AI Candidate In UK Elections: ఎన్నికల్లో ‘ఏఐ’ అభ్యర్థి.. ఎన్ని ఓట్లు వచ్చాయో తెలుసా..?

AI Candidate In UK Elections: బ్రిటన్ ఎన్నికల ప్రచార సమయంలో ‘ఏఐ స్టీవ్’ అందరి దృష్టిని ఆకర్షించింది. కానీ విజయాన్ని మాత్రం దక్కించుకోలేకపోయింది. 

Published : 05 Jul 2024 15:35 IST

లండన్‌: బ్రిటన్ సార్వత్రిక ఎన్నికల్లో లేబర్ పార్టీ ఘన విజయాన్ని నమోదు చేసింది. ఈ ఎన్నికల్లో సరికొత్త సాంకేతికత కృత్రిమమేధ (AI Candidate In UK Elections) కూడా బరిలో నిలిచింది. ‘ఏఐ స్టీవ్’ పేరిట ప్రజల నుంచి ఓట్లను కోరింది. ఈ రాజకీయరంగ ప్రవేశం అంతర్జాతీయంగా చర్చనీయాంశమైనప్పటికీ.. ఓటర్లు మాత్రం ఈ స్టీవ్‌పై పెద్దగా ఆసక్తి కనబర్చలేదు. కేవలం 179 మంది మాత్రమే ఆ అభ్యర్థికి ఓటువేశారు. దాంతో ‘బ్రైటన్‌ పవిలియన్‌’ నియోజకవర్గంలో చివరి స్థానానికి పరిమితం కావాల్సి వచ్చింది.

వర్చువల్‌ అసిస్టెంట్లు, ఆటోమేటెడ్‌ కస్టమర్‌ సర్వీస్‌ ఏజెంట్ల నుంచి న్యూస్‌ యాంకర్లు, వర్చువల్‌ టీచర్ల వరకు ఈ కృత్రిమ మేధ సాంకేతికత అన్నింటా అద్భుతమైన పనులు చేసేస్తోంది. ఈ నేపథ్యంలోనే వ్యాపారవేత్త స్టీవ్‌ కాట్‌కు తన స్థానంలో ఏఐ అభ్యర్థిని నిలబెట్టాలనే ఆలోచన వచ్చింది. దీంతో తన ఫొటో సాయంతో రూపొందించిన ఏఐ అవతార్‌ను వినియోగించారు. ‘ఏఐ స్టీవ్‌’ పేరుతో నామినేషన్‌ సమర్పించి ఎన్నికల బరిలోకి దిగారు. ఈ వర్చువల్‌ అభ్యర్థి కాట్‌ తరపున నిల్చుంది. ప్రచారంలో పాల్గొంది.

బ్రిటన్‌ ప్రధాని రిషి సునాక్‌కు భంగపాటు.. ఎన్నికల్లో లేబర్‌ పార్టీ ఘన విజయం

యూకే ఎన్నికల్లో పోటీ చేసిన తొలి వర్చువల్‌ అభ్యర్థిగా ఏఐ స్టీవ్‌ చరిత్ర సృష్టించినప్పటికీ.. ఓటర్లను ఆకట్టుకోవడంలో మాత్రం విఫలమైంది. ‘బ్రైటన్‌ పవిలియన్‌’లో 70 శాతం ఓటింగ్ నమోదైనప్పటికీ.. 179(0.3 శాతం) ఓట్లను మాత్రమే పొందగలిగింది. అక్కడ గ్రీన్‌ పార్టీకి చెందిన సియాన్ బెర్రీ విజయం సాధించారు. ఈ ఎన్నికల్లో ఒకవేళ ఏఐ స్టీవ్‌ గెలుచుంటే.. వర్చువల్‌ అభ్యర్థికి బదులుగా కాట్‌ పార్లమెంట్‌ సభ్యుడిగా బాధ్యతలు తీసుకునేవారు. ప్రస్తుత రాజకీయాలతో విసుగుచెందిన ఆయన చేసిన ఈ ప్రయత్నం సఫలంకాలేదు. 2022లో కన్జర్వేటివ్‌ పార్టీ తరఫున పోటీ చేసినప్పటికీ ఆయన్ను విజయం వరించలేదు.

Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని