Artificial Intelligence: ఐవీఎఫ్‌ సాఫల్యతకు కృత్రిమ మేధ సాయం

న్యూయార్క్‌: ఇన్‌ విట్రో ఫెర్టిలైజేషన్‌ (ఐవీఎఫ్‌) ద్వారా అభివృద్ధి చేసిన పిండంలో సాధారణ సంఖ్యలో క్రోమోజోములు ఉన్నాయా.. అసాధారణ సంఖ్యలో ఉన్నాయా అనే విషయాన్ని కృత్రిమ మేధస్సు(ఏఐ) అల్గోరిథం ద్వారా 70 శాతం కచ్చితత్వంతో గుర్తించవచ్చని తాజా అధ్యయనం వెల్లడించింది. అసాధారణ సంఖ్యలో క్రోమోజోములు ఉండటాన్ని ‘అన్యుప్లాయిడీ’ అని అంటారు. ఐవీఎఫ్‌లో పిండాలు విఫలమవటానికి ప్రధాన కారణాల్లో ఇదొకటి. ప్రస్తుతం అన్యుప్లాయిడీని గుర్తించటానికి బయాప్సీ లాంటి పరీక్షను అనుసరిస్తున్నారు. ఇందులో పిండాల్లోని కణాలను సేకరించి జన్యు పరీక్షలు చేస్తున్నారు. దీంతో ‘ఐవీఎఫ్‌’ ఖర్చు కూడా పెరుగుతోంది. తాజాగా కనుగొన్న స్టోర్క్‌-ఎ అనే అల్గోరిథమ్‌ పిండం చిత్రాలను సూక్ష్మంగా పరిశీలిస్తుంది. పిండం వయసు, స్వరూపం, ఐవీఎఫ్‌కు సంబంధించిన ఇతర డేటాను అందిస్తుంది. ఈ అధ్యయనాన్ని న్యూయార్క్‌కు చెందిన ‘వాల్‌ కార్నెల్‌ మెడిసిన్‌’ శాస్త్రవేత్తలు చేశారు.