Iran: కరోనా ఆ పాఠశాల విద్యార్థుల్ని బతికించింది..!

 ఇరాన్‌లో బడిలోకి దూసుకెళ్లి, కూలిన యుద్ధవిమానం

టెహ్రాన్‌: కరోనా కారణంగా పాఠశాల మూసివేయడంతో ఇరాన్‌లో పెను ప్రమాదం తప్పిపోయింది. శిక్షణలో ఉన్న ఎఫ్‌-5 యుద్ధ విమానం సోమవారం వాయువ్య ప్రాంతమైన తబ్రిజ్‌లో కూలిపోయింది. ఆ ప్రాంతంలోని పాఠశాల ఆవరణలోకి దూసుకెళ్లి, అక్కడి గోడను ఢీ కొట్టింది. ఈ ఘటనలో ఇద్దరు సిబ్బంది, ఒక పౌరుడు మరణించారు. 

‘కరోనా మహమ్మారి కారణంగా అదృష్టవశాత్తూ పాఠశాల మూసివేసి ఉంది’ అని స్థానిక అధికారి ఒకరు మీడియాకు వెల్లడించారు. కాగా, అది శిక్షణ విమానం అని అధికారులు తెలిపారు. అందులోని ఇద్దరు సిబ్బంది అక్కడికక్కడే మరణించగా.. మరో మృతుడు ఆ దగ్గర్లో నివసించే వ్యక్తని చెప్పారు. ఈ ఘటనలో పాఠశాల గోడలు నల్లగా మసిబారిపోయాయి. వెంటనే స్పందించిన సిబ్బంది మంటలను అదుపులోకి తీసుకువచ్చారు.