యాపిల్.. రంగు మారకుండా..!
ఎరుపెక్కిన యాపిల్ ముక్కల్ని చూస్తే అస్సలు తినాలనిపించదు. మరి, యాపిల్ ముక్కలు కట్ చేశాక కూడా రంగు మారకుండా ఉండాలంటే ఈ చిన్న చిన్న చిట్కాలు పాటిస్తే సరి.
యాపిల్ పండును ఒక్కసారి కట్ చేశాక, దాన్ని వెంటనే తినేయాలి.. లేదంటే.. యాపిల్ గుజ్జులోని పాలీఫినోల్‌ ఆక్సిడేస్‌ అనే ఎంజైమ్‌ గాలిలోని ఆక్సిజన్‌తో చర్య జరిపి గుజ్జును బ్రౌన్‌ కలర్‌లోకి మారుస్తుంది. ఇలా ఎరుపెక్కిన యాపిల్ ముక్కల్ని చూస్తే అస్సలు తినాలనిపించదు. మరి, యాపిల్ ముక్కలు కట్ చేశాక కూడా రంగు మారకుండా అలాగే ఉంటే ఎంత బావుంటుందో అనుకుంటున్నారా? అయితే అందుకు ఈ చిన్న చిన్న చిట్కాలు పాటిస్తే సరి.
* కట్ చేసిన యాపిల్ ముక్కలపై కొన్ని చుక్కల నిమ్మరసాన్ని చల్లండి. నిమ్మరసంలోని సిట్రికామ్లం యాపిల్ ముక్కలను ఎక్కువసేపు తాజాగా ఉంచడమే కాకుండా.. వాటిని రంగు మారనివ్వదు. లేదంటే ఇలా కూడా చేయచ్చు. కప్పు నీటిలో టేబుల్‌స్పూన్‌ నిమ్మరసం వేసి బాగా కలపాలి. ఆ మిశ్రమంలో యాపిల్ ముక్కల్ని ఐదు నిమిషాల పాటు ఉంచినా చక్కటి ఫలితం ఉంటుంది. నిమ్మరసానికి బదులుగా పైనాపిల్‌ జ్యూస్‌ను ఉపయోగించినా అదే ఫలితాన్ని పొందచ్చు.
* ఒక కప్పు మంచి నీళ్లలో, రెండు టేబుల్‌స్పూన్ల తేనె వేసి కలపండి. ఇప్పుడు ఈ నీటిలో, కట్ చేసిన యాపిల్ ముక్కలు వేసి కొన్ని నిమిషాల పాటు ఉంచాలి. ఇలా చేయడం వల్ల, యాపిల్ ముక్కలు ఎక్కువ సేపు తాజాగా ఉంటాయి.
* కట్ చేసిన యాపిల్ ముక్కలను ఐస్‌ నీళ్లలో కొన్ని నిమిషాల పాటు ఉంచి, బయటకు తీయాలి. ఇలా చేయడం వల్ల యాపిల్ ముక్కలు కాసేపటి వరకు తాజాగా ఉంటాయి.
* కట్ చేసిన యాపిల్ ముక్కలు ఎర్రబడకుండా ఎక్కువసేపు తాజాగా ఉండాలంటే వాటిని జిప్‌లాక్‌ బ్యాగ్‌లో బంధించాల్సిందే. యాపిల్‌ని ముక్కలుగా కట్ చేసిన తర్వాత వెంటనే వాటిని జిప్‌లాక్‌ బ్యాగ్‌లో పెట్టి అందులో గాలి లేకుండా ఒత్తేయాలి. ఇప్పుడు ఈ బ్యాగ్‌ను అలాగే ఫ్రిజ్‌లో పెట్టేయాలి. తద్వారా యాపిల్ గుజ్జులోని పాలీఫినోల్‌ ఆక్సిడేస్‌ వాతావరణంలోని ఆక్సిజన్‌తో చర్య జరపదు. ఫలితంగా యాపిల్ ముక్కలు ఎర్రబడకుండా జాగ్రత్తపడచ్చు.
* కాస్త దాల్చిన చెక్క పొడిని కట్ చేసిన యాపిల్ ముక్కలపై చల్లడం వల్ల ఆ ముక్కలు బ్రౌన్‌ కలర్‌లోకి మారకుండా జాగ్రత్తపడచ్చు. ఇందుకు దాల్చిన చెక్కలోని యాంటీ ఆక్సిడెంట్లే కారణం. అలాగే దాల్చిన చెక్క పొడి వల్ల యాపిల్ ముక్కలకు మరింత రుచి చేకూరుతుంది కూడా!
* మరుగుతున్న నీటిలో యాపిల్ ముక్కల్ని ఐదు నిమిషాల పాటు ఉంచి తీయాలి. ఆపై చల్లటి నీటితో శుభ్రం చేయాలి. ఇలా చేయడం వల్ల కూడా యాపిల్ ముక్కలు రంగు మారకుండా ఉంటాయి. అయితే ఈ క్రమంలో యాపిల్ గుజ్జు మెత్తబడిపోయే అవకాశం ఉంటుంది.. కాబట్టి వంటకాలు, ఇతర బేకింగ్‌ ఐటమ్స్‌లో వాడే యాపిల్స్‌ కోసమైతే ఇలా చేయడం మంచి పద్ధతి.
* ఒక్కోసారి యాపిల్ కట్ చేయడానికి ఉపయోగించే చాకు కూడా యాపిల్ ముక్కల్ని ఎర్రగా మార్చే అవకాశం ఉంటుంది. అందుకే పాతబడిన, తుప్పు పట్టిన చాకుల్ని ఉపయోగించకపోవడం మంచిది.
గమనిక:
ఏ పండైనా సరే - సాధ్యమైనంతవరకు అప్పటికప్పుడు కట్ చేసుకుని, తాజాగా తినడమే అన్ని రకాలుగా మంచిది.
Trending
గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
