Omicron: గత వారం ఐరోపాలో 70 లక్షల ఒమిక్రాన్ కేసులు..!

కోపెన్‌ హాగెన్: ప్రపంచ వ్యాప్తంగా కరోనా కొత్త వేరియంట్ ఒమిక్రాన్ వేగంగా  విజృంభిస్తోంది. మరీ ముఖ్యంగా ఐరోపా దేశాల్లో దీని తీవ్రత చాలా ఎక్కువగా ఉంది. జనవరి మొదటివారంలో ఐరోపాలో 70 లక్షలకు పైగా ఒమిక్రాన్ కొత్త కేసులు వెలుగుచూశాయి. రెండు వారాల వ్యవధిలో ఈ సంఖ్య రెట్టింపు కంటే ఎక్కువగా ఉంది. ఈ మేరకు ప్రపంచ ఆరోగ్య సంస్థ ఆందోళన వ్యక్తం చేసింది.

ఆరోగ్య సంస్థ ఐరోపా డైరెక్టర్ డాక్టర్ హాన్స్ క్లూగే మీడియాతో మాట్లాడుతూ.. ఐరోపా ప్రాంతంలోని 26 దేశాల్లోని జనాభాలో ఒకశాతం కంటే ఎక్కువ మంది ప్రతివారం కొవిడ్ బారినపడుతున్నారని వెల్లడించారు. ఈ కేసుల పెరుగుదలతో వైద్య వ్యవస్థ తీవ్ర ఇక్కట్లు ఎదుర్కోనుందని హెచ్చరించారు. వాషింగ్టన్ విశ్వవిద్యాలయానికి చెందిన ఇనిస్టిట్యూట్ ఆఫ్ మెట్రిక్స్ అంచనాలను ఉదహరిస్తూ.. రానున్న 6-8 వారాల్లో పశ్చిమ ఐరోపాకు చెందిన దాదాపు సగం మంది ప్రజలు కరోనా బారినపడతారని తెలిపారు. గతంలో ఏ వేరియంట్ ప్రబలనంత వేగంగా ఒమిక్రాన్ విస్తరిస్తోందని హెచ్చరించారు. అలాగే వ్యాక్సినేషన్ రేటు తక్కువగా ఉన్న దేశాలపై ఈ వ్యాప్తి తీవ్ర ప్రభావం చూపనుందన్నారు. ప్రజలంతా కొవిడ్ నియమాలు పాటించాలని, ఇంటిలోపల కూడా మాస్కులు ధరించాలని సూచించారు.