Jerusalem: 22ఏళ్లు ‘కోమా’లోనే .. ఆత్మాహుతి దాడిలో గాయపడిన మహిళ మృతి

జెరూసలెం: ఇజ్రాయెల్‌లోని జెరూసలెం రెస్టారంట్‌లో రెండు దశాబ్దాల క్రితం జరిగిన ఆత్మాహుతి దాడిలో పదిహేను మంది మృతిచెందగా.. అనేక మంది తీవ్ర గాయాలపాలైన విషయం తెలిసిందే. అయితే, 2001లో జరిగిన ఈ ఘటనలో తీవ్రంగా గాయపడిన ఓ మహిళ 22ఏళ్ల పాటు కోమాలోనే ఉండిపోయింది. తాజాగా ఆమె ప్రాణాలు కోల్పోయిందని ఇజ్రాయెల్‌లో ఓ ఆస్పత్రి వెల్లడించింది. దీంతో ఆ ఘటనలో చనిపోయిన వారి సంఖ్య 16కు చేరుకుంది.

జెరూసలెంలోని ఓ రెస్టారంట్‌లో 2001 ఆగస్టు 9న ఆత్మాహుతి దాడి జరిగింది. పాలస్తీనాకు చెందిన ఓ మిలిటెంట్‌ అక్కడి పిట్జా రెస్టారంట్‌లోకి వెళ్లి తనను తాను పేల్చుకొన్నాడు. ఆ ఘటనలో పలువురు ప్రాణాలు కోల్పోగా పదుల సంఖ్యలో క్షతగాత్రులుగా మిగిలిపోయారు. అదే సమయంలో హనా నాషెన్‌బెర్గ్‌ అనే 31ఏళ్ల మహిళ.. తన మూడేళ్ల చిన్నారితో కలిసి ఆ రెస్టారంట్‌లో భోజనం చేస్తున్నారు. ఆ ఆత్మాహుతి దాడిలో హనాకు తీవ్ర గాయాలై కోమాలోకి వెళ్లిపోయారు. కానీ, ఆ చిన్నారికి మాత్రం ప్రాణాలతో బయటపడ్డారు. ఇలా 22ఏళ్ల పాటు కోమాలోనే ఉండిపోయిన హనా.. తాజాగా ప్రాణాలు విడిచారు.

ఆ ఘటనలో ఆత్మాహుతికి పాల్పడిన వ్యక్తికి సహకరించినందుకు గాను అలాం తమేమి అనే మహిళకు శిక్ష పడింది. ఆమెకు 16 జీవిత ఖైదుల పడ్డాయి. అయితే, 2011లో హమాస్‌ మిలిటెంట్‌ సంస్థతో జరిగిన ఖైదీల మార్పిడిలో భాగంగా ఆమెను విడుదల చేశారు. అనంతరం ఆమెను జోర్డాన్‌కు పంపించారు. భారీ వినాశనానికి కుట్ర పన్నారని ఆమెపై అమెరికా ఆమెపై అభియోగాలు మోపింది. ఎఫ్‌బీఐ మోస్ట్‌ వాంటెడ్‌ టెర్రరిస్టుల జాబితాలోనూ చేర్చింది.