Air Travel: 16 గంటల ప్రయాణం తర్వాత.. ఎక్కిన చోటుకే మళ్లీ!

ఇంటర్నెట్‌ డెస్క్‌: న్యూజిలాండ్‌ (New zealand)- అమెరికా (US) విమాన ప్రయాణికులకు వింత అనుభవం ఎదురైంది. అక్లాండ్‌ నుంచి న్యూయార్క్‌కు బయల్దేరిన విమానం ఒకటి.. సుదీర్ఘ ప్రయాణం తర్వాత మళ్లీ బయల్దేరిన చోటుకే వచ్చింది. దిగాల్సిన విమానాశ్రయంలో చిన్నపాటి ప్రమాదం చోటు చేసుకోవడంతో ఈ పరిస్థితి తలెత్తింది.

ఎయిర్‌ న్యూజిలాండ్‌కు (Air New Zealand) చెందిన విమానం గురువారం సాయంత్రం అక్లాండ్‌ నుంచి బయల్దేరింది. దాదాపు 8 గంటల ప్రయాణించిన అనంతరం మళ్లీ తిరుగు ప్రయాణమైంది. విమానం దిగాల్సిన న్యూయార్క్‌లోని జాన్‌ ఎఫ్‌ కెన్నడీ విమానాశ్రయంలో విద్యుదాఘాతం జరగడంతో ల్యాండ్‌ అవ్వడానికి అనుమతి లభించలేదు. దీంతో తిరుగు ప్రయాణమై, విమానం బయలుదేరిన అక్లాండ్‌ విమానాశ్రయంలోనే ప్రయాణికులను దించింది. పాసింజర్స్‌కు ఈ విషయాన్ని ముందుగానే విమాన సిబ్బంది తెలియజేశారు. 

ఈ ఒక్క విమానమే కాదు.. సియోల్‌, రోమ్‌, మిలాన్‌ నుంచి కొన్ని విమానాలు సైతం తిరుగు ప్రయాణమయ్యాయి. మరికొన్ని విమానాలు అమెరికాలోని ఇతర విమానాశ్రయాల్లో ల్యాండ్‌ అయ్యాయి. న్యూజిలాండ్‌ విమాన ఘటనపై కొందరు ప్రయాణికులు తమ అభిప్రాయాలను పంచుకున్నారు. ‘నవ్వాలో ఏడవాలో అర్థం కావడం లేదు’ అని ఓ ప్రయాణికురాలు పేర్కొన్నారు. ‘ఏముంది! రోజంతా విమానంలో ప్రయాణించి ఇంటికొచ్చేశా’నంటూ మరో వ్యక్తి తన అనుభవాన్ని పంచుకున్నారు. గత నెల దుబాయ్‌- న్యూజిలాండ్‌ విమానంలోనూ ఇదే పరిస్థితి తలెత్తింది. దాదాపు 13 గంటలు ప్రయాణించిన విమానం మళ్లీ బయల్దేరిన చోటుకే వచ్చింది.