విమానంలో రూ.260కోట్ల నగదు.. కొట్టేసేందుకు ఎయిర్‌పోర్టులోకి దూసుకొచ్చి..!

శాంటియాగో: విమానంలో తరలిస్తున్న భారీ మొత్తంలోని నగదు (Money)ను కొల్లగొట్టేందుకు ఓ ఘరానా దొంగల ముఠా విఫలయత్నం చేసింది. సినీ ఫక్కీలో ఎయిర్‌పోర్టులోకి దూసుకొచ్చి డబ్బును ఎత్తుకెళ్లేందుకు ప్రయత్నించింది. ఎయిర్‌పోర్టు (Airport) అధికారులు అప్రమత్తమవడంతో ఈ భారీ ‘మనీ హైయిస్ట్ (Money Heist)‌’ను అడ్డుకోగలిగారు. చిలీ (Chile) రాజధాని శాంటియాగోలో ఈ ఘటన చోటుచేసుకుంది.

ఫ్లోరిడా (Florida)లోని మియామీ నుంచి 32.5 మిలియన్‌ డాలర్ల (భారత కరెన్సీలో దాదాపు రూ.262 కోట్లకు పైనే) నగదును ప్రత్యేక విమానంలో బుధవారం చిలీకి తీసుకొచ్చారు. ఆ నగదును చిలీలోని పలు బ్యాంకులకు తరలించాల్సి ఉంది. శాంటియాగోలోని విమానాశ్రయంలో ఈ విమానం (Flight) దిగగానే అందులోని డబ్బును ఓ సాయుధ ట్రక్కులోకి తరలిస్తుండగా ఉన్నట్టుండి ఓ దొంగల ముఠా దాడి చేసింది. వాహనాలతో విమానాశ్రయ గేటును బద్దలుకొట్టి ఆ ముఠా రన్‌వేపైకి చొచ్చుకొచ్చింది.

అందులో కొందరు దొంగలు భద్రతా సిబ్బందిపై దాడి చేసి ఆయుధాలు లాక్కున్నారు. దీంతో అప్రమత్తమైన ఎయిర్‌పోర్టు పోలీసులు వెంటనే వారిపైకి కాల్పులు జరిపారు. దీంతో దొంగలు అక్కడి నుంచి పారిపోయారు. ఈ కాల్పుల ఘటనలో పౌరవిమానయాన ఉద్యోగి ఒకరు మృతిచెందగా.. నిందితుల్లో ఒకడు హతమయ్యాడు. మిగతవారి కోసం పోలీసులు గాలిస్తున్నారు. ఘటన తర్వాత డబ్బు సురక్షితంగానే ఉందని అధికారులు వెల్లడించారు.

కాగా.. శాంటియాగో ఎయిర్‌పోర్టులో ఇలాంటి ఘరానా దోపిడీలు కొత్తేం కాదు. 2020లో ఓ దొంగల ముఠా.. ఎయిర్‌పోర్టులోని ఓ గోదాంలో ఉంచిన 15 మిలియన్‌ డాలర్ల విలువ చేసే వస్తువులను ఎత్తుకెళ్లింది. అంతకుముందు ఆరేళ్ల క్రితం కూడా 10 మిలియన్‌ డాలర్ల విలువైన వస్తువులు చోరీకి గురయ్యాయి.