Published : 05/01/2022 21:04 IST

పసిపిల్లలకు ఎక్కిళ్లు వస్తుంటే...

పసి పిల్లలకు ఏ చిన్న ఆరోగ్య సమస్య ఎదురైనా, వారు ఏ విషయంలో ఇబ్బంది పడినా తల్లి మనసు తల్లడిల్లిపోతుంది. ఆ సమయంలో అసలు వారికి ఏం జరిగిందో అర్థం కాని పరిస్థితి కొత్తగా తల్త్లెన మహిళలది! అందుకే బుజ్జాయిల్ని అనుక్షణం ఎంతో జాగ్రత్తగా, కంటికి రెప్పలా కాపాడుకుంటారు తల్లులు. ఈ క్రమంలో కొంతమంది అమ్మలు వారి చిన్నారులకు ఎక్కిళ్లు వచ్చినా తట్టుకోలేరు. ఇంత చిన్న పాపాయికి కూడా ఎక్కిళ్లు వస్తాయా? అంటూ సందేహిస్తారు. అయితే పుట్టినప్పటి నుంచి ఏడాది వయసొచ్చే వరకు చిన్నపిల్లల్లో ఎక్కిళ్లు రావడం సర్వసాధారణమని, దానికి పెద్దగా భయపడాల్సిన అవసరం లేదంటున్నారు పిల్లల వైద్య నిపుణులు. ఇంతకీ బుజ్జాయిల్లో ఎక్కిళ్లు రావడానికి కారణమేంటి? వాటిని ఎలా అదుపు చేయాలి? వంటి విషయాలన్నీ తెలుసుకోవాలంటే ఇది చదవాల్సిందే..!

ఎందుకొస్తాయంటే..?

పుట్టినప్పట్నుంచి ఏడాది వయసొచ్చే వరకు బుజ్జాయిల్లో ఎక్కిళ్లు రావడం సర్వసాధారణం అని చెబుతున్నారు పిల్లల వైద్య నిపుణులు. అయితే ఇవి ఎలా వస్తాయనే సందేహం చాలామందిలో ఉంటుంది. డయాఫ్రమ్ (ఇది సన్నని అస్థిపంజర కండరం.. ఛాతీ భాగంలో ఉండే ఈ కండరం.. ఛాతీని, పొట్టను వేరు చేస్తుంది..) సంకోచం, స్వరతంత్రులు మూసుకుపోవడం వల్ల ఇవి ఏర్పడతాయని అంటున్నారు నిపుణులు. తద్వారా గొంతులోంచి ఒక రకమైన శబ్దం వినిపించడం మనకు తెలిసిందే. ఇలా ఎక్కిళ్లు వస్తున్నప్పుడు బేబీ అసౌకర్యాన్ని దూరం చేయాలంటే కొన్ని చిట్కాల్ని పాటించాల్సి ఉంటుంది.

బర్పింగ్ చేయాలి!

అది బాటిల్ ఫీడింగ్ అయినా, తల్లిపాలు తాగినా.. ఇలా పిల్లలు పాలు తాగే క్రమంలో పొట్టలోకి కాస్త గ్యాస్ వెళ్లడం కామనే. పొట్టలో గ్యాస్ ఎక్కువ కావడం వల్ల కూడా ఎక్కిళ్లు వచ్చే అవకాశం ఉందని అంటున్నారు నిపుణులు. అందుకే దీన్ని బయటికి పంపించడానికి చిన్నారులు పాలు తాగే క్రమంలో మధ్యమధ్యలో కాస్త గ్యాప్ ఇస్తూ బర్పింగ్ (పాపాయిని కూర్చోబెట్టి నెమ్మదిగా వెన్నులో పైనుంచి కింది దాకా తట్టడం) చేయమని సూచిస్తున్నారు. తద్వారా ఎక్కిళ్లు కొంత వరకు తగ్గే అవకాశం ఉంది. అమెరికన్ అకాడమీ ఆఫ్ పిడియాట్రిక్స్‌కి చెందిన వైద్యుల సూచనల ప్రకారం.. బాటిల్ ఫీడింగ్ ఇస్తున్న పాపాయికి నాలుగు టేబుల్‌స్పూన్ల పాలు తాగాక గ్యాప్ ఇస్తూ.. ఆ మధ్యలో కాసేపు బర్పింగ్ చేయాలని, ఇక నేరుగా తల్లిపాలు తాగే చిన్నారులు ఒక రొమ్ములోని పాలు తాగడం పూర్తయ్యాక కాసేపు బర్పింగ్ చేయాలని చెబుతున్నారు. ఇలా బర్పింగ్ చేసిన తర్వాత నెమ్మదిగా వెన్నులో పైనుంచి కింది దాకా రాయాలి. తద్వారా వారికి పొట్టలోని గ్యాస్ బయటికి వెళ్లిపోయి కాస్త ఉపశమనం కలుగుతుంది.

ప్యాసిఫయర్‌తో...

పాలు తాగే క్రమంలో పొట్టలోకి వెళ్లే గ్యాస్ కారణంగా చిన్నారులందరిలో ఎక్కిళ్లు రావని, కొంతమంది పిల్లల్లో ఎక్కువగా నవ్వడం వల్ల కూడా ఎక్కిళ్లు వచ్చే అవకాశం ఉందని అంటున్నారు వైద్యులు. అయితే ఇలాంటప్పుడు వారి నోట్లో ప్యాసిఫయర్(తేనెపీక) పెట్టడం వల్ల డయాఫ్రమ్ రిలాక్సయి తద్వారా నెమ్మదిగా ఎక్కిళ్లు తగ్గే అవకాశముందని వారంటున్నారు.

బాటిల్ చెక్ చేయండి!

చిన్నారుల్లో తరచూ ఎక్కిళ్లు వస్తున్నాయంటే వారు పాలు తాగే బాటిల్‌ను కూడా ఓసారి చెక్ చేయాల్సి ఉంటుంది. ఎందుకంటే వారు తాగే బాటిల్ ద్వారా గాలి ఎక్కువగా కడుపులోకి వెళ్లడం వల్ల కూడా ఈ సమస్య పదే పదే ఎదురువుతుంటుంది. కాబట్టి చిన్నారులకు నేరుగా తల్లిపాలు పట్టించడం.. అలా వీల్లేని పక్షంలో నాణ్యమైన బాటిల్‌ని ఉపయోగించడం మంచిది. తద్వారా ఎక్కిళ్ల సమస్య చిన్నారుల్ని వేధించకుండా జాగ్రత్తపడచ్చు.

గ్రైప్ వాటర్‌తో..

పిల్లలు తీసుకున్న ఆహారం జీర్ణం కాకపోయినా, కడుపునొప్పితో ఏడుస్తున్నా.. వెంటనే మనం వారికి గ్రైప్ వాటర్ అందిస్తుంటాం. ఇది వారి జీర్ణక్రియను మెరుగుపరిచి, పొట్టలో ఎలాంటి అసౌకర్యం ఉన్నా తొలగిస్తుంది. అయితే ఇది చిన్నారుల్లో తరచూ ఎదురయ్యే ఎక్కిళ్లను కూడా తగ్గిస్తుందని చెబుతున్నారు నిపుణులు. ఎక్కిళ్లు వచ్చినప్పుడు వారికి కొన్ని గ్రైప్ వాటర్ తాగించడం వల్ల ఉపశమనం కలుగుతుందట! అయితే తక్కువ ధరకొస్తుందని ఏదేదో కొనేయడం కాకుండా మంచి బ్రాండెడ్ గ్రైప్ వాటర్‌ని పిల్లలచే రోజూ తాగించడం మంచిది. తద్వారా వారిలో కడుపునొప్పి, మలబద్ధకం, అజీర్తి.. వంటి సమస్యలున్నా తగ్గిపోతాయి.

ఎంతకీ తగ్గట్లేదా?

కొంతమంది చిన్నారుల్లో ఎక్కిళ్లు వచ్చిన కాసేపటికి వాటంతటవే తగ్గిపోవడం మనం గమనిస్తుంటాం. అలాకాకుండా ఎన్ని చిట్కాలు పాటించినా తగ్గకపోతే గనుక వారిని వెంటనే డాక్టర్ దగ్గరికి తీసుకెళ్లడం మంచిదనేది నిపుణుల అభిప్రాయం. ఎందుకంటే కొందరు పిల్లల్లో కొన్ని ఆరోగ్య సమస్యలుంటే కూడా ఎక్కిళ్లు వస్తాయంటున్నారు పిల్లల వైద్యులు. కాబట్టి వాటంతటవే తగ్గుతాయని నిర్లక్ష్యం చేయకుండా పదే పదే ఎక్కిళ్లు వచ్చినా, ఎక్కువ సేపు తగ్గకుండా చిన్నారుల్ని ఇబ్బంది పెట్టినా డాక్టర్‌ని సంప్రదించడం మంచిది.

రాకుండా ఉండాలంటే..!

చిన్నారుల్లో ఎక్కిళ్లు రాకుండా ఉండడమనేది జరగకపోవచ్చు.. కానీ కొన్ని చిట్కాలు పాటించడం వల్ల వచ్చే అవకాశం తక్కువగా ఉందంటున్నారు వైద్యులు.

* చిన్నారికి బాగా ఆకలేసినప్పుడే పాలు పట్టడం లేదా పాలివ్వడం.

* పాలు కొద్దికొద్దిగా ఎక్కువ సార్లు పట్టడం.

* పాలు పట్టాక పావుగంట నుంచి అరగంట పాటు పాపాయిని నిటారుగా కూర్చోబెట్టడం.

* బాటిల్ ఫీడింగ్ అయితే బాటిల్ నిపుల్ పూర్తిగా బేబీ నోట్లో ఉండేలా చూసుకోవడం.. అలాగే వారికి పాలు అందుతున్నాయా లేదా గమనించడం.

పసిపిల్లల్లో తరచూ వచ్చే ఎక్కిళ్ల గురించి తెలుసుకున్నారుగా! అయితే ఈ విషయాలన్నీ గుర్తుపెట్టుకొని మీరు పాటించే ముందు మాత్రం ఒకసారి పిల్లల వైద్యుల్ని సంప్రదించడం ఉత్తమం. ఒకవేళ ఏం చేసినా ఎక్కిళ్లు తగ్గకపోతే మాత్రం వెంటనే వారిని డాక్టర్ దగ్గరికి తీసుకెళ్లడం మంచిదన్న విషయం గుర్తుంచుకోండి.


Advertisement

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని