంబర్ నోట్‌ చేసుకోవాలన్న ఆలోచన నాకు రాలేదు. నిజానికి ఇలాంటి ప్రతికూల పరిస్థితుల్లో ఎలా బయటపడాలన్న ఆలోచన తప్ప మరో ఆలోచన మనసులోకి రాదనుకోండి. అయితే ఇదంతా నేను మీతో ఎందుకు పంచుకుంటున్నానంటే.. వివిధ పనుల రీత్యా, వృత్తి ఉద్యోగాల రీత్యా రాత్రింబవళ్లు బయటికి వెళ్తుంటాం. రాత్రనే కాదు.. ఆఖరికి మధ్యాహ్నం కూడా ఆడపిల్లలకు రక్షణ లేకుండా పోతోంది. ఇందుకు నా విషయంలో జరిగిన ఈ ఘటనే ప్రత్యక్ష ఉదాహరణ. కాబట్టి మనందరం అప్రమత్తంగా, జాగ్రత్తగా ఉండడం అవసరం. తద్వారా ప్రమాద సమయంలో సమయస్ఫూర్తితో వ్యవహరించి.. ప్రాణాలను పణంగా పెట్టి కదిలే వాహనాల్లోంచి దూకాల్సిన అవసరం రాదు..’ అంటోంది నిష్తా.

మరి, మహిళలు ఒంటరిగా ప్రయాణించేటప్పుడు సురక్షితంగా గమ్యం చేరుకోవాలంటే ఇంకా ఎలాంటి జాగ్రత్తలు తీసుకోవడం మేలంటారు? మీ అభిప్రాయాలు, సలహాలను Contactus@vasundhara.net ద్వారా పంచుకోండి!