అక్క సహజీవనం సంగతి.. నాన్నకెలా చెప్పాలి?
మా నాన్న తన పెంపకం గురించి గొప్పగా చెప్పుకుంటుంటారు. అక్క ఇలా చేస్తుందని ఊహించలేదు. ఈ విషయం నాన్నకు చెప్పాలో? లేదో? తెలియడం లేదు. ఇప్పుడు నేనేం చేయాలి? దయచేసి సలహా ఇవ్వగలరు.
మేము ముగ్గురం ఆడపిల్లలం. మా అక్క చెన్నైలో జాబ్ చేస్తోంది. నేను, చెల్లి చదువుకుంటున్నాం. నాన్న అక్కకు పెళ్లి సంబంధాలు చూస్తున్నారు. పెళ్లి చూపులకు రమ్మని ఎప్పుడు అడిగినా అక్క ఏదో ఒక వంక చెప్పి రావడం లేదు. అమ్మానాన్న బాధపడుతున్నారని నేను గట్టిగా అడిగితే తన ఆఫీసులో పని చేసే వ్యక్తితో లివ్ ఇన్ రిలేషన్‌షిప్‌లో ఉన్నానని చెప్పింది. ఈ విషయం నాన్నకు చెబితే చాలా గొడవవుతుంది. అసలు ఆయన ఏమైపోతారోనని భయంగా ఉంది. మా నాన్న తన పెంపకం గురించి గొప్పగా చెప్పుకుంటుంటారు. అక్క ఇలా చేస్తుందని ఊహించలేదు. ఈ విషయం నాన్నకు చెప్పాలో? లేదో? తెలియడం లేదు. ఇప్పుడు నేనేం చేయాలి? దయచేసి సలహా ఇవ్వగలరు. - ఓ సోదరి
జ. ఈ రోజుల్లో ఇలాంటి సంఘటనలు చాలా కుటుంబాల్లో జరుగుతున్నాయి. నిజానికి తల్లిదండ్రులు పిల్లలపై ఎంతో నమ్మకం పెట్టుకుంటారు. దీనికి తమ పెంపకం.. నేర్పించిన క్రమశిక్షణ.. అందించిన చదువుపై వారికి విశ్వాసం ఉండడమే. ఒకవేళ బయటివాళ్లు ఆ విషయం గురించి చెప్పినా నమ్మడానికి సిద్ధంగా ఉండరు. కానీ వాళ్లు అనుకున్న దానికి భిన్నంగా జరిగిందని తెలిస్తే మాత్రం కచ్చితంగా షాక్‌కు లోనవుతుంటారు. వారి ప్రతిస్పందన కూడా ఎలా ఉంటుందనేది ఊహించలేం. అలాగని ఈ విషయాన్ని ఎక్కువ రోజులు దాచినా ప్రమాదమే. కాబట్టి, తప్పనిసరిగా చెప్పాలి.
పెద్దవారికి వివాహ బంధంపై గట్టి నమ్మకం ఉంటుంది. సాధారణంగా లివ్ ఇన్ రిలేషన్షిప్ వంటివి వారికి నచ్చవు. ఒకవేళ వేరేవారి గురించి చెబితే పెద్దగా పట్టించుకోరు. కానీ, ఇంట్లో వాళ్లే అలా చేస్తున్నారంటే వాళ్లు అస్సలు తట్టుకోలేరు. మీ నాన్నగారి విషయంలో కూడా ఇలా జరిగే అవకాశం లేకపోలేదు. కాబట్టి మీ నాన్నగారికి ఏవిధంగా చెబితే బాగుంటుందో ఒక కూతురిగా మీరే నిర్ణయం తీసుకోవాల్సి ఉంటుంది. అయితే ఆయనకు ఒక్కసారిగా కాకుండా అసలు విషయం కొద్దికొద్దిగా చెప్పే ప్రయత్నం చేయండి.
మీ నాన్నగారికి చెప్పే ముందు మీ అక్కతో మరోసారి మాట్లాడండి. అతనితో ఉన్న బంధం గురించి ఒకటికి పదిసార్లు నిర్ధారించుకోమనండి. లివ్ ఇన్ రిలేషన్షిప్ కరెక్టేనా? అతను నిజాయతీపరుడేనా? వారి బంధం పెళ్లిగా మారితే ఇద్దరికీ ఇష్టమేనా? వంటి విషయాల గురించి స్పష్టమైన అభిప్రాయం తీసుకోండి. ఆ తర్వాత మీ నాన్నగారితో ఎలా చెప్పాలనే విషయం గురించి మీ కుటుంబ సభ్యులంతా కలిసి ఆలోచించడం మంచిది.
Trending
గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
