Published : 23/01/2023 21:14 IST

క్యారట్‌తో.. కొత్త మెరుపులు!

క్యారట్‌లో ఉండే విటమిన్ 'ఎ' చర్మం బిగుతుదనం కోల్పోకుండా చేసి యవ్వనంగా ఉండేలా చేయడంలో తోడ్పడుతుంది. చర్మం ఎప్పుడూ అలాగే ఉండాలంటే విటమిన్-ఎ తగినంత పరిమాణంలో శరీరానికి తప్పకుండా అందాలి. ఇందుకోసం క్యారట్‌తో తయారుచేసుకునే ఈ ఫేస్ ప్యాక్, స్క్రబ్ ఉపయోగపడతాయి.

కావాల్సినవి:

క్యారట్ జ్యూస్- 1 టేబుల్‌స్పూన్

గుడ్డు- 1

ఆలివ్ ఆయిల్- 1 టీస్పూన్

పెరుగు- టేబుల్‌స్పూన్

తయారీ

ముందుగా క్యారట్‌ని గ్రైండ్ చేసి జ్యూస్ తీసుకోవాలి. ఈ జ్యూస్ ఒక టేబుల్‌స్పూన్ తీసుకొని దానికి గుడ్డులోని తెల్లసొన జత చేసి బాగా కలపాలి. ఈ మిశ్రమానికి పెరుగు కలిపి మరోసారి మెత్తగా అయ్యే వరకు మిక్స్ చేయాలి. ఇప్పుడు అందులో ఆలివ్ ఆయిల్ కూడా కలిపి ఫేస్ ప్యాక్ వేసుకోవడానికి అనుకూలంగా ఉండేలా మిశ్రమాన్ని సిద్ధం చేసుకోవాలి. ఈ ప్యాక్‌ని ముఖానికి అప్త్లె చేసుకుని 25 నిమిషాల తర్వాత గోరు వెచ్చని నీటితో శుభ్రం చేసుకోవాలి.

మృతకణాలు తొలగించే.. స్క్రబ్!

క్యారట్‌తో స్క్రబ్ తయారు చేసుకోవడం చాలా సులభం. దీనివల్ల ప్రయోజనాలు కూడా ఎక్కువే. మార్కెట్‌లో లభించే ఇతర స్క్రబ్‌ల కన్నా ఇది ఉత్తమంగా పని చేస్తుంది. పైగా ఖర్చు కూడా తక్కువ.

కావాల్సినవి:

క్యారట్- 1

పంచదార- 1 టేబుల్‌స్పూన్

పాల పొడి- 1 టేబుల్‌స్పూన్

తయారీ:

క్యారట్‌ని చాలా చిన్న చిన్న ముక్కలుగా కోసుకోవాలి. ఈ ముక్కలకి పాలపొడి, పంచదార జత చేయాలి. ఇప్పుడు ఈ మూడింటిని బాగా కలుపుకోవాలి. మనకి కావాల్సింది స్క్రబ్ కాబట్టి మిశ్రమం మరీ మెత్తగా కాకుండా కొంచెం గరుకుగా ఉండేలా చూసుకోవాలి. ఈ మిశ్రమంతో ముఖంపై మృదువుగా మర్దనా చేయాలి. తర్వాత ఆ మిశ్రమాన్ని ముఖంపై 15 నుంచి 20 నిమిషాల పాటు ఆరనివ్వాలి. ఇప్పుడు గోరువెచ్చని నీటితో ముఖాన్ని శుభ్రపరుచుకోవాలి. స్క్రబ్ చేయడం వల్ల చర్మం మీద పేరుకుపోయిన మృతకణాలు తొలగిపోతాయి కాబట్టి చర్మం కొత్త కాంతిని సంతరించుకుంటుంది. అంతేకాకుండా బ్లాక్‌హెడ్స్, వైట్‌హెడ్స్ కూడా తగ్గుముఖం పడతాయి.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.