Viral Video: పట్టాలపై కూలిన విమానం.. ఎదురుగా దూసుకొస్తున్నరైలు.. ఆ తర్వాత ఏం జరిగిందంటే..?

ఇంటర్నెట్‌డెస్క్‌: దురదృష్టం.. అదృష్టం ఒకేసారి కలిసొస్తే ఇలానే ఉంటుంది. ఓ చిన్న విమానం పోయిపోయి రైలు పట్టాలపై కుప్పకూలింది. అందులో ఇరుక్కుపోయిన పైలట్‌ను పోలీసులు ఇలా బయటకు లాక్కొచ్చారో లేదో.. క్షణాల్లో ఓ రైలు వేగంగా ఆ విమాన శకలాన్ని ఢీకొంటూ వెళ్లిపోయింది. ఏ యాక్షన్‌ సినిమాకు తీసిపోని విధంగా ఉన్న ఈ సహజ దృశ్యం మొత్తం ఓ పోలీస్‌ అధికారి బాడీ కెమెరాలో నిక్షిప్తమైంది. ఈ వీడియో ఇప్పుడు వైరల్‌గా మారింది.

లాస్‌ఏంజెల్స్‌లోని రైల్‌ రోడ్‌ ట్రాక్‌లో పట్టాలపై ఆదివారం ఓ చిన్న సెస్నా 172 విమానం కూలిపోయింది. ఈ ఘటన మధ్యాహ్నం 2.10 గంటల సమయంలో చోటు చేసుకొంది. ఫెడరల్‌ ఏవియేషన్‌ సమాచారం ప్రకారం విమానం స్థానిక ఫెర్నాండో వెల్లి కమ్యూనిటీ నుంచి టేకాఫ్‌ అయ్యింది. తర్వాత ఎల్‌ఏపీడీ ఫుట్‌హిల్‌ డివిజన్‌ స్టేషన్‌ వద్ద రైల్‌ రోడ్‌పై ఇది కూలిపోయింది. ఈ ఘటన జరిగిన వెంటనే అక్కడే ఉన్న నలుగురు పోలీసు అధికారులు విమానంలో గాయపడి ఇరుక్కుపోయిన పైలట్‌ను బయటకు లాగారు. మరోవైపు అదే మార్గంలో రైలు దూసుకొస్తున్నా.. ఈ అధికారులు ప్రాణాలకు తెగించి పైలట్‌ను రక్షించారు. అక్కడే ఉన్న స్థానికులు ఈ దృశ్యం చూసి..  ‘గో.. గో.. గో..’ అని వారిని హెచ్చరిస్తున్నారు. పైలట్‌ను 2.15 సమయంలో బయటకు లాగగానే.. క్షణాల్లోనే ఆ రైలు వేగంగా ఆ విమనాన్ని ఢీకొని నుజ్జునుజ్జు చేసింది.