Published : 02/03/2023 00:09 IST

Nazeerunnisa Sharif: మనసైన వ్యాపకం

‘హమ్మయ్యా.. ఉద్యోగమొచ్చింది చాలు’ అనుకోవడం లేదీ తరం అమ్మాయిలు. వృత్తితోపాటు అభిరుచులపైనా దృష్టిపెడుతున్నారు. ఆ కోవలోకే వస్తుంది నసీరున్నీసా షరీఫ్‌! లిప్పన్‌లో కళాకృతులను తయారు చేస్తున్న తను.. దానికి సమాజ సేవనీ జోడిస్తోంది.

నసీరున్నీసాది ఉయ్యూరు. ఎంఫార్మసీ చదివిన తను నోవార్టిస్‌ ఫార్మాలో అసోసియేట్‌ క్లినికల్‌ డేటాబేస్‌ డెవలపర్‌గా పనిచేస్తోంది. కొవిడ్‌ నుంచి ఇంటి వద్ద నుంచే పని. ఖాళీ సమయంలో ఏదైనా ప్రయత్నిస్తే బాగుంటుందన్న తనను లిప్పన్‌ ఆర్ట్‌ ఆకర్షించింది. గుజరాత్‌లోని కచ్‌ ప్రాంతం లిప్పన్‌ ఆర్ట్‌కి ప్రసిద్ధి. అక్కడి ప్రజలు అద్దాలు, ప్రత్యేకమైన మట్టితో కళాకృతులను రూపొందించి, గృహాలంకరణలో వాడతారు. అది నచ్చి నసీరున్నీసా నేర్చుకుంది. గృహాలంకరణతోపాటు అందమైన ఆభరణాలనూ తయారు చేస్తోంది. ఈ ఆర్ట్‌కు ఒకరకమైన సిమెంట్‌ లాంటి మట్టిని వాడతారు. ఇది పర్యావరణానికి అంత మంచిది కాదని గ్రహించింది నసీరున్నీసా. దీంతో సహజ పదార్థాలు.. సజ్జపిండి, చాక్‌ పౌడర్‌, ఫెవికాల్‌, వెజిటబుల్‌ ఆయిల్‌, వెనిగర్‌లతో ముడిసరకు తయారు చేస్తోంది. దానికి అద్దాలు, పూసలు వంటివి జోడించి కళాకృతుల్ని తయారు చేస్తోంది. వాటిని ఆన్‌లైన్‌లో అమ్మడం ప్రారంభించింది. తాజాగా నోవార్టిస్‌ వార్షికోత్సవంలో వీటిని ప్రదర్శించి, అమ్మకాలు చేపట్టింది. వ్యాపకమైనా దానికి సమాజ హితమూ తోడవ్వాలని నమ్ముతుంది నసీరున్నీసా. అందుకే వీటిని అమ్మగా వచ్చిన మొత్తాన్ని అనాథ శరణాలయాలకు ఖర్చు చేస్తోంది. ‘ఇది వ్యాపకమే కాదు.. ఒత్తిడిని దూరం చేసే మార్గం కూడా! అందుకే దీని ద్వారా వచ్చిన మొత్తాన్ని సమాజ సేవకు వినియోగించాలనుకున్నా’నంటోంది నసీరున్నీసా.

- పాషా ఉయ్యూరు

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.