బుల్లెట్లు దూసుకొస్తున్నా.. పోరాడుతూనే ఉన్నారు!

(Image for Representation)

గత రెండు దశాబ్దాలుగా సమానత్వం, తమ హక్కుల కోసం పోరాడుతూ ఎన్నో అద్భుతమైన విజయాలు సాధించారు అఫ్గాన్‌ మహిళలు. పురుషులతో సమానంగా దాదాపు అన్ని రంగాల్లో పోటీ పడే స్థాయికి ఎదిగారు. మహిళా సాధికారత దిశగా ముందడుగు వేశారు. అయితే గత రెండు నెలల నుంచి అఫ్గానిస్థాన్‌లో అనూహ్య మార్పులు చోటు చేసుకుంటున్నాయి. 20 ఏళ్ల క్రితం వరకు తాలిబన్ల ఆంక్షల్లో బందీగా కొట్టుమిట్టాడిన ఆ దేశం... తాజాగా మరోసారి వారి కబంధ హస్తాల్లోకి వెళ్లిపోయింది.

మహిళల భవిష్యత్‌ అగమ్యగోచరం!

దీంతో అఫ్గాన్‌లోని మహిళలు, అమ్మాయిల భవిష్యత్‌ మళ్లీ అగమ్యగోచరంగా మారింది. తాలిబన్లకు భయపడి ఏకంగా దేశాధ్యక్షుడే పలాయనం చిత్తగించడంతో మళ్లీ చీకటి రోజులు పునరావృతం అవుతాయేమోనని వారంతా భయపడుతున్నారు. ఈ నేపథ్యంలో తమ మాన, ప్రాణాలను కాపాడుకోవడానికి కట్టుబట్టలతో దేశాన్ని విడిచి వెళ్లేందుకు ప్రయత్నిస్తున్నారు. అయితే తాలిబన్లు తమ వైపు దూసుకొస్తున్నా కొంతమంది మహిళలు మాత్రం ధైర్యంగా ఎదురొడ్డి నిలిచారు. ‘ప్రాణాలు పోయినా పర్లేదు’ అంటూ తుదివరకు పోరాడారు.

అంత సులభంగా చిక్కలేదు!

అమెరికా సైన్యం అఫ్గాన్‌ను విడిచిపెట్టిన రెండు నెలలకే ఆ దేశాన్ని పూర్తిగా హస్తగతం చేసుకున్నారు తాలిబన్లు. దేశంలోని ఎన్నో ప్రాంతాలను సులభంగా ఆక్రమించుకున్న వీరు బల్ఖ్‌ ప్రావిన్సులోని ఛాహర్‌ కింట్‌ జిల్లాను మాత్రం అంత సులభంగా తమ వశం చేసుకోలేకపోయారు. అందుకు కారణం ఆ జిల్లా గవర్నర్‌ సలీమా మజారీ. తాలిబన్లకు ఎదురొడ్డి నిలిచిన ఆమె తన ప్రాంతాన్ని కాపాడుకునేందుకు ఎంతో ప్రయత్నించింది. ప్రావిన్సు చుట్టు పక్కల ప్రాంతాలన్నీ శత్రువుల వశమవుతున్నా ధైర్యంగా పోరాడింది. అయితే ముష్కరుల బలం ముందు నిలవలేక చివరకు వారి చెరలో బందీగా మారింది.

మాతృభూమి రుణం తీర్చుకోవాలని!

అఫ్గానిస్థాన్‌ మొదటి ముగ్గురు మహిళా గవర్నర్లలో సలీమా కూడా ఒకరు. సోవియట్‌ వార్‌ సమయంలో ఆమె తల్లిదండ్రులు అఫ్గాన్‌ను విడిచిపెట్టి ఇరాన్‌కు వెళ్లి అక్కడే శరణార్థులుగా స్థిరపడ్డారు. ఈ నేపథ్యంలో ఇరాన్‌లోనే పుట్టి పెరిగింది సలీమా. టెహ్రాన్‌ యూనివర్సిటీ నుంచి డిగ్రీ పట్టా అందుకుంది. చదువయ్యాక పలు యూనివర్సిటీలు, అంతర్జాతీయ మైగ్రేషన్‌ సంస్థల్లో వివిధ హోదాల్లో పని చేసింది. అయితే మాతృభూమి రుణం తీర్చుకోవాలన్న తలంపుతో మూడేళ్ల క్రితం మళ్లీ అఫ్గాన్‌కు వచ్చింది. అదే సమయంలో ఛాహర్‌కింట్‌ జిల్లా గవర్నర్‌ పోస్టు ఖాళీ ఉండడంతో దరఖాస్తు చేసింది. ఆ పోస్టుకు కావాల్సిన విద్యార్హతలన్నీ ఉండడంతో 2018లో ఛాహర్‌కింట్ జిల్లా గవర్నర్ బాధ్యతలు స్వీకరించింది సలీమా.

‘చాలామంది మహిళల్లాగే గవర్నర్‌ అయ్యాక నేను కూడా భయపడ్డాను. ఓ మహిళగా నాకు వివక్ష, అవమానాలు తప్పవని ఊహించాను. అయితే అనూహ్యంగా నాతోటి అధికారులు, ప్రజలు నాకెంతో మద్దతుగా నిలిచారు. అప్పుడే వారి అభివృద్ధి కోసం పాటుపడాలని నిర్ణయించుకున్నాను’ అని ఓ సందర్భంలో చెప్పుకొచ్చిందీ డేరింగ్‌ వుమన్.

ప్రత్యేక మిలిటరీ బృందంతో.. !

ముందుగా అనుకున్నట్లుగానే తన జిల్లా ప్రజల సంక్షేమం కోసం ఎన్నో అభివృద్ధి కార్యక్రమాలు చేపట్టింది సలీమా. అయితే తాలిబన్లు, ఇతర మిలిటెంట్‌ గ్రూపుల దాడులను అరికట్టడం ఆమెకు ఓ పెద్ద సవాలుగా మారింది. ఈ సమస్యను పరిష్కరించేందుకు 2019లో ప్రత్యేకంగా సెక్యూరిటీ కమిషన్‌ను ఏర్పాటుచేసింది సలీమా. ఇందులో భాగంగా జిల్లాలోని రైతులు, పశువుల కాపరులు, కార్మికులతో ఓ పెద్ద మిలిటరీ బృందాన్ని తయారుచేసింది. ఇలా తమ ఆగడాలకు అడ్డుకట్ట పడడం, పైగా ఓ ముస్లిం మహిళ నాయకత్వంలో ఇది జరగడం తాలిబన్ల నాయకులకు అసలు రుచించలేదు. దీంతో సలీమాకు హత్యా బెదిరింపులు ఎక్కువయ్యాయి. అయినా ఆమె వెనక్కు తగ్గలేదు.

అదే నన్ను బాధిస్తోంది!

గవర్నర్‌గా సమర్థంగా పరిపాలిస్తూనే తాలిబన్లతో దౌత్యపరమైన చర్చలు కొనసాగించేది సలీమా. తద్వారా వారిని జనజీవన స్రవంతిలోకి తీసుకురావాలన్నది ఆమె ఆశయం. ఈ క్రమంలోనే గతేడాది బల్ఖ్‌ ప్రావిన్సుకు చెందిన 100 మంది కరడుగట్టిన తాలిబన్లతో మాట్లాడి ప్రభుత్వానికి లొంగిపోయేలా వారిని ఒప్పించింది. అయితే అమెరికా సైన్యం వెనుదిరిగిన తర్వాత తాలిబన్లు మళ్లీ దూకుడు పెంచారు. వారిని చూసి దేశ అధ్యక్షుడితో సహా కీలక నేతలంతా ప్రాణాలు అరచేత పట్టుకుని దేశం విడిచి వెళ్లిపోయారు. కానీ సలీమా మాత్రం అక్కడే ఉండి పోరాడింది. తన ప్రాంత ప్రజలను కాపాడుకునేందుకు తన వంతు ప్రయత్నం చేసింది. కానీ చివరకు శత్రువుల చేతికి చిక్కక తప్పలేదు.

‘తాలిబన్లకు నేను ఏ మాత్రం భయపడను. కానీ మహిళలు, అమ్మాయిలను ఆ ముష్కరులు ఏం చేస్తారోనని ఆందోళనగా ఉంది’ అని శత్రువుల చేతికి చిక్కకముందు ఇచ్చిన ఓ ఇంటర్వ్యూలో చెప్పుకొచ్చింది సలీమా.