Biden: దౌత్యమార్గంపై ఆశలు సజీవం..

  అగ్రదేశాధినేతల అభిప్రాయం

ఇంటర్నెట్‌డెస్క్‌: ఉక్రెయిన్‌ సంక్షోభ పరిష్కారానికి దౌత్యమార్గాలు ఇంకా పూర్తిగా మూసుకుపోలేదని అమెరికా అధ్యక్షుడు జోబైడెన్‌, బ్రిటన్‌ ప్రధాని బోరిస్‌ జాన్సన్‌ అభిప్రాయపడ్డారు. వీరు నేడు 40 నిమిషాలపాటు ఫోన్‌కాల్‌లో మాట్లాడుకొన్నారు. రష్యా ఇప్పటికే దాదాపు 1,00,000 మందికిపైగా సైనికులను ఉక్రెయిన్‌ సరిహద్దుల్లో మోహరించింది. దీంతో దాదాపు డజనుకుపైగా దేశాలు ఉక్రెయిన్‌ నుంచి తమ ప్రజలను వెనక్కి రావాలని కోరాయి.

రష్యా- ఉక్రెయిన్‌ సరిహద్దుల నుంచి దళాల విరమణకు అవసరమైన దౌత్యానికి కొన్ని కీలక మార్గాలే మిగిలి ఉన్నాయన్నట్లు బైడెన్‌తో ఫోన్‌కాల్‌ సందర్భంగా జాన్సన్‌  పేర్కొన్నట్లు బ్రిటన్‌ ప్రధాని కార్యాలయమైన డౌనింగ్‌ స్ట్రీట్‌ ఒక ప్రకటనలో పేర్కొంది. ఉక్రెయిన్‌పై జరిపే ఏ చొరబాట్లైనా రష్యాలో సుదీర్ఘ సంక్షోభానికి దారితీస్తుందని నేతలు పేర్కొన్నట్లు ఆ ప్రకటనలో వివరించారు.

ఈ సందర్భంగా అమెరికా తీసుకొనే చర్యలకు సాయం చేయడానికి బ్రిటన్‌ సిద్ధంగా ఉందని ఆ దేశ ప్రధాని బోరిస్‌ జాన్సన్‌ తెలపగా.. ‘‘మీరు లేకుండా మేం ఎక్కడికీ వెళ్లం మిత్రమా’’ అని అమెరికా అధ్యక్షుడు జోబైడెన్‌ పేర్కొన్నారు.