అమ్మ అండతోనే ఇలా ఉన్నాం..!

(Photos: Instagram)

తల్లి ఒడే బిడ్డకు తొలి పాఠశాల అంటుంటారు. పిల్లల భవిష్యత్తుకు ఆమే బలమైన పునాది వేస్తుంది. వారిని ఉన్నత స్థితిలో నిలిపేందుకు ఎన్ని త్యాగాలకైనా సిద్ధపడుతుంది. అందుకే ‘అమ్మ అండతోనే మేమీ స్థాయికి చేరుకున్నాం..’ అంటుంటారు చాలామంది. ఆ జాబితాలో తామూ ఉన్నామంటున్నారు కొందరు సినీతారలు. తమ తల్లుల ప్రోత్సాహం, స్ఫూర్తితోనే పురుషాధిపత్యాన్ని జయిస్తూ సినీ రంగంలో రాణించగలుగుతున్నామని చెబుతున్నారు. ‘మాతృ దినోత్సవం’ సందర్భంగా ఆ విశేషాలేంటో చూద్దాం రండి...

పూజా హెగ్డే - లతా హెగ్డే

మా అమ్మ చాలా స్ట్రాంగ్. ఎలాంటి పరిస్థితినైనా ధైర్యంగా, సానుకూల దృక్పథంతో ఎదుర్కొంటుంది. అదే నాకు స్ఫూర్తినిచ్చింది. నా చిన్నతనం నుంచి అమ్మానాన్నలిద్దరూ ఏ విషయాన్నైనా ప్రయోగాత్మకంగా నాకు వివరించేవారు. వాళ్ల మాటలు, చేతల్లో నాకు ఒక నమ్మకం కనిపించేది. ఇక వర్క్‌-లైఫ్‌ బ్యాలన్స్‌ విషయంలో అమ్మ నుంచి చాలా నేర్చుకోవాలి. ఓ వైపు నన్ను, అన్నయ్యను చూసుకుంటూనే.. మరోవైపు వ్యాపారంలో రాణించింది. రోజంతా తానెంత బిజీగా ఉన్నా సాయంత్రం మేం స్కూల్‌ నుంచి ఇంటికొచ్చాక ఎంతో ఓపిగ్గా మాతో హోంవర్క్‌ చేయించేది. అసలు అమ్మ ఈ పనులన్నీ ఎలా మేనేజ్‌ చేసుకుంటుందోనని ఎప్పటికప్పుడు ఆశ్చర్యపోయేదాన్ని. ఇలా అటు వృత్తిని, ఇటు ఇంటిని, మరోవైపు పిల్లల బాధ్యతల్ని బ్యాలన్స్‌ చేస్తోన్న సూపర్ విమెన్ అందరికీ హ్యాట్సాఫ్!

సమంత – నినెట్టే ప్రభు

నమ్మకాన్ని నమ్మే వ్యక్తిని నేను. ఆ నమ్మకానికి నిలువెత్తు రూపమే మా అమ్మ. ఆమె ప్రార్థనల్లో ఏదో మ్యాజిక్‌ దాగుంది. నా చిన్నతనంలో పదే పదే అమ్మతో ఒక మాట అంటుండేదాన్ని.. ‘అమ్మా.. నా కోరికలు నెరవేరేలా ప్రార్థన చెయ్యమని!’ ఎందుకంటే తను అలా మనస్ఫూర్తిగా కోరుకొని చేసిన ప్రార్థనలు ఫలించేవి.. కోరికలు నెరవేరేవి! ఇప్పటికీ నేను ఈ మాటను మర్చిపోలేదు. ఏ తల్లీ తన కోసం ఏమీ కోరుకోదు.. పిల్లల క్షేమమే తన సంతోషంగా భావించే త్యాగమూర్తి అమ్మ. ఆ దేవుడి ప్రతిరూపం! ఇలాంటి అమ్మకు కూతురినవడం కంటే అదృష్టం ఇంకేముంటుంది?! లవ్యూ అమ్మా..!!

రష్మిక మందాన – సుమన్‌ మందాన

నాకు 18 ఏళ్ల వయసొచ్చినప్పట్నుంచి నా జీవితం ఓ మారథాన్‌లా ముందుకు సాగిపోతోంది. ఈ రేసు పూర్తయింది.. కాస్త విశ్రాంతి తీసుకుందాం.. అనుకోగానే మరో రేసు ప్రారంభించాల్సి వస్తోంది. ఓ నటిగా ఇలా బిజీగా ఉండాలనే నేనూ కోరుకుంటున్నా. మీతో ఒక్కమాట చెప్పనా.. ఇన్నేళ్ల నా జీవితంలో నేను ఇంట్లో గడిపిన క్షణాలు చాలా తక్కువ. ఎందుకంటే హైస్కూల్‌ చదువు పూర్తయ్యేదాకా హాస్టల్‌లోనే ఉన్నా. ఆ తర్వాత సినిమాల్లోకొచ్చాక షూటింగ్స్‌ హడావిడి. అయితే ఇంటిని మిస్సవుతున్నానన్న భావన నాలో నుంచి తొలగించడానికి అమ్మ ప్రతి క్షణం నా వెంటే ఉండేది. అర్ధరాత్రి షూటింగ్స్‌ ఉన్నా సెట్‌లోనే వేచి చూసేది. ఇక నాన్న కూడా రోజూ కాసేపు మాతో సమయం గడిపేవారు. ఇలా వాళ్లు నా వెంటే ఉంటూ నా బలాలుగా మారిపోయారు. నా నటనను ప్రశంసించడమే కాదు.. అందులోని లోపాల్ని పసిగట్టి నేను సరిదిద్దుకునేలా ప్రోత్సహించే గొప్ప స్ఫూర్తి మా అమ్మ. చాలామంది.. అమ్మ, నేను ఒకేలా ఉన్నామంటారు.. కానీ అన్నింటికంటే మా ఇద్దరి నవ్వు ఒకేలా ఉంటుంది. తను నాకు అందించిన గొప్ప గిఫ్ట్‌ అదే! లవ్యూ అమ్మా..!!

కీర్తి సురేశ్‌ - మేనక సురేశ్

నేను సినిమాల్లోకి రాకముందు అమ్మ నాతో ఒక విషయం పదే పదే అంటుండేది. ‘ఉత్తమ నటిగా జాతీయ పురస్కారం అందుకోలేకపోయాను.. ఆ లోటు ఎప్పటికీ నా మదిలో అలా ఉండిపోతుంది..’ అని! అమ్మ మలయాళంలో నటించిన తొలి చిత్రానికి బోలెడన్ని అవార్డులొచ్చాయి. ఈ క్రమంలోనే జాతీయ అవార్డు కూడా వస్తుందని ఆశించాం. కానీ ఆఖరి క్షణంలో మిస్సయింది. ‘ఒకవేళ భవిష్యత్తులో నేను ఈ అవార్డు అందుకున్నా.. అమ్మ కల నెరవేర్చినట్లవుతుంది..’ అనుకునేదాన్ని. ఆ కల ‘మహానటి’ ద్వారా నిజమైంది. ఓ కూతురిగా అది నాకు గర్వించదగ్గ క్షణం!

హ్యాపీ మదర్స్‌ డే!

మీ అమ్మ నుంచి అమితంగా ప్రభావితమైన, స్ఫూర్తి పొందిన అంశాల గురించి, మీ జీవితంలో ఆమె పాత్ర గురించి పంచుకోవడానికి ఈ కింది లింక్ క్లిక్ చేయండి..