Aung san suu kyi : అవినీతి కేసులో ఆంగ్‌ సాన్‌ సూకీకి ఐదేళ్ల జైలు శిక్ష!

యాంగోన్‌: మయన్మార్‌ కీలక నేత, నోబెల్‌ బహుమతి విజేత ఆంగ్​ సాన్​ సూకీకి అక్కడి జుంటా కోర్టు అవినీతి కేసులో ఐదేళ్ల జైలు శిక్ష విధించింది. 6 లక్షల డాలర్ల నగదును, బంగారు కడ్డీలను లంచంగా తీసుకున్నట్లు సూకీ మీద ఆరోపణలు వచ్చిన సంగతి తెలిసిందే. ఈ విషయంపై ఆమె అవినీతికి పాల్పడినట్లు కోర్టు బుధవారం నిర్ధారించింది. అవినీతి ఆరోపణలకు సంబంధించి ఆమె ఎదుర్కొంటున్న 11 కేసుల్లో ఇది ఒకటి.

మయన్మార్‌లో సైన్యం తిరుగుబాటు చేసి అధికారాన్ని స్వాధీనం చేసుకున్న తరవాత ఆమెను గత సంవత్సరం ఫిబ్రవరి 1న అరెస్టు చేశారు. సాధారణ ఎన్నికల్లో అక్రమాలకు పాల్పడ్డారనే ఆరోపణలతో ఆమెను పదవి నుంచి తొలగించారు. ఆమెతో పాటు పలువురు నేతలను కూడా నిర్బంధంలోకి తీసుకున్నారు.