ఈ వయసులో మరో మహిళతో సంబంధం... ఆయన్ని మార్చేదెలా?
close
Published : 22/11/2021 20:00 IST

ఈ వయసులో మరో మహిళతో సంబంధం... ఆయన్ని మార్చేదెలా?

(Image for Representation)

హాయ్ మేడమ్.. మా ఇంట్లో నేను, అమ్మ, నాన్న, అన్నయ్య ఉంటాం. మా నాన్న వయసు 59 సంవత్సరాలు. తను చాలా మంచివారు. అయితే గత 5 సంవత్సరాల నుండి ఆయన ఒక మహిళతో సంబంధం పెట్టుకున్నాడు. ఆమె వయసు 30 సంవత్సరాలు. మేము ఉద్యోగరీత్యా వేరే ప్రాంతంలో ఉంటున్నాం. దానివల్ల ఇంటి విషయాలు మాకు సరిగా తెలియవు. మా అమ్మ ఎప్పుడూ నాన్న గురించే ఆలోచిస్తుంటుంది. ఆ విషయంపై ఇంట్లో తరచూ గొడవలు జరుగుతున్నాయి. దాంతో అదే విషయం గురించి మా అన్నయ్య నాన్నతో మాట్లాడారు. దానికి ఆయన అదంతా ఒక రూమర్.. అని కొట్టిపడేశాడు. మా నాన్న మీద కంప్త్లెంటు చేద్దామంటే, అప్పటికే ఈ విషయం గురించి అమ్మ.. నాన్నను అడిగే ప్రశ్నలకు నాన్న కొన్నిసార్లు ఆత్మహత్యా ప్రయత్నం కూడా చేశారు. ఈ సమస్య నుంచి ఎలా బయటపడాలో అర్థం కావట్లేదు. సలహా ఇవ్వండి. - ఓ సోదరి

జ. మీ తల్లిదండ్రులకు ఈ వయసులో ఒకరిపై ఒకరికి అవగాహన లోపం రావడం, అది ఇద్దరి మధ్య కలతలకి కారణమవడం అనేవి మిమ్మల్ని బాధిస్తున్నాయి. ఆయనకి ఇంకెవరితోనో సంబంధం ఉందని కచ్చితంగా చెప్పగలుగుతున్నారా? లేక అది కేవలం అపోహ మాత్రమేనా? అనే విషయాన్ని ముందుగా తెలుసుకునే ప్రయత్నం చేయండి. ఒకవేళ అదే నిజమైతే మీ అమ్మగారు పడుతున్న బాధను, ఆయన అర్థం చేసుకొని, దాన్నుంచి బయటకు వచ్చే అవకాశం ఉందా? అసలు మీ నాన్నగారు ఏ విషయంలో బాధపడుతున్నారో, దానిని పరిష్కరించే అవకాశం ఉందా?.. ఇవన్నీ మీరందరూ కలిసి కూర్చొని మాట్లాడుకోవాల్సిన అంశాలు.

మీ అమ్మానాన్నల ఆలోచనల్లో బాధ, ఆవేదన ఉన్నాయనేది మీ ఉత్తరం స్పష్టం చేస్తోంది. మీ అమ్మగారు వేదనతో మాట్లాడే మాటల వల్ల మీ నాన్నగారు ఆత్మహత్యా ప్రయత్నం దాకా వెళ్లారంటే.. అది తీవ్రంగా పరిగణించాల్సిన విషయం. అలాగే మీ అమ్మగారు కూడా ఇదే విషయం గురించి తీవ్రంగా ఆలోచిస్తున్నారంటే.. దాన్నీ తేలికగా తీసుకోకూడదు.

ఎందుకంటే వారిద్దరినీ అలా వదిలేస్తే సమస్య మరింత తీవ్రమయ్యే అవకాశం ఉంటుంది. కాబట్టి, వారితో మాట్లాడి, అసలు కారణాలేమై ఉండొచ్చు? నిజానిజాలు ఎంతవరకు ఉన్నాయి? ఒకవేళ విషయం నిజమే అయితే అందుకు ఏం చేయాలి? వారిద్దరి మధ్య సఖ్యత కుదర్చడానికి మీరేం చేయగలుగుతారు? ఒకవేళ మీ నాన్న గారికి వేరే వారిపై దృష్టి మళ్లి ఉంటే.. అది ఈ వయసులోనే ఎందుకు జరిగింది? దాన్నుంచి ఎలా బయటకు రాగలుగుతారు?వంటి విషయాలన్నీ ఆలోచించండి. ఈ క్రమంలో మీ తల్లిదండ్రుల ఆరోగ్య పరిస్థితిని కూడా దృష్టిలో పెట్టుకోవడం ముఖ్యం. కాబట్టి మీ కుటుంబ సభ్యులు, ముఖ్యంగా పిల్లలుగా మీరిద్దరూ, ఇంకా ఎవరైనా తోబుట్టువులు ఉంటే.. వారితో కలిసి చర్చించి ఈ విషయాన్ని ఓ కొలిక్కి తీసుకొచ్చే ప్రయత్నం చేయండి. అవసరమైతే మానసిక నిపుణుల సహాయం కూడా తీసుకోండి.


Advertisement

మరిన్ని

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

యూత్‌ కార్నర్

మరిన్ని

మంచిమాట


'స్వీట్' హోం

మరిన్ని

వర్క్‌ & లైఫ్

మరిన్ని

సూపర్‌ విమెన్

మరిన్ని