ఆ తొక్కలతోనూ ఉపయోగాలెన్నో!

కిచెన్‌లో మనం వృథా అంటూ పడేసే కొన్ని వస్తువులు/పదార్థాలతో బోలెడన్ని ఉపయోగాలుంటాయి. పండ్లు, కాయగూరల తొక్కలూ ఇందుకు మినహాయింపు కాదు. ఇందులో ఉండే కొన్ని రకాల ఆమ్ల గుణాలు క్లీనింగ్‌ ఏజెంట్‌గా, క్రిమి సంహారిణిగా పనిచేస్తాయి. మరి, ఈ తొక్కలను ఇంకా దేనికోసం వాడచ్చు? తెలుసుకుందాం రండి..

* ఇంట్లో పెంచుకునే మొక్కల కోసం ఇప్పుడందరూ సహజ ఎరువుల్నే వాడుతున్నారు. పండ్లు, కాయగూరల తొక్కలతోనూ దీన్ని తయారుచేసుకోవచ్చు. అదెలాగంటే.. ఈ తొక్కల్ని కాసేపు ఎండలో ఉంచి.. ఆ తర్వాత మట్టిలో కలిపి కొన్నాళ్ల పాటు అలాగే వదిలేస్తే సరి.

* సింక్‌, కుళాయిలపై తరచూ నీళ్ల మరకలు అవడం మనం గమనిస్తూనే ఉంటాం. పైగా ఇవి ఓ పట్టాన వదలవు కూడా! అలాంటప్పుడు నిమ్మ, కమలాఫలం తొక్కలతో వాటిని రుద్దితే చాలు. వాటిలోని ఆమ్ల గుణాలు ఆయా వస్తువుల్ని మెరిపించడంలో సహకరిస్తాయి.

* నిమ్మ, కమలాఫలం తొక్కల్ని కొన్ని నీళ్లలో వేసి మరిగించాలి. చల్లారాక వడకట్టుకొని స్ప్రే బాటిల్‌లో పోసుకోవాలి. ఈ మిశ్రమాన్ని సింక్‌, బాత్‌రూమ్‌లో నీళ్లు పోయే చోట తరచూ స్ప్రే చేస్తుండాలి. తద్వారా అక్కడ బ్యాక్టీరియా, క్రిములు పెరగకుండా జాగ్రత్తపడచ్చు. పైగా ఈ మిశ్రమం సువాసనలు కూడా వెదజల్లుతుంది.

* పండ్లు, కాయగూరల తొక్కల్లోనూ అందాన్ని ద్విగుణీకృతం చేసే పోషకాలుంటాయి. కాబట్టి వీటిని ఎండబెట్టి బరకగా పొడి చేసుకోవాలి. ఇందులో తేనె, ముల్తానీ మట్టి, గులాబీ నీరు, పెరుగు.. వంటివి కలుపుకొని స్క్రబ్‌లాగా ఉపయోగించుకోవచ్చు.

* చర్మంపై దురద, అలర్జీ, మంట.. వంటి సమస్యల్నీ తొక్కలతో తొలగించుకోవచ్చు. ఇందుకోసం స్నానం చేసే నీటిలో కొన్ని గంటల ముందు నిమ్మ, కమలాఫలం తొక్కలు వేసి అలాగే ఉంచాలి. ఆపై వాటిని తీసేసి ఆ నీటితో స్నానం చేస్తే ఫలితం ఉంటుంది.

* ఈ వర్షాకాలంలో తడి ఉన్న చోట చిన్న చిన్న పురుగుల్లాంటివి చేరి చిరాకు తెప్పిస్తుంటాయి. వాటిని తరిమి కొట్టాలన్నా తొక్కల్ని ఇలా ఉపయోగించచ్చు. ఉల్లి, అల్లం, నిమ్మ, కమలాఫలం.. వంటి తొక్కల్ని లీటర్‌ నీటిలో వేసి మరిగించాలి. చల్లారాక ఈ మిశ్రమాన్ని వడకట్టుకొని స్ప్రే బాటిల్‌లో పోసుకోవాలి. ఇప్పుడు ఇందులో కొద్దిగా బేకింగ్‌ సోడా లేదా వెనిగర్‌ కలుపుకొని.. పురుగులున్న చోట స్ప్రే చేసుకుంటే అవి ఆ దరిదాపుల్లోకి రాకుండా జాగ్రత్తపడచ్చు.

* రబ్బర్‌ ప్లాంట్‌ వంటి మందపాటి, ప్రకాశవంతమైన ఆకులుండే ఇండోర్‌ మొక్కల్ని అరటి పండు తొక్కలతో మృదువుగా తుడవడం వల్ల వాటిపై ఉండే దుమ్ము తొలగిపోయి.. అవి తిరిగి ప్రకాశవంతంగా మారతాయి.

* నిమ్మ, కమలాఫలం తొక్కలతో టీ తయారుచేసుకోవచ్చు. ఇందుకోసం కొన్ని నీళ్లలో ఆ తొక్కల్ని వేసి మరిగించాలి. కాస్త చల్లారాక వడకట్టుకొని.. తియ్యదనం కోసం తేనె కలుపుకొని తీసుకోవచ్చు.

* కొన్ని వంటకాల్లో వెజిటబుల్‌ స్టాక్‌ను వాడుతుంటాం. దీన్నీ కాయగూరల తొక్కలతో తయారుచేసుకోవచ్చు. ఇందుకోసం.. ఈ తొక్కలన్నీ నీటిలో వేసి మరిగించాలి. చల్లారాక వడకట్టుకుంటే సరిపోతుంది.

* కీరా తొక్కలు ఇంట్లో చీమల బెడదను తగ్గిస్తాయి. ఇందుకోసం.. చీమలు ఉండే చోట ఈ తొక్కల్ని ఉంచాలి.