Updated : 07/07/2022 19:52 IST

చీమలు చెప్పే లీడర్‌షిప్ పాఠాలు!

చీమ చూడటానికే చిరుజీవి... అయితే తెలివితేటల్లో మానవ మాత్రులకే అంతుబట్టని ఎన్నో జీవిత ప్రశ్నలకు సమాధానాలు ఇవ్వగల మేధావి. చీమల జీవనశైలిని పరిశీలించి ఓ వ్యక్తిత్వ వికాస గ్రంథమే రాసేయచ్చేమో.. మేనేజ్‌మెంట్ గురూలకే పాఠాలు చెప్పగల చిత్రమైన ప్రొఫెసర్ చీమ. అందుకే చీమలు పని చేసే విధానాన్ని పెద్ద పెద్ద మేనేజ్‌మెంట్ కాలేజీల్లో సైతం పాఠాలుగా చెప్పడం విశేషం. ఈ క్రమంలో- చీమలు చెప్పే లీడర్‌షిప్‌ పాఠాలు విందామా?

నాయకత్వ లక్షణాలు

ఒక బృందాన్ని సమర్థంగా ముందుకు నడిపించాలంటే నాయకత్వం పటిష్టంగా ఉండాలనే పాఠాన్ని మనం చీమల నుంచి నేర్చుకోవచ్చు. 'ఐకమత్యమే మహాబలం', 'కలిసుంటే కలదు సుఖం' అనే సామెతలు చీమలు కలిసికట్టుగా ఉండే పద్ధతిని చూసే కనిపెట్టారేమో. ఒకే మాటకి బృందమంతా కట్టుబడి ఉండడం, నియమ నిబంధనలను పాటించే విషయంలో అందరూ ఒకేలా వ్యవహరించడం లాంటివన్నీ నాయకత్వం బలంగా ఉన్నప్పుడే జరుగుతాయి.

ఒక లక్ష్యం కోసం..

చీమల ప్రధాన లక్ష్యం ఆహారాన్ని సేకరించడం. అందుకోసం ఒక నిర్దిష్ట లక్ష్యాన్ని ఏర్పరచుకొని అన్నీ కలిసి శక్తివంచన లేకుండా శ్రమిస్తాయి. సమయాన్ని సద్వినియోగం చేసుకుంటూ ఒక నిర్ణీత బాటలో నడుస్తాయి. చలికాలంలో ఆహారం కోసం వేసవి కాలం నుంచే శ్రమిస్తాయి చీమలు. ఈ పద్ధతి ఒక రకంగా ముందస్తు ప్రణాళిక లాంటిది. దీర్ఘకాలిక లక్ష్యాల కోసం ముందుగానే సిద్ధమవ్వడం విజయానికి బాటను నిర్మించడమే కదా!

ప్రణాళికాబద్ధంగా..

సమయపాలన పాటించడం, క్రమశిక్షణతో ముందుకు సాగడం.. వంటి విషయాల్లోనూ చీమలను ఉదాహరణగా తీసుకోవచ్చు. ఏ సమయంలో పని చేయాలో, ఏ సమయంలో పని ముగించాలో చీమలకు బాగా తెలుసు. నిరంతరాయంగా పని చేయడం, ఆ తర్వాత తగినంత విశ్రాంతి తీసుకోవడం చీమల నైజం. పని విషయంలో ఎంత ప్రణాళికాబద్ధంగా ఉండాలన్న అంశంలో చీమలను ఆదర్శంగా తీసుకోవచ్చు.

నిర్మాణాత్మకంగా వ్యవహరించడం

చీమలు తమ పుట్టను నిర్మించుకొనే క్రమంలో కూడా అన్నీ కలిసికట్టుగానే ముందుకు సాగుతాయి. ఒక పుట్ట నిర్మించడం కోసం కొన్ని వందల చీమలు శ్రమిస్తాయి. అలాగే ఒక సంస్థ నిర్మాణం ఏ ఒక్క వ్యక్తి వల్లో సాధ్యం కాదని, అనేకమంది ఉద్యోగుల పాత్ర కూడా అందులో ఉంటుందనే విషయాన్ని చీమలు స్పష్టంగా తేటతెల్లం చేస్తాయి.

శక్తివంచన లేకుండా పనిచేయడం

శక్తివంచన లేకుండా పనిచేయడం అనే విషయాన్ని మనం చీమల నుంచే నేర్చుకోవాలేమో. తమ శక్తి సామర్థ్యాలేమిటో చీమలకు బాగా తెలుసు. ఒక్కొక్క చీమ తన కంటే అనేక రెట్లు ఎక్కువ ఉన్న బరువును ఇట్టే మోయగలదు. చేపట్టిన బాధ్యతలను విస్మరించకుండా నూటికి నూరు శాతం పరిశ్రమించే జీవి ఏదైనా ఉందంటే అది చీమ మాత్రమే.

బృందస్ఫూర్తి..

స్నేహశీలతతో వ్యవహరించడం చీమలకు బాగా తెలుసు. ఒకదానికొకటి సహకరించుకుంటూ అన్నీ కలిసి బృందస్ఫూర్తితో పనిచేయడం, లక్ష్యాన్ని సాధించడంలో వీటికివే సాటి. 

ఏ వాతావరణానికైనా అలవాటు పడడం

చీమలు ఒక ప్రాంతానికే పరిమితమై జీవించవు. అలాగే అన్ని వాతావరణాలకు తగ్గట్టుగానే తమ జీవన విధానాన్ని అవి మలుచుకుంటాయి. ఈ క్రమంలో ఎలాంటి క్లిష్టమైన పని వాతావరణంలోనైనా సమస్యలను ఎదుర్కొని రాణించాలనే సందేశాన్నీ మనకు చీమలు ఇవ్వడం గమనార్హం.

చూశారుగా... చీమలు చెప్పే లీడర్‌షిప్‌ పాఠాలు. ఒక శక్తిమంతమైన సామ్రాజ్యం నెలకొనాలంటే.. ఏ ఒక్కరివల్లో కానే కాదు.. ఐకమత్యంతో అందరూ కలిసికట్టుగా కృషి చేస్తేనే అద్భుతాలు సైతం సుసాధ్యమవుతాయి.


గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని