Mercedes Benz:రూ.1100 కోట్లు.. ప్రపంచంలోనే అత్యంత ఖరీదైన కారు!

ఇంటర్నెట్‌ డెస్క్‌: ఖరీదైన కార్ల తయారీ సంస్థ మెర్సిడెస్‌ సరికొత్త రికార్డు సృష్టించింది​. 67 ఏళ్ల కారును వందల కోట్లకు విక్రయించింది. 1955లో రూపొందించిన ఓ కారును ఏకంగా 135 మిలియన్‌ యూరోలకు విక్రయించింది. 1955 నాటి మెర్సిడెస్ బెంజ్​ ఎస్​ఎల్ఆర్​ కూపే మోడల్‌ వేలంపాటలో 142 మిలియన్ డాలర్లకు (దాదాపు 1100 కోట్లు) అమ్ముడుపోయినట్లు తెలిపింది. దీంతో ప్రపంచంలోనే అత్యంత ఖరీదైన కారు ఇదేనని సంస్థ వెల్లడించింది. కార్ల చరిత్రలోనే మరే ఇతర కారుకు ఇంత ధర పలికిన దాఖలాలు లేవు. ఈ వేలం ద్వారా వచ్చిన డబ్బును గ్లోబల్ స్కాలర్​షిప్ ఫండ్ కోసం ఉపయోగిస్తామని మెర్సిడెస్ తెలిపింది.

1963లో తయారైన ఫెరారీ 250 జీటీఓ కారుకు 2018లో జరిగిన వేలంపాటలో 70మిలియన్​ డాలర్లు దక్కాయి. ఆ తర్వాత ఈ మెర్సిడెస్ కారుకే భారీ ధర పలికింది. ఫెరారీ కారుతో పోలిస్తే ఇది మూడు రెట్లు అధిక ధరకు అమ్ముడుపోవడం విశేషం. 67 ఏళ్ల తర్వాత మెర్సిడెస్ బెంజ్​ ఎస్​ఎల్ఆర్​ కూపే మోడల్​లో ప్రస్తుతం రెండు కార్లు మాత్రమే ఉన్నాయి. మరో వాహనం జర్మనీలోని స్టుట్‌గార్ట్‌లోని మెర్సిడెజ్‌-బెంజ్‌ మ్యూజియంలో ప్రదర్శనకు ఉంచారు. అప్పటి చీఫ్​ ఇంజినీర్​ పేరును ఈ కార్లకు పెట్టారు. ఇవి గంటకు 186 కిలోమీటర్ల వేగంతో ప్రయాణించగలవు. 300 హార్స్​పవర్​తో 8 సిలిండర్ల ఇంజిన్ ఉంటుంది. కారు డోర్లు పైకి ఉంటాయి. ఎలాంటి వాతావరణ పరిస్థితుల్లోనైనా డ్రైవర్​కు రక్షణ కల్పించడం దీని ప్రత్యేకత.

మే 5న స్టట్​గర్ట్​లో మెర్సిడెస్ బెంజ్​ మ్యూజియంలో ప్రైవేటుగా అతికొద్ది మంది సమక్షంలో ఈ వేలంపాటను నిర్వహించినట్లు తెలుస్తోంది. అయితే ఈ కారును ఎవరు దక్కించుకున్నారనే విషయంపై మాత్రం స్పష్టత లేదు. వేలంపాటలో పాల్గొన్న కార్ డీలర్​ బ్రయాన్ రాబోల్డ్ తన క్లయింట్ కోసం కారును కొనుగోలు చేసినట్లు తెలిపారు.