AUKUS సబ్‌మెరైన్ ఒప్పందం.. భగ్గుమన్న డ్రాగన్‌

బీజింగ్‌: అమెరికా(America)కు చెందిన ఐదు అణు జలాంతర్గాముల(nuclear-powered submarines) కొనుగోలు ప్రణాళికలను తాజాగా ఆస్ట్రేలియా ప్రకటించింది. ఇండో-పసిఫిక్ ప్రాంతంలో చైనాకు చెక్‌ పెట్టేందుకు ఏర్పడిన ఆకస్‌(AUKUS)లోని ఈ దేశం చేసిన ప్రకటనపై డ్రాగన్ భగ్గుమంటోంది. ఆ కూటమి దేశాలు తప్పుడు, ప్రమాదకరమైన మార్గంలో పయనిస్తున్నాయని మండిపడింది. 

అమెరికాAmerica), ఆస్ట్రేలియా(Australia), బ్రిటన్‌(United Kingdom) కలిసి ఆకస్‌(AUKUS) పేరుతో భద్రతా కూటమిగా ఏర్పడ్డాయి. 18 నెలల క్రితం ఈ కూటమి ఏర్పడింది.  ఇండో పసిఫిక్‌ ప్రాంతంలో స్థిరత్వం కోసం ఈ మూడు దేశాలు తమ రక్షణ సామర్థ్యాలతో పాటు కృత్రిమ మేథ, సైబర్‌ సెక్యూరిటీ వనరులను పరస్పరం పంచుకోనున్నాయి. ఈ క్రమంలోనే అణుశక్తితో నడిచే జలాంతర్గాముల తయారీలో అమెరికా, బ్రిటన్‌ దేశాలు ఆస్ట్రేలియాకు సాయం అందిస్తాయి. ఈ క్రమంలో ఆకస్‌ సబ్‌మరైన్‌ డీల్‌ను ఆవిష్కరించారు.

దీనిపై చైనా విదేశాంగ ప్రతినిధి వాంగ్‌ వెన్‌బిన్‌ స్పందించారు. ‘తాజాగా విడుదల చేసిన ప్రకటన ద్వారా అమెరికా, ఆస్ట్రేలియా, బ్రిటన్.. అంతర్జాతీయంగా వస్తోన్న ఆందోళనలను  పట్టించుకోలేదని స్పష్టమవుతోంది. వారు కేవలం వారి భౌగోళిక-రాజకీయ ప్రయోజనాలను దృష్టిలో పెట్టుకొని వ్యవహరిస్తున్నారు. వారు ప్రమాదకరమైన, తప్పుడు మార్గంలో ఇంకా ఇంకా ముందుకు వెళ్తున్నారు’ అని తీవ్ర వ్యాఖ్యలు చేశారు. ఈ ఒప్పందం ప్రచ్ఛన్న యుద్ధం నాటి మనస్తత్వానికి నిదర్శమని తెలిపారు. అలాగే ఈ విక్రయం అంతర్జాతీయ అణు నిరాయుధీకరణ చర్యలకు విఘాతమని వ్యాఖ్యానించారు. 

యూఎస్‌(US)కు చెందిన ఐదు అణు జలాంతర్గాములను కొనుగోలు చేస్తామని, తర్వాత యూఎస్‌, బ్రిటిష్ సాంకేతికతతో కొత్త మోడల్‌ను నిర్మిస్తామని ఈ ఒప్పందం సందర్భంగా ఆస్ట్రేలియా ప్రధాని ఆంటోనీ ఆల్బనీస్ వెల్లడించారు.