King Charles III: వేలానికి కింగ్‌ ఛార్లెస్‌ వివాహం నాటి కేకు ముక్క

లండన్‌: బ్రిటన్‌ నూతన రాజు కింగ్‌ ఛార్లెస్ III‌, యువరాణి డయానా దంపతుల వివాహం నాటి ఓ కేకు ముక్కను వేలం వేయనున్నారు. 3000మంది అతిథుల మధ్య 1981లో వీరి వివాహం అంగరంగ వైభవంగా జరిగింది. అయితే, వివాహానికి వచ్చిన అతిథుల్లో ఒకరైన నిగెల్‌ రికెట్స్‌ గతేడాది మరణించారు. అయితే ఈ అతిథికి సంబంధించిన ఓ ఆసక్తికర విషయం కొద్దిరోజుల క్రితం బయటపడింది. ఆ వివాహానికి సంబంధించిన కేకు ముక్కను నిగెల్‌ 41 ఏళ్లుగా భద్రంగా దాచారు. తాజాగా ఈ విషయం వెలుగులోకి వచ్చారు. దీంతో ఆ కేకు ముక్కను ప్రముఖ సంస్థ డోర్‌ అండీ రీస్‌ వేలం వేయనుందని న్యూయార్క్‌ పోస్ట్‌ తెలిపింది.

ఈ వేలాన్ని 300 పౌండ్ల (దాదాపు రూ.27వేలు) నుంచి మొదలుపెట్టే అవకాశాలున్నాయి. అయితే, అంచనాలను మించి అధిక ధరకు అమ్ముడుపోయే అవకాశాలున్నాయని వార్తాసంస్థ పేర్కొంది. 41 ఏళ్ల క్రితం ఎలాగైతే ప్యాక్‌ చేసి విక్రయించారో.. ఈ ముక్కను కూడా అదేవిధంగా ప్యాక్‌ చేసి వేలం వేసేందుకు అంతా సిద్ధమయ్యారు. నాడు వివాహంలో ఛార్లెస్‌ దంపతులు మొత్తంగా 23 కేకులు కోశారని.. ఈ ముక్క ఫ్రూట్‌ కేకులోని ఓ భాగంగా గుర్తించారు. వారి వివాహానికి సంబంధించిన ఓ కేకు ముక్కను 2014లో ఇదే సంస్థ వేలం వేయగా నాడు 1,375 పౌండ్లు (దాదాపు రూ.1.27లక్షలు) పలికింది.