మోదీ రాకకోసం ఆసక్తిగా ప్రవాసులు.. NMODI నంబర్‌ ప్లేట్‌ను ప్రదర్శించిన అభిమాని

మేరీలాండ్‌: మరికొన్ని రోజుల్లో అమెరికాలో పర్యటించనున్న భారత ప్రధాని నరేంద్ర మోదీకి (Narendra Modi) ఘన స్వాగతం పలికేందుకు అక్కడి ప్రవాస భారతీయులు ఏర్పాట్లు చేస్తున్నారు. అందుకోసం వారు ఎంతో ఉత్సాహంగా ఎదురుచూస్తున్నారు. ఈ సమయంలో ఓ ప్రవాస భారతీయుడు ప్రధానిపై ఉన్న అభిమానాన్ని చాటుకున్నారు. మేరీలాండ్‌కు చెందిన రాఘవేంద్ర అనే వ్యక్తి కారు నంబర్‌ ప్లేట్‌పై ‘NMODI’ అని రాయించారు.

‘నేను 2016లోనే ఈ ప్లేట్‌ను సిద్ధం చేసుకున్నాను. ప్రధాని మోదీ నాకొక స్ఫూర్తి. సమాజం, దేశం, ప్రపంచం కోసం ఏదైనా మంచి చేయాలనే ప్రేరణను ఆయన నుంచి పొందాను. ఇప్పుడు ప్రధాని ఇక్కడికి వస్తున్నారు. ఆయన్ను ఆహ్వానించేందుకు ఎదురుచూస్తున్నాను’అని రాఘవేంద్ర అన్నారు.

అమెరికా అధ్యక్షుడు జో బైడెన్‌ (Joe Biden), ఆయన సతీమణి జిల్‌ బైడెన్‌ ఆహ్వానం మేరకు మోదీ జూన్‌ 21 నుంచి 24 వరకు అక్కడ పర్యటించనున్నారు. ఈ సందర్భంగా అమెరికా కాంగ్రెస్‌లో రెండోసారి ప్రసంగిస్తారు. ఈ క్రమంలో శుక్రవారం శ్వేతసౌధం వెలుపల త్రివర్ణ పతాకం రెపరెపలాడింది. దీనిపై న్యూజెర్సీకి చెందిన ప్రవాస భారతీయుడు జెసల్‌ నార్ మాట్లాడుతూ.. ‘శ్వేతసౌధం వద్ద జాతీయ పతాకం రెపరెపలాడటం గర్వంగా, గౌరవంగా ఉంది’అని అన్నారు.

టైమ్స్‌ స్క్వేర్‌, నయాగరా ఫాల్స్ వంటి ప్రసిద్ధ ప్రాంతాల నుంచి ప్రవాస భారతీయులు స్వాగత సందేశాలు పంపుతున్నారు. ఉన్నత విద్య కోసం వెళ్లిన యువత.. ప్రధానిని ఆహ్వానిస్తూ సామాజిక మాధ్యమాల్లో స్వాగత సందేశాలు పెడుతున్నారు. ఇదిలా ఉంటే.. ఈ పర్యటన నేపథ్యంలో భారత్‌-అమెరికా సంబంధాలు(India-US Relationship) మరో స్థాయి చేరుకుంటాయని అమెరికాలోని భారత దౌత్యవేత్త తరణ్‌ జిత్‌సింగ్ సందు అన్నారు.