Imran Khan: ‘జైలు టు బెయిల్‌’.. ఇమ్రాన్‌ అరెస్టులో కీలక పరిణామాలివే!

ఇస్లామాబాద్‌: పాకిస్థాన్‌ (Pakistan) మాజీ ప్రధాని, తెహ్రీక్‌-ఏ-ఇన్సాఫ్‌  పార్టీ అధినేత ఇమ్రాన్‌ ఖాన్‌ను (Imran Khan) అరెస్టు చేయడం అక్రమమని పాక్‌ సుప్రీం (Pak Supreme Court) కోర్టు గురువారం స్పష్టం చేసిన సంగతి తెలిసిందే. వెంటనే ఆయన్ను విడుదల చేయాలని అక్కడి ప్రభుత్వాన్ని ఆదేశించింది. ఈ నేపథ్యంలో ఇస్లామాబాద్‌ హైకోర్టు ప్రత్యేక ధర్మాసనం ఇవాళ ఆయనకు రెండు వారాల బెయిల్‌ మంజూరు చేసింది. ఇమ్రాన్‌ జైలుకు వెళ్లిన నాటి నుంచి బెయిల్‌ మంజూరు చేసే వరకు చోటు చేసుకున్న కీలక పరిణామాలను ఓసారి పరిశీలిస్తే..

• అల్‌ ఖాదిర్‌ ట్రస్టు కేసులో విచారణకు హాజరైన ఇమ్రాన్‌ ఖాన్‌ను మంగళవారం పాక్‌ రేంజర్లు ఇస్తామాబాద్‌ హైకోర్టు (IHC) ఆవరణలోనే అరెస్టు చేశారు.
• ఐహెచ్‌సీ ఆదేశాల మేరకు ఇమ్రాన్‌ను బుధవారం నేషనల్‌ అకౌంటబిలిటీ బ్యూరో (ఎన్‌ఏబీ)కు అప్పగించారు.
• ఇమ్రాన్‌ అరెస్టు విషయం తెలుసుకున్న ఆయన అభిమానులు, తెహ్రీక్‌-ఏ-ఇన్సాఫ్‌ పార్టీ కార్యకర్తలు మంగళవారం నుంచే దేశ వ్యాప్తంగా నిరసనలకు దిగారు.
• నిరసనలను అదుపులోకి తెచ్చేందుకు పాక్‌ ప్రభుత్వం ఇస్లామాబాద్‌, పంజాబ్‌, బలోచిస్థాన్‌ తదితర ప్రాంతాల్లో సాయుధ బలగాలను మోహరించింది.
• దాదాపు 3000 మంది ఇమ్రాన్‌ ఖాన్‌ మద్దతుదారులను, పార్టీ కార్యకర్తలను పాక్‌ పోలీసులు అరెస్టు చేశారు. వివిధ జైళ్లలో నిర్బంధించారు.
• నిరసనలు హింసాత్మకంగా మారి.. ఇమ్రాన్‌ ఖాన్ మద్దతుదారులు 8 మంది ప్రాణాలు కోల్పోయారు. నిరసనకారులు ట్రక్కులకు, కార్లకు నిప్పంటించారు. ఈ ఘటనల్లో 200 మంది పోలీసులు గాయపడ్డారు.
• ఈ పరిస్థితులు 2007 ఎన్నికల ర్యాలీలో మాజీ ప్రధాని బెనజీర్‌ భుట్టో హత్య తర్వాత పాక్‌లో చోటు చేసుకున్న హింసాత్మక పరిస్థితులను తలపించాయి. భుట్టో హత్య తర్వాత ఆమె మద్దతుదారులు తీవ్ర ఆగ్రహానికి లోనై.. పాకిస్థాన్‌ వ్యాప్తంగా రోజుల తరబడి విధ్వంసం సృష్టించారు.
• హింసాత్మక పరిస్థితులు చోటు చేసుకున్న నేపథ్యంలో గురువారం పాక్‌ పోలీసులు ఇమ్రాన్‌ ఖాన్‌పై ఉగ్రవాద కేసు నమోదు చేశారు. అంతేకాకుండా పాకిస్థాన్‌ తెహ్రీక్‌-ఏ-ఇన్సాఫ్‌ పార్టీకి చెందిన పలువురు కీలక నేతలను కూడా ఈ కేసులో నిందితులుగా చేర్చారు.
• పాక్‌ రేంజర్లు అరెస్టు చేసి ఎన్‌ఏబీకి అప్పగించిన తర్వాత గురువారం ఇమ్రాన్‌ఖాన్‌ సుప్రీం కోర్టును ఆశ్రయించారు. విచారణ చేపట్టిన ధర్మాసనం ఆయన అరెస్టు అక్రమమని ప్రకటించింది.
• ఇస్లామాబాద్‌ హైకోర్టును ఆశ్రయించి.. న్యాయస్థానం నిర్ణయానికి అనుగుణంగా నడచుకోవాలని ఇమ్రాన్‌కు పాక్‌ సుప్రీం కోర్టు సూచించింది.
• సుప్రీం కోర్టు ఆదేశాల నేపథ్యంలో.. గురువారం రాత్రి ఇమ్రాన్‌ కాన్‌ ఇస్లామాబాద్‌లోని ప్రభుత్వ అతిథి గృహంలోనే ఉన్నారు. అక్కడే కుటుంబ సభ్యులను, స్నేహితులను, మద్దతుదారులను కలిశారు. పాక్‌ అధ్యక్షుడు అరిఫ్‌ ఆల్వి కూడా ఇమ్రాన్‌తో మాట్లాడారు.
• సుప్రీంకోర్టు ఆదేశాల నేపథ్యంలో శుక్రవారం విచారణ చేపట్టిన ఐహెచ్‌సీ ప్రత్యేక ధర్మాసనం.. ఇమ్రాన్‌కు 2 వారాల బెయిల్‌ మంజూరు చేస్తూ తీర్పునిచ్చింది.