Biden: జెలెన్‌స్కీపై బైడెన్‌ అసహనం..!

ఇంటర్నెట్‌డెస్క్‌: ఉక్రెయిన్‌ అధ్యక్షుడు జెలెన్‌స్కీపై అమెరికా అధ్యక్షుడు బైడెన్‌ అసహనం వ్యక్తం చేసిన ఘటన ఆలస్యంగా వెలుగులోకి వచ్చింది. జూన్‌ 15వ తేదీన బిలియన్‌ డాలర్ల మానవీయ, సైనిక సాయం ఇచ్చే విషయాన్ని చెప్పేందుకు జెలెన్‌స్కీకి బైడెన్‌ ఫోన్‌ చేశారు. ఈ క్రమంలో బైడెన్‌ వివరాలు చెప్పటం ముగించాక.. ఉక్రెయిన్‌కు ఇంకా కావాల్సిన పరికరాల జాబితాను జెలెన్‌స్కీ చెప్పటం మొదలుపెట్టారు. ఈ క్రమంలో అసహనానికి గురైన బైడెన్‌ స్వరం పెంచి.. ‘కొంచెం కృతజ్ఞత చూపించండి’ అని వ్యాఖ్యానించారు. ఈ విషయాన్ని అమెరికాకు చెందిన ఓ ఆంగ్ల పత్రిక వెల్లడించింది.

ఉక్రెయిన్‌కు సాయం మంజూరు అయినప్పుడల్లా సాధారణంగా బైడెన్‌ స్వయంగా ఫోన్‌ చేసి ఆ వివరాలను జెలెన్‌స్కీకి వివరించారు. 2022లో అమెరికా నుంచి అత్యాధునిక ఆయుధాలు ఉక్రెయిన్‌కు కాంగ్రెషనల్‌ రీసెర్చ్‌ సర్వీస్‌ రిపోర్టు వెల్లడిస్తోంది. అమెరికా ఇచ్చిన ఆయుధాల్లో హైమార్స్‌ రాకెట్‌ సిస్టమ్‌, స్టింగర్‌, జావెలిన్‌ క్షిపణలు, ఎం-17 హెలికాప్టర్లు ఉన్నట్లు పెంటగాన్‌ నివేదికలు చెబుతున్నాయి. జనవరి నుంచి ఆగస్టు వరకు అమెరికా నుంచి 8.79 బిలియన్‌ డాలర్ల సాయం అందింది. అంతేకాదు.. ఉక్రెయిన్‌ సైన్యానికి అవసరమైన శిక్షణ, ఇంటెలిజెన్స్‌ వంటివి కూడా అమెరికా నుంచి అందుతున్నాయి.