వర్షాకాలంలో గోళ్ల ఆరోగ్యం కోసం..!

అసలే ఆడవాళ్లకు ఇంటి పనులు చేసే క్రమంలో చేతులు ఎక్కువసేపు నీటిలో నానుతుంటాయి. దీనికి తోడు ఈ వర్షాకాలంలో వాతావరణమంతా తేమగా ఉండడంతో ఈ సమస్య మరింత తీవ్రమవుతుంది. ఫలితంగా గోళ్లు బలహీనమైపోయి విరిగిపోవడం, సహజత్వాన్ని కోల్పోవడం.. వంటివి తలెత్తుతాయి. మరి, అలా జరగకుండా ఉండాలంటే గోళ్ల సంరక్షణ విషయంలో కొన్ని చిన్నపాటి జాగ్రత్తలు తీసుకోవాలని చెబుతున్నారు సౌందర్య నిపుణులు.

* మన శరీరంలోని అతి సున్నితమైన భాగాల్లో గోళ్లు ఒకటి. ఇవి పదే పదే నీటిలో నానడం వల్ల తేమను కోల్పోయి బలహీనమైపోతాయి. ఈ క్రమంలో వాటికి తిరిగి తేమనందించడం చాలా ముఖ్యం. ఇందుకోసం అల్ఫా హైడ్రాక్సీ ఆధారిత హ్యాండ్‌ క్రీమ్‌/లోషన్‌ వంటి వాటితో గోళ్లను కాసేపు మర్దన చేస్తే ఫలితం ఉంటుంది.

* ఇంటి పనులు చేసే క్రమంలో చేతులకు గ్లౌజులు వాడడం మంచిది. ఎందుకంటే గిన్నెలు తోమడానికి మనం ఉపయోగించే సబ్బుల్లో అసిటోన్‌ అనే రసాయనం ఉంటుంది. ఇది గోళ్లను బలహీనపరుస్తుంది.

* అలాగే నెయిల్‌ పాలిష్ రిమూవర్లలో ఉండే అసిటోన్‌ కూడా గోళ్ల ఆరోగ్యాన్ని దెబ్బ తీస్తుంది. కాబట్టి ఈ రసాయనం లేని, ‘న్యాచురల్‌’ లేదా ‘ఆర్గానిక్‌’ అని రాసున్న రిమూవర్లైతే మంచివంటున్నారు నిపుణులు.

* గోళ్లను షేప్‌ చేసుకునే క్రమంలో పదే పదే నెయిల్‌ ఫైల్‌ని ఉపయోగించడం వల్ల గోళ్లు బలహీనమవుతాయి. అందుకే దీన్ని అరుదుగా ఉపయోగిస్తూనే.. నెమ్మదిగా గోళ్లను షేప్‌ చేసుకోవడం మంచిది.

* బయట మార్కెట్లో దొరికే బేస్‌కోట్‌ నెయిల్‌ పాలిష్‌ గోళ్లకు రక్షణ కవచంలా పనిచేస్తుందంటున్నారు నిపుణులు. తద్వారా నీళ్లలో తడిసినా గోళ్లు బలహీనపడకుండా ఇది రక్షిస్తుంది.. అలాగే గోళ్లకు సహజసిద్ధమైన మెరుపును అందిస్తుంది.

* స్నానానికి ముందు గోళ్లను పెట్రోలియం జెల్లీతో కాసేపు మర్దన చేసుకొని.. ఆపై సబ్బుతో శుభ్రం చేసుకోవాలి. వరుసగా రెండు వారాలు ఈ చిట్కా పాటిస్తే గోళ్లు బలంగా మారతాయి.

* వర్షాకాలంలో గోళ్లు పెంచుకోవడం కంటే చిన్నగా కత్తిరించుకోవడమే మంచిదంటున్నారు నిపుణులు. ఎందుకంటే వాటిలోకి మురికి చేరి.. ఇన్ఫెక్షన్లు వచ్చే ప్రమాదం ఉంది.. ఒకవేళ పెంచుకోవాలనుకుంటే ఎప్పటికప్పుడు వాటిని శుభ్రంగా ఉంచుకోవడమూ ముఖ్యమే!

* వీటితో పాటు గోళ్ల ఆరోగ్యంలో ప్రముఖ పాత్ర వహించే బయోటిన్‌ సప్లిమెంట్స్‌ని డాక్టర్‌ సలహా మేరకు వాడచ్చు.

మరి, ఈ వర్షాకాలంలో గోళ్ల ఆరోగ్యానికి మీరు ఎలాంటి చిట్కాలు పాటిస్తున్నారు? మాతో పంచుకోండి.. మీరిచ్చే సలహాలు ఎంతోమందికి చిట్కాల్లా ఉపయోగపడచ్చు.